Read obolo II Ubọọn̄ 11 Bible Online

II Ubọọn̄ 11 - obolo bible

II Ubọọn̄ 11

¹Mgbọ Atalia nga kè Ayajaya omun̄be ibe ke Ayajaya ogwu gwun̄ îkwu, ibebene ikikpan̄ otutuuk ebi owot iman ogwu ubọọn̄ ìsisik.

²Ire, Jeyoseba, gwun̄ enenwaan̄ kè Jeyoram ogwu ubọọn̄, òrere ngwan̄ enenwaan̄ kè Ayajaya, oneninween lek iben Jowas gwun̄ kè Ayajaya isan̄a me etete bọn ogwu ubọọn̄, ebi ebekpakpan̄, mè isa ọmọ melek ogwu òkiban ọmọ isi ilet me emen agwut, isan̄a me chieen̄ kè Atalia. Eya orọ, kpekpan̄ gwun̄ ya.

³Ikeyi ke Jowas olet me emen agwut ge me Uwu Mbuban Okumugwem acha gweregwen, ọmọ melek ogwu òkiban ọmọ. Otutuuk mgbọ ya, Atalia okekikpulu otutuuk ido ya.

⁴Mgbọ Atalia okpulube iso acha jaaba, Jeyoyada ogwu ngwugwa onenigwen ebi ibot akọn̄ ìkikpulu efit ebi akọn̄ ebi Kari mè ebi ìkibem ogwu ubọọn̄ isa isi me Uwu Mbuban Okumugwem. Inenikaan̄ mgbaan̄-nchieek melek kiban̄, mè irọ mè ema enyan̄a ibot me Uwu Mbuban Okumugwem, mè inisan̄a gwun̄ ogwu ubọọn̄ ya isibi ijeen̄ ema,

⁵mè ininyi ema ida ibe, “Inu enyi eberọ ìre ikeyi: Enyi isinu ikwaan̄ me Usen Mbuban, ìfele lek kinyi irek ita. Ebi irek ge mêkibem uwu ogwu ubọọn̄.

⁶Ebi irek ge ebekibem otunchit Suru, sà irek ge ebekitap ubọk inyi ebi ìkibem uga otunchit uwu ogwu ubọọn̄. Sa me ikeyi, me etete kinyi ukpa ita chi, ukpa ge môkikup ikibem uwu ogwu ubọọn̄ ya mgbọ geelek.

⁷Enyi ebi irek iba cha ebi kpekisi ikwaan̄ me Usen Mbuban, enyi mêkibem Uwu Mbuban melek ogwu ubọọn̄ me emen.

⁸Enyi mêkeke ikana ogwu ubọọn̄ okokop, ogwu ikup, melek nroon̄ akọn̄ kan̄ me ubọk. Ogwu geelek òjeje igbet ere enyi ekupbe, ekpakpan̄. Enyi mêkup melek ogwu ubọọn̄, ere geelek ìbosi, me isisibi kan̄ mè ikaka kan̄.”

⁹Ebi ibot efit efit ebi akọn̄ cha erọrọ otutuuk inu cha Jeyoyada ogwu ngwugwa onyibe ema ida ibe erọ. Ema geelek esasa ebi kiban̄, ebi ìkup me ikwaan̄ me Usen Mbuban mè ebi ìkisiki efuuk me Usen Mbuban inu me isi kè Jeyoyada ogwu ngwugwa.

¹⁰Jeyoyada onenikpulu otunwa ogwu ubọọn̄ Debit mè agbọ kan̄, echi òkup me Uwu Mbuban Okumugwem isa ikana inyi ebi ibot akọn̄ cha.

¹¹Ebi mbem cha ekekeke ikat ikana Uwu Mbuban, ogwu ikup, melek nroon̄ akọn̄ kan̄ me ubọk, ibene me agan̄ osiki Uwu Mbuban ire agan̄ inyọn̄, mè agba lek ntook ngwugwa melek agan̄ isi Uwu Mbuban, ikibem ogwu ubọọn̄.

¹²Jeyoyada onenisan̄a Jowas gwun̄ ogwu ubọọn̄ isibi, mè iniben okpibot ubọọn̄ ikwuun̄ ọmọ me ibot, mè iniben Ikpa Ikan inyan̄a-ibot Awaji itap ọmọ me ubọk. Ema erọrọ Jowas ubọọn̄ me ere ya, mè itọkọ ọmọ aran̄ me ibot. Ebi ene ekekikwak ubọk, mè ikitaan̄ ukpo ikibe, “Ogwu ubọọn̄, luk ugwem jọn̄ọ!”

¹³Mgbọ ogwu ubọọn̄ enenwaan̄ Atalia onọbe okput ebi mbem mè ebi ene ekidimi ere, ijeje isi lek ebi ife cha me ere Uwu Mbuban ya,

¹⁴mè ikpọ, mè imun̄ aya ogwu ubọọn̄ okekebe me agba lek atà me otu isotu Uwu Mbuban, igọọk me orọmijọn̄ irọrọ aya ubọọn̄, mè imun̄ si ebi ibot mkpulu mè ebi ìkiwut otita ekekebe ikana ogwu ubọọn̄, otutuuk ebi ene me inyọn̄ ijọn̄ ya ekekinwọọn̄ unwọọn̄, mè ikiwut otita. Atalia otataba ofọnti òkup ọmọ me lek igwak, mè ikitaan̄ ukpo ibe, “Mîgwak ido! Mîgwak ido!”

¹⁵Jeyoyada ogwu ngwugwa ìkaweek ibe ekpan̄ Atalia me Uwu Mbuban Okumugwem, eya orọ, inyinyi ebi ibot akọn̄ cha ìkikpọ chieen̄ me lek efit efit ebi akọn̄ ida ibe, “Ìtaba ogwu enenwaan̄ ya ìtibi agbagba kinyi isibi me ere Uwu Mbuban. Ogwu inu ibonitap ubọk inyi, ìsa oge akọn̄ ìfieek ìkpan̄.”

¹⁶Esasa Atalia ije itibi iraka isi ire otunchit ere inyinya okiraka inin̄ oyet egep uwu ogwu ubọọn̄, mè ikpan̄ ọmọ me ere ya.

¹⁷Jeyoyada ogwu ngwugwa onenirọ inyi ogwu ubọọn̄ Jowas mè otutuuk ebi ene enyan̄a ibot enyi Okumugwem, ibe ke ema mêre ebi eyi Okumugwem, mè inirọ si otutuuk ebi ene mè ogwu ubọọn̄ egbaan̄ echieek ibe ke ema mêluk me otu ge.

¹⁸Otutuuk ebi ido enenigbuku isi uwu Baali, mè igbugbọ uwu ya igwook, mè igwak ntook geelek, mè ibak mkpọmfaka geelek, mè itet Matan ogwu ngwugwa Baali ikpan̄ me isi ntook ngwugwa cha. Jeyoyada ogwu ngwugwa oneniria ebi mbem ito me Uwu Mbuban Okumugwem ibe ekebem.

¹⁹Inenititiin̄ ebi ibot efit efit ebi akọn̄, mè ebi Kari, mè ebi ìkibem ogwu ubọọn̄, igbaalek otutuuk ebi ido, ọmọ melek kiban̄ enenigbaan̄ isa ogwu ubọọn̄ inan̄a me Uwu Mbuban Okumugwem ije itibi otunchit ebi mbem isi itap me uwu ogwu ubọọn̄. Ogwu ubọọn̄ osisi isiki ikweek irek me inyọn̄ ogboon̄ ubọọn̄.

²⁰Otutuuk ebi ido ebebele ejit, ama okukup me utelelek. Atalia okwukwu ichep. Esa oge akọn̄ ikpan̄ ọmọ me emen oyet egep uwu ogwu ubọọn̄.

²¹Jowas ìre acha jaaba mgbọ îkanabe ogwu ubọọn̄ me Juda.