Read obolo II Ubọọn̄ 14 Bible Online

II Ubọọn̄ 14 - obolo bible

II Ubọọn̄ 14

¹Me òso acha iba me lek mkpulu kè Jeyowas gwun̄ kè Jeyowayaji ogwu ubọọn̄ Ijeren, Amajiya gwun̄ kè Jowas onenikana ogwu ubọọn̄ Juda.

²Amajiya ìre akọp acha iba mè go mgbọ îkanabe ogwu ubọọn̄, mè ikup me Jeruselem ikpulu akọp acha iba mè onaan̄ge. Erieen̄ ogwu uga ìre Jeyowadin ogwu Jeruselem.

³Amajiya îrọ inu òtatat me chieen̄ Okumugwem, ire ìkakup kubọk eyi kè Debit nte kan̄ ugane, mije, otutuuk inu geelek Jowas ogwu ute orọbe, eya ke ọmọ orọ.

⁴Ire, kpegbugbọ isi-ijọn̄ cha. Ebi ene ekpọkpọ ikisi igwa si ngwugwa, mè ikiwọp nsensi me isi-ijọn̄ cha.

⁵Mgbọ Amajiya omun̄be ibe ke mkpulu kan̄ îra ikeke inye, ikpakpan̄ ebi ibot ikwaan̄ cha ebi ìkpakpan̄ nte kan̄ ogwu ubọọn̄.

⁶Ire, ìkakpan̄ bọn ebi ìkpakpan̄ nte kan̄ cha ìgbaalek ebi ute cha îkpan̄be, kubọk egebe me Ikan kè Mosis ibe ke Okumugwem ìnyi ida ibe: “Ekakpan̄ ebi ute mije ijo inu ebi bọn erọbe, ekakpan̄ si bọn mije ijo inu ebi ute erọbe. Ene geelek ìbokwu mkpa mije ijo inu kan̄ îrọbe.”[4]

⁷Îre Amajiya okpan̄ akọp obop ebi akọn̄ Edọm me iteke Uchi, mè ibọkọ ama Sela me akọn̄, mè inwene erieen̄ ama ya ikigwen Yọkiteli, eyi ekigwen mege inire cherekeyi.

⁸Amajiya oneniria etip isi lek kè Jeyowas gwun̄ kè Jeyowayaji, gwun̄ gwun̄ kè Jewu ogwu ubọọn̄ Ijeren, ikitọ ubọk me isi ibe, “Na, na chichini melek n̄a me akọn̄ isi mè isi.”

⁹Ire, Jeyowas ogwu ubọọn̄ Ijeren onenisa urọk ifọọk Amajiya ogwu ubọọn̄ Juda otu ibe: “Kpọ, ukpak ge me oron Lebanọn ìria etip isi lek ilip me oron Lebanọn yaage ibe, ‘Sa gwun̄ kwun̄ enenwaan̄ che olom nyi gwun̄ n̄a enerieen̄.’ Me ekakpọge chieen̄, anam oron Lebanọn ge onenije iraka, mè ijak ukpak ya ikpukpuku.

¹⁰Iin̄, me atikọ, owu otim akọn̄ ikpan̄ Edọm, mè inikibene lek. Min lek kwun̄ mije ntim-mkpan̄ ya, mè siki kweek irek me uwu kwun̄. Òjeje ikiweek itatap lek kwun̄ me ùrioon̄, mè itap si ebi Juda igbaalek?”

¹¹Ire, Amajiya ìkagban̄ utọn̄. Jeyowas ogwu ubọọn̄ Ijeren onenijibi akọn̄ isibi isi ichichini Amajiya ogwu ubọọn̄ Juda isi mè isi me Bet Semes, me ido Juda.

¹²Ebi Ijeren etitim ikpan̄ ebi Juda, ebi akọn̄ Juda elilim, ogwu ikup ofo uwu kan̄.

¹³Jeyowas ogwu ubọọn̄ Ijeren otetet Amajiya ogwu ubọọn̄ Juda, gwun̄ kè Jowas, gwun̄ gwun̄ kè Ayajaya, me agam me emen akọn̄ ya, me Bet Semes. Jeyowas oneninin̄ Jeruselem, mè igbugbọ mgban Jeruselem igwook, ibene me otunchit Iferem isi ire otunchit Mfufọ. Ere îgbugbọbe îjọn̄ọ iso efit ejit ge.

¹⁴Jeyowas okpukpulu otutuuk alata araran̄ mè alata okuket mè otutuuk nroon̄ ikwaan̄ emun̄be me Uwu Mbuban Okumugwem, mè ikpulu si echi òkup me ere isun̄-inu me uwu ogwu ubọọn̄, mè ikpulu si ebi etetbe agam agam me isi akọn̄ isa igbaalek igwu ikom ifo Sameria.

¹⁵Otutuuk ofifi inu òrọrọ me ukot mkpulu kè Jeyowas, mè otutuuk inu îrọbe, mè ikwaan̄ unye îsibe, melek akọn̄ îtimbe me lek kè Amajiya ogwu ubọọn̄ Juda, mîge otutuuk itap me emen ikpa mfufuk echi ebi ubọọn̄ Ijeren.

¹⁶Jeyowas onenikwu ifo igọọk ebi nte nte kan̄, ebeben ifuun̄ me Sameria me ere ekifuun̄ ebi ubọọn̄ Ijeren. Jerobuwam ogwu gwun̄ onenikana ubọọn̄ me irek kan̄.

¹⁷Mgbọ Jeyowas gwun̄ kè Jeyowayaji ogwu ubọọn̄ Ijeren okwube iraka, Amajiya gwun̄ kè Jowas ogwu ubọọn̄ Juda îluk ugwem akọp mè acha go itoon̄ me inyọn̄.

¹⁸Otutuuk ofifi inu òrọrọ me ukot mkpulu kè Amajiya, mîge otutuuk itap me emen ikpa mfufuk echi ebi ubọọn̄ Juda.

¹⁹Enenitọt otitọt mkpa ikeme ọmọ me Jeruselem. Ililibi ifo Lakis. Eraria ebi ene igọọk ọmọ me Lakis, ife cha ekpakpan̄ ọmọ me ere ya.

²⁰Ebeben nkwukwu kan̄ me inyọn̄ inyinya isa ika inu me Jeruselem inifuun̄ me ama kè Debit, me ere efuun̄be ebi nte nte kan̄.

²¹Otutuuk ebi Juda enenisa ogwu gwun̄ Ajariya[5] ito ubọọn̄ me Juda me irek kan̄. Ajariya ìre akọp mè acha gweregwen mgbọ erọbe ọmọ ubọọn̄ me irek kè Amajiya ogwu ute.

²²Îre ọmọ okpọk inama ama Elat, mè ibọkọ ikpọk ikana itap me ido Juda mgbọ Amajiya ogwu ute okwube iraka ifo igọọk ebi nte nte kan̄.

²³Me òso akọp mè acha go me lek mkpulu kè Amajiya gwun̄ kè Jowas ogwu ubọọn̄ Juda, Jerobuwam gwun̄ kè Jeyowas ogwu ubọọn̄ Ijeren onenikana ubọọn̄ me Sameria, mè ikpulu ido Ijeren akọp acha ini mè ge.

²⁴Jerobuwam orọrọ ijo inu me chieen̄ Okumugwem. Ìkatele ijo ugwem yaage Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu.

²⁵Îre ọmọ okpọk ibọkọ okike ijọn̄ ebi Ijeren me ubọk ebi ochicha, ibene me Lebo Amat isi ire okwaan̄ Araba,[6] igọọk me lek ikọ Okumugwem, Awaji ebi Ijeren otumube inan̄a me otu ogwu ikwaan̄ kan̄, Jona gwun̄ kè Amitai, ogwu nriran ònan̄a me Gat Eferi.

²⁶Okumugwem îmun̄ ibe ke ujaralek otutuuk ebi Ijeren ekupbe me emen îmin enenen, mè ìre bọn owot mè ìre ebi usun̄. Kpunu ene geege òkitap ubọk inyi ema.

²⁷Ire, mije, Okumugwem ìkatumu ibe ke ọmọ môtutuku erieen̄ Ijeren isan̄a me irak ura, inenisa me ubọk kè Jerobuwam, gwun̄ kè Jeyowas, inyan̄a ema isibi.

²⁸Otutuuk ofifi inu òrọrọ me ukot mkpulu kè Jerobuwam, mè otutuuk inu îrọbe, mè unye akọn̄ îtimbe, mè ubọk îtimbe akọn̄ ibọkọ Damasikọs melek Amat, ama ebi Juda cha, inyi Ijeren, mîge otutuuk itap me emen ikpa mfufuk echi ebi ubọọn̄ Ijeren.

²⁹Jerobuwam onenikwu ifo igọọk ebi nte nte kan̄, ebi ubọọn̄ Ijeren. Jekaraya ogwu gwun̄ onenikana ubọọn̄ me irek kan̄.