Read obolo II Ubọọn̄ 17 Bible Online

II Ubọọn̄ 17 - obolo bible

II Ubọọn̄ 17

¹Me òso akọp mè acha iba me lek mkpulu kè Ayaji ogwu ubọọn̄ Juda, Osiya gwun̄ kè Ela onenikana ogwu ubọọn̄ Ijeren me Sameria, mè ikpulu ido Ijeren acha onaan̄ge.

²Osiya orọrọ ijo inu me chieen̄ Okumugwem, ire, ìkafieek kubọk echi ebi ubọọn̄ Ijeren ebi ìdadasi ikpulu sabum ọmọ erọbe.

³Me ike mgbọ ge, Salimanesa ogwu ubọọn̄ Asiria onenijibi akọn̄ inu me lek kè Osiya, mè itim ikpan̄ ọmọ. Ebi Ijeren ebebene ikikpe otitip mkpulu inyi Asiria acha geelek.

⁴Ogwu ubọọn̄ Asiria oneniweek iriọọn̄ ibe ke Osiya înween̄ lek iria osat isi lek kè So ogwu ubọọn̄ Ijipiti ikibeek ntap-ubọk, mè ijit ikpekpe otitip mkpulu îkikpe inyi Asiria me acha me acha. Itetet Osiya itap me mkpọn, mè igon ikam.

⁵Ogwu ubọọn̄ Asiria onenijibi akọn̄ inin̄ otutuuk ido Ijeren, mè ikpa mbin akọn̄ ikana Sameria, mè igon ama ya ichit otuuk kè acha ita.

⁶Me òso acha onaan̄ge me lek mkpulu kè Osiya, ogwu ubọọn̄ Asiria obọbọkọ ama Sameria, mè ikpulu otutuuk ebi Ijeren me usun̄ akọn̄ isa isi igwook me Asiria, mè isun̄ ema me ama Ala, mè agan̄ ijọn̄ Gojan me agba lek okwaan̄ Aboru, mè ama ile echi ebi Midia.

⁷Ùrioon̄ yi ìmọnọ irek, mije, ebi Ijeren mîrọ ijo inu me lek Okumugwem Awaji kiban̄ ogwu òsasan̄a ema isibi me Ijipiti, me irak mkpulu ogwu Fero, ogwu ubọọn̄ Ijipiti. Ebi Ijeren mîjit ọmọ, mè isi ikiriaak ebi kè ofifi awaji.

⁸Ema ekirọ orọmijọn̄ ebi ofifi ido cha ebi Okumugwem orieen̄be isan̄a me isi kiban̄, mè ikirọ si ijo inu cha ebi ubọọn̄ ebi Ijeren erọbe.

⁹Me nlelet, ebi Ijeren mînween̄ lek irọ si inu echi Okumugwem Awaji kiban̄ ikamage. Ema mînama isi-ijọn̄ inyi lek kiban̄ me otutuuk ama ile kiban̄, ibene me lek uwu-oket ebi mbem mege isi igwook me lek ama mgban akọn̄ kiban̄.

¹⁰Ema mîgwugwuun̄ ewuuk mfaka mè igwugwuun̄ si uti yọk Asera me inyọn̄ ubene ubene orioon̄ geelek, mè irak uti geelek òsasan otu agọọk.

¹¹Ema mîkiwọp nsensi me otutuuk isi-ijọn̄ cha kubọk ebi ofifi ido cha ebi Okumugwem orieen̄be isan̄a me isi kiban̄ ekirọ, mè ikirọ owuwa ijo inu echi òkinaan̄ Okumugwem ejit.

¹²Ema ekitọbọ ebum inyi mkpọmfaka, ubọk geelek ibe ke Okumugwem îgban ema ibe ekarọ inu òkup ikeya.

¹³Okumugwem îtaba ebi Ijeren mè ebi Juda ubọk me utọn̄ sa me otu otutuuk ebi nriran kan̄, mè ebi kan̄ ìkimọọn̄ inu itibi, ibe: “Ìgwu ìkom ìtele ijo ugwem kinyi, mè ìkirọ ikọ ntọbe melek orọmijọn̄ n̄a ìgọọk me lek otutuuk Ikan echi nnyibe ebi nte nte kinyi, mè echi nnyibe enyi sa me otu ebi nriran, ebi ikwaan̄ n̄a.”

¹⁴Ire, ema ekpọkpọ itet ejit kiban̄ inye kubọk unye-ejit ebi nte kiban̄ ukot ikaan̄, ebi kpetoon̄ ejit me lek Okumugwem Awaji kiban̄.

¹⁵Ema ejijit orọmijọn̄ kan̄, mè ijit inyan̄a-ibot eyi înyan̄abe melek ebi nte nte kiban̄, mè ijit si itataba ubọk me utọn̄ eyi îtababe ema. Ema ekekitọbọ ebum inyi mkpọmfaka ikike, mè inikana si ife ikike, mè ikigọọk irọ orọmijọn̄ ebi ido ìluluk ikana ema cha, ebi Okumugwem onyibe ema ida ibe ekarọ inu ebi ife cha ekirọ.

¹⁶Ema mîtele otutuuk ikọ Okumugwem Awaji kiban̄ otọbe, mè isi itọkọ mkpọmfaka eriembuuk iba inyi lek kiban̄, mè igwuun̄ si uti yọk Asera inyi lek kiban̄, mè ikitọtọbọ ebum inyi otutuuk ntoronyan̄ òkup me akpa isinyọn̄, mè ikisi ikwaan̄ inyi Baali.

¹⁷Ema mîkiwọp bọn ebirieen̄ kiban̄ mè bọn ebibaan̄ kiban̄ me ukan̄ isa ikigwa ngwugwa inyi mkpọmfaka, mè ikido ido-inu, mè ikitet ǹcha. Ema esasa ugwem kiban̄ inyam inyi irọrọ ijo inu me chieen̄ Okumugwem, mè isa me ikeya ikirọ inyi ejit ikinaan̄ Okumugwem.

¹⁸Okumugwem onanaan̄ ejit enenen me lek ebi Ijeren, mè isan̄a ema isan̄a isi ge me isi kan̄. Ebi otoko kè Juda gaalek eyaka inisik.

¹⁹Ire, ebi otoko kè Juda si kpekirọ ikọ Okumugwem Awaji kiban̄ otọbe, ema si ekirọ orọmijọn̄ ebi Ijeren.

²⁰Eya orọ, Okumugwem ojijit otutuuk owot iman kè Ijeren, mè isulu ema osusut, mè iyaka ema itap me ubọk ebi m̀fum, mè itutuku ema abayaage ire mgbọ îrieen̄be ema isibi me isi kan̄.

²¹Mgbọ Okumugwem ofelebe ebi Ijeren isan̄a me lek ebi uwu kè Debit, enenisa Jerobuwam gwun̄ kè Nebat ito ubọọn̄ me Ijeren. Jerobuwam osasa ebi Ijeren ije inan̄a me lek Okumugwem, mè irọ inyi ema erọ ijo inu òmimin enenen.

²²Ebi Ijeren etetet lek inye ikirọ otutuuk ijo inu kè Jerobuwam, kpegwu ikom itele,

²³mege Okumugwem orieen̄be ema isan̄a me isi kan̄, kubọk îtumube sa me otu otutuuk ebi ikwaan̄ kan̄ ebi nriran. Îre mije keyi ke ekpulu ebi Ijeren me usun̄ akọn̄ isan̄a me inyọn̄ ijọn̄ kiban̄ isa isi igwook me Asiria mege inire cherekeyi.

²⁴Ogwu ubọọn̄ Asiria onenikpulu ebi ene inan̄a me ama Babilọn, mè Kuta, mè Afa, mè Amat, mè Sefarifayim isa inigwook me Sameria melek otutuuk ama ebi Sameria me useen̄ ebi Ijeren ebikaan̄ ama cha. Ikeyi ke ebi Asiria enibọkọ Sameria mè otutuuk ama ebi Ijeren geelek isa irọ echi kiban̄.

²⁵Mgbọ ebi ife cha ebenebe ikiluk me ere ya, ema kpekitọbọ ebum inyi Okumugwem. Eya orọ, Okumugwem oneniria ebi kè egbe àtat itaak me etete kiban̄. Egbe àtat cha okpakpan̄ usini ene me lek kiban̄.

²⁶Etip osisi ilook ogwu ubọọn̄ Asiria ibe, “Kpọ, ebi owu okpulube inan̄a me ofifi ido isi igwook me ama ebi Sameria cha me useen̄ ebikaan̄ ama kperiọọn̄ inu awaji ijọn̄ ama cha okiweek. Eya orọ, îria ebi kè egbe àtat itaak me etete kiban̄. Kpọ, egbe àtat mônikpan̄ ife cha isan̄a, mije, kperiọọn̄ orọmijọn̄ awaji ijọn̄ ama ya!”

²⁷Ogwu ubọọn̄ Asiria oneninyi ida ibe: “Ìria ene ge me lek ebi ngwugwa cha ekpulube me akọn̄ me ere ya, inyi igwu ikom isi Sameria isi iluk, mè ikijeen̄ ife cha inu awaji ijọn̄ ama ya okiweek.”

²⁸Ene ge me etete ebi nriran cha etetbe me akọn̄ me Sameria okaka inu iniluk me Beten, mè ikijeen̄ ebi ife cha ubọk ekitọbọ ebum inyi Okumugwem.

²⁹Ubọk geelek si, ife cha, kpa ido kpa ido, erọrọ awaji kiban̄ me ama geelek ema elukbe, mè iyiyik awaji kiban̄ cha me isi-ijọn̄ ebi Sameria egwugwuun̄be me ama cha.

³⁰Ebi Babilọn mîrọ awaji kiban̄ òrere Sukot Benot, ebi Kut erọrọ Nerigan kiban̄, ebi Amat erọrọ Asima,

³¹ebi Afa erọrọ Nibiyaji mè Taritak, ebi Sefarifayim ekekiwọp bọn kiban̄ me ukan̄ isa ikigwa ngwugwa inyi ebi kè awaji kiban̄ Adaramelek mè Anamelek.

³²Ife cha ekekitọbọ ebum inyi Okumugwem. Ire, ema esasan̄a si ebi ene me etete kiban̄, me ido me ido, isa ito kubọk ebi ngwugwa ìkikpọ chieen̄ me lek isi-ijọn̄ kiban̄. Ebi ngwugwa chi ekekigwa ngwugwa inyi ema me isi-ijọn̄ kiban̄ cha.

³³Ema ekekitọbọ ebum inyi Okumugwem, ire, mè ikitọbọ si inyi mkpọmfaka kiban̄ igọọk me lek orọmijọn̄ ido ere ema enan̄abe.

³⁴Mege inire chereyi ema etetet oka orọmijọn̄ kiban̄ cha inye. Kpekitọbọ ebum inyi Okumugwem ijaan̄, kpekisusun̄ si orọmijọn̄ kan̄, mè ikan ido kan̄, mè ikan kan̄, mè otutuuk ikọ îtọbe inyi bọn kè Jekọp, ogwu îgwenbe si Ijeren.

³⁵Mgbọ Okumugwem onyan̄abe ibot inyi ebi Ijeren, ìtataba ema ubọk me utọn̄ ibe: “Ikatọbọ ebum ìnyi ebi kè ofifi awaji geege, ikatọbọ ibot me ijọn̄ ìnyi ema, ikasi ikwaan̄ ìnyi ema, ikagwagwa si ngwugwa ìnyi ema.

³⁶Okumugwem, ogwu òsasa me unye ubọk melek ikpele unye isan̄a enyi isibi me Ijipiti, îre ọmọ ke enyi ebekitọbọ ebum inyi, ọmọ si ke enyi ebekigwa ngwugwa inyi.

³⁷Orọmijọn̄ kan̄, mè ikan ido kan̄, mè ikan kan̄, mè otutuuk ikọ îtọbe, mè ige isun̄ inyi enyi, echicha ke enyi ebekisun̄, mè ikirọ usen geelek. Ikatọbọ ebum ìnyi ofifi awaji geege.

³⁸Ikawuuk inyan̄a-ibot nnyan̄abe melek kinyi, ikatọbọ ebum ìnyi ofifi awaji geege.

³⁹Kpan̄asi ikeya, Okumugwem Awaji kinyi gaalek ke enyi ebekitọbọ ebum inyi, ọmọ si obonyan̄a enyi isibi me ubọk otutuuk ebi ochicha kinyi.”

⁴⁰Ire, ema kpegban̄ utọn̄. Kpan̄asi ikeya, ema etetet lek inye ikirọ oka orọmijọn̄ kiban̄ cha.

⁴¹Ire, ebi ichen chi ekekitọbọ ebum inyi Okumugwem, mè ikiriaak si mkpọmfaka kiban̄ cha. Bọn kiban̄ mè bọn bọn kiban̄ ekekirọ si inu yaage ebi nte nte kiban̄ erọbe mege inire cherekeyi.