Read obolo II Ubọọn̄ 18 Bible Online

II Ubọọn̄ 18 - obolo bible

II Ubọọn̄ 18

¹Me òso acha ita me lek mkpulu kè Osiya gwun̄ kè Ela ogwu ubọọn̄ Ijeren, Ejikaya gwun̄ kè Ayaji onenikana ogwu ubọọn̄ Juda.

²Ejikaya ìre akọp acha iba mè go mgbọ îkanabe ogwu ubọọn̄, mè ikup me Jeruselem ikpulu akọp acha iba mè onaan̄ge. Erieen̄ ogwu uga ìre Abija, gwun̄ kè Jekaraya.

³Ejikaya îrọ inu òtatat me chieen̄ Okumugwem, kubọk Debit ogwu ute ukot ikaan̄ orọbe.

⁴Îgwak otutuuk isi-ijọn̄ cha, mè ibak otutuuk ewuuk mbuban, mè isọp uti yọk Asera igwook. Ijijinu ya eyi Mosis osabe ekwe irom me emen èwê, ìsọsọp ikpukpuku, mije, ebi Ijeren ekiwọwọp si nsensi inyi ijijinu ya mege inire ike mgbọ ya, mè inyi erieen̄, Neyusitan.[9]

⁵Ejikaya îtoon̄ ejit me lek Okumugwem, Awaji ebi Ijeren. Me etete otutuuk ebi ubọọn̄ Juda ebi ìwuwuuk lek ikpulu me isi kan̄, mè ebi ìnikpulu me mgburudun̄, kpunu ogwu òbet lek kan̄.

⁶Ìtataba lek iriaak me lek Okumugwem, ìkatele igọgọọk ọmọ mgbọ geege, ìkatele si irọrọ ikọ Okumugwem otọbe inyi Mosis ibe ekerọ.

⁷Okumugwem okekeke melek kan̄, inu geelek îchakbe ubọk me lek irọ okekije ijaan̄. Ejikaya okpakpaka ibot inyi ogwu ubọọn̄ Asiria, ìkayaka ìsiki ibot ìnyi.

⁸Ejikaya onenitim akọn̄ ikpan̄ ebi Filisia isi igwook me Gaja mè otutuuk okike ijọn̄ kiban̄, ibene me lek uwu-oket ebi mbem isi ire lek ama mgban akọn̄ kiban̄.

⁹Me òso acha ini me lek mkpulu ogwu ubọọn̄ Ejikaya, òrere òso acha jaaba me lek mkpulu kè Osiya gwun̄ kè Ela ogwu ubọọn̄ Ijeren, mgbọ ya ke Salimanesa ogwu ubọọn̄ Asiria ojibi akọn̄ isi ama Sameria, mè ikpa mbin akọn̄ ikana.

¹⁰Me òta usen me òso acha ita me lek akọn̄ ya, ebi Asiria ebọbọkọ ama Sameria. Acha ya ore òso acha gweregwen me lek mkpulu kè Ejikaya ogwu ubọọn̄ Juda, mè ire òso acha onaan̄ge me lek mkpulu kè Osiya ogwu ubọọn̄ Ijeren.

¹¹Ikeya ke ogwu ubọọn̄ Asiria onikpulu ebi Ijeren me usun̄ akọn̄ isa ifo Asiria, mè isun̄ ema me ama Ala, mè agan̄ ijọn̄ Gojan me agba lek okwaan̄ Aboru, mè ama ile echi ebi Midia.

¹²Inu yi ìrọ ikeyi, mije, ebi Ijeren kpeyaka ikigban̄ utọn̄ inyi Okumugwem, Awaji kiban̄. Ema mîkpaka ibot me lek inyan̄a-ibot kan̄. Otutuuk inu Mosis ogwu ikwaan̄ Okumugwem onyibe ida ibe ema erọ, ema kpegban̄ utọn̄ me lek, kpekirọrọ si.

¹³Me òso akọp mè acha ini me lek mkpulu ogwu ubọọn̄ Ejikaya, Senakerip ogwu ubọọn̄ Asiria onenijibi akọn̄ isi itim me lek otutuuk ama ile ebi Juda ewakbe mgban akọn̄ ikana, mè ibọkọ otutuuk ama cha.

¹⁴Ejikaya, ogwu ubọọn̄ Juda oneniria etip ijet ogwu ubọọn̄ Asiria me Lakis ibe: “Nrọ owu ilọ. Nye lek kpulu ebi akọn̄ kwun̄ gwu kom san̄a emi me lek, ke mâkpe owu inu geelek odobe.” Ogwu ubọọn̄ Asiria onenifieek akọp obop kilo alata okuket mè obop kilo alata araran̄ inyi Ejikaya ogwu ubọọn̄ Juda ibe ikpe inyi ọmọ.

¹⁵Ejikaya okpukpulu alata okuket òkukup me emen Uwu Mbuban Okumugwem mè echi òkup me ere isun̄-inu me uwu ogwu ubọọn̄, mè isa ikpe inyi.

¹⁶Me mgbọ ya, Ejikaya ogwu ubọọn̄ Juda îkama si otutuuk alata araran̄ echi ọmọ me lek kan̄ osabe ichọkọ ichit otutuuk afọn̄, mè otutuuk ubọk afọn̄ òkup me lek Uwu Mbuban Okumugwem, mè isa igbaalek ikpe inyi ogwu ubọọn̄ Asiria.

¹⁷Ogwu ubọọn̄ Asiria oneniria ogwu otu uji akọn̄ kan̄, mè ogwu ibot ebi ibot akọn̄ kan̄, mè ogwu ibot isi akọn̄ kan̄, melek ikpele urum akọn̄, inan̄a me Lakis, isi lek ogwu ubọọn̄ Ejikaya me Jeruselem. Ebi ife cha enenire Jeruselem, mè ikeke me lek okolo agbugbuk ebumbe me lek òkpuku mun̄ agan̄ inyọn̄, eyi òkup me lek oniin̄ ekije isi ere ekigwọk ofọnti.

¹⁸Ema enenikup me ere ya iria etip igwen Ejikaya ogwu ubọọn̄. Eliakim gwun̄ kè Ilikiya, òrere ogwu ibot ikwaan̄ me uwu ogwu ubọọn̄, mè Sebina ogwu uti ikpa, melek Jowa gwun̄ kè Asafu ogwu òkige mfufuk, esisibi isi ichichini ema.

¹⁹Ogwu ibot isi akọn̄ ya onenitumu inyi ema ibe, “Ìsi ìtumu ìnyi Ejikaya ibe ikeyi: “ ‘Ogwu ubọọn̄ ilile ya, ogwu ubọọn̄ Asiria, ìkido owu ibe ikeyi: Keke ke owu osa itoon̄ ejit, mè ikinye ejit ikeyi?

²⁰Ìre òkikeek ibe ke ifuk-ibot akọn̄ mè unye isasa itim akọn̄ ìre ukpọk ukpọk ikọ otu ikike. Ìre ekene ke obieen̄ ejit me lek, eyi owu okikpaka ibot inyi emi?

²¹Kpọ, òkibieen̄ ejit me lek ebi Ijipiti, mkpat òyiyip òbubum ya, eyi ogwu ibieen̄ ubọk me lek, òchim ene akajit ubọk otap unan. Ikeya ke Fero ogwu ubọọn̄ Ijipiti okup me lek ebi geelek ìbebieen̄ ọmọ lek me lek.

²²Ire otumu inyi emi ibe, “Eji etoon̄ ejit me lek Okumugwem Awaji kiji,” ìre ìkare isi-ijọn̄ kan̄ mè ntook kan̄ ke owu Ejikaya ogbugbọ igwook, mè ibe ebi Juda mè ebi Jeruselem, “Îre isi ntook keyi ke enyi ebekitọbọ ebum me Jeruselem”?

²³“ ‘Mgbọ yi, na gọọk nte uwu n̄a, ogwu ubọọn̄ Asiria, fieek ubọk nu, mè ǹnyi owu obop inyinya iba, mè ekpọ-nu mè ìre owu môkọt ikaan̄ ene iso ebi ìbekọp inyinya cha.

²⁴Ire owu òkakọt ìrọ sọntiik inu òkup ikeya, owu òbojeje ikọt irieen̄ ogwu ibot akọn̄ ge me etete ebi ìsisip ichit me lek ebi ibot akọn̄ ogwu nte uwu n̄a ikpebe, ubọk geelek ibe ke owu òtoon̄ ejit ibe ke ogwu ubọọn̄ Ijipiti mônyi owu owuwa uji akọn̄ mè ebi ìkikọp?

²⁵Isan̄a me ikeya, ìre owu òkikeek ibe ke ǹnu inenijijaka ido yi, me Okumugwem ikariọọn̄ge? Îre Okumugwem me lek kan̄ obe emi ǹjibi akọn̄ ǹnu me lek ido yi, mè ǹjijaka ǹgwook.’ ”

²⁶Eliakim gwun̄ kè Ilikiya, mè Sebina mè Jowa enenitumu inyi ogwu ibot isi akọn̄ ya ibe, “Soso, sa usem Aram tumu ikọ nyi eji ebi ikwaan̄ kwun̄, mije, eji mîkinọ usem keya. Kayaka ìsa usem Iburu ìtumu ikọ melek kiji, mije, ebi ìkup me inyọn̄ mgban yi mêkinọ inu okitumu.”

²⁷Ire, ogwu ibot isi akọn̄ ya ofọfọọk ibe, “Ìre nte uwu kinyi melek kinyi gaalek ke nte uwu n̄a oria emi ibe ǹnentumu ikọ chi ǹnyi? Ìre ìkare si ebi ìkup me inyọn̄ mgban yi, ebi ìberie si ifin kiban̄ mè inwọ anaan̄ kiban̄ kubọk enyi eberie mè inwọ echi kinyi, ke îbe emi ǹtumu ǹnyi m̀gbaalek?”

²⁸Ogwu otu uji akọn̄ ya onanan̄a ikeke, mè isa usem Iburu itaan̄ ukpo itumu ibe, “Ìgban̄ ikọ ogwu ubọọn̄ ilile ya, ogwu ubọọn̄ Asiria otumube!

²⁹Ogwu ubọọn̄ ya ìtumu ibe ikeyi: Ikachieek ibe Ejikaya ifiaan̄ enyi ifiin̄. Ejikaya ìkpokọt inyan̄a enyi isibi me ubọk n̄a!

³⁰Ikachieek ibe Ejikaya irọ ibe enyi etoon̄ ejit me lek Okumugwem, mè itumu inyi enyi ibe, ‘Okumugwem ìkpolọlọ inyanyan̄a eji. Ama keyi ìkponin̄ me ubọk ogwu ubọọn̄ Asiria.’

³¹“Ikagban̄ utọn̄ me lek kè Ejikaya. Ogwu ubọọn̄ Asiria ìtumu ibe ikeyi: Ìrọ mgbaan̄-nchieek melek n̄a, mè ìsibi ìna me lek n̄a, ke enyi ene geelek môrie mfut uti gerep kan̄ mè mfut uti figi kan̄, mè inwọ mun̄ ònan̄a me emen udọn̄ mun̄ kan̄,

³²mege ire mgbọ mânube inisak enyi ifo lek ijọn̄ òbet lek ijọn̄ kinyi, ijọn̄ akpa mè aya miin̄, ijọn̄ inorie mè uko gerep, inyi enyi egat ugwem, mè ekakwaan̄ ìta. “Ikagban̄ utọn̄ ìnyi Ejikaya, mije, eyi îkitumu ibe, ‘Okumugwem mônyan̄a eji isibi,’ ìkisasa enyi ije ilọ oniin̄.

³³Ǹdo enyi nu, ìre îkaan̄ awaji ebi ido ge òrarak inyan̄a ebi ido kan̄ isibi me ubọk ogwu ubọọn̄ Asiria?

³⁴Mọmọ awaji ebi Amat mè echi ebi Aripadi cha? Mọmọ awaji ebi ama Sefarifayim mè echi ama Ena mè echi ama Ifa? Ìre awaji kecha îkọt inyan̄a ebi Sameria isibi me ubọk n̄a?

³⁵Ìre awaji eyi owa me lek otutuuk awaji ebi ido chi okọt inyan̄a ido kan̄ isibi emi me ubọk? Enyi ejeje ikikeek ibe ke Okumugwem môkọt inyan̄a Jeruselem isibi emi me ubọk?”

³⁶Ire, ema, ebi îkitumu ikọ cha inyi, ekpọkpọ iriaan̄ otu, kpefọọk ọmọ ikọ geege, mije, ogwu ubọọn̄ Ejikaya înyi ema ida ibe ekabọkọ ọmọ otu geege.

³⁷Mgbọ ya, Eliakim gwun̄ kè Ilikiya òrere ogwu ibot ikwaan̄ me uwu ogwu ubọọn̄, mè Sebina ogwu uti ikpa melek kè Jowa gwun̄ kè Asafu ogwu òkige mfufuk, egwagwak ofọnti me lek kiban̄, mè isi ikpa inu ogwu ibot isi akọn̄ ya otumube inyi Ejikaya.