Read obolo II Ubọọn̄ 19 Bible Online

II Ubọọn̄ 19 - obolo bible

II Ubọọn̄ 19

¹Mgbọ ogwu ubọọn̄ Ejikaya onọbe ikọ yi, itataba ofọnti òkup ọmọ me lek igwak, mè isa ekwut ufieejit ichit lek, mè ije isi Uwu Mbuban Okumugwem.

²Iraria Eliakim ogwu ibot ikwaan̄ uwu kan̄, mè Sebina ogwu uti ikpa mè ebi ugane me lek ebi ngwugwa isi lek ogwu nriran Asaya gwun̄ kè Amọs. Otutuuk kiban̄ cha etap ofọnti ufieejit.

³Ife cha esisi itumu inyi Asaya ibe, “Ejikaya ìbe ke cherekeyi ìre usen ufialek mè usen itọ ubọk me isi mè usen esip. Eji ekup kubọk nwa-owot uman okitet òboman gwun̄, gwun̄ osasan̄a lek kan̄ isibi, ire, ogwu uga ìkayaka ìkaan̄ efuuk isasa ibieen̄ gwun̄ isibi.

⁴Usini mgbọ Okumugwem Awaji kwun̄ mônọ ikọ ogwu ibot isi akọn̄ ya, ogwu ogwu ubọọn̄ Asiria, òre ogwu ute-uwu, oriabe ibe inirọ Awaji òkup me ugwem ochak. Usini mgbọ, Okumugwem Awaji kwun̄ môkan̄ inu inyi ene ya, mije ikọ cha ọmọ Okumugwem onọbe. Eya orọ, riaak uriaak me ibot ebi kiji ìsisik.”

⁵Mgbọ ebi ikwaan̄ ogwu ubọọn̄ Ejikaya enube me lek ke Asaya,

⁶Asaya onenibe ema esi etumu enyi nte uwu kiban̄ ibe, “Okumugwem ìtumu ibe ikeyi: Katet ukpook me lek ikọ ya onọbe, ikọ unyechieen̄ ebi ikwaan̄ ogwu ubọọn̄ Asiria etumube inyi emi.

⁷Kpọ, mâtap ọmọ erumun̄ ge me emen, inyi, ọmọ isinọ ijo etip ofolek ido kan̄, môgwugwu ikom ifo. Emi mânenirọ ibe esa oge akọn̄ echo ọmọ efiin̄ me ido kan̄.”

⁸Mgbọ ogwu ibot isi akọn̄ ya onọbe ibe ke ogwu ubọọn̄ Asiria înan̄a me Lakis, igwugwu ikom, mè isi imun̄ ogwu ubọọn̄ ya okitim akọn̄ me Libina.

⁹Mgbọ ya, Senakerip onenibọkọ etip ibe ke Tiraka ogwu ubọọn̄ Etiopia òkinu ọmọ akọn̄ me lek. Inenikpọk iria osat ijet Ejikaya ibe,

¹⁰“Ìtumu ìnyi Ejikaya ogwu ubọọn̄ Juda ibe: Kachieek ibe awaji kwun̄ ya ogwu owu otoon̄be ejit me lek ifiaan̄ owu ibe ke Jeruselem ìkponin̄ me ubọk ogwu ubọọn̄ Asiria!

¹¹Me atikọ, owu ora inọ inu ebi ubọọn̄ Asiria erọbe otutuuk ido geelek, ibe ke ejijijaka otutuuk ido cha geelek igwook. Ìre owu ke ebeninyan̄a isibi ni?

¹²Ìre awaji ebi ido Gojan, mè Aran, mè Rejefu, mè eyi ebi Iden ebi ìkup me Teli Asa, òrere ido echi ebi nte nte n̄a ejijakabe isan̄a, mîkọt inyan̄a ebi kiban̄ isibi?

¹³Ogwu ubọọn̄ ebi Amat ìkup me owa? Sà ogwu ubọọn̄ ebi Aripadi ye? Mọmọ ebi ubọọn̄ ama Sefarifayim mè ama Ena mè ama Ifa?”

¹⁴Ejikaya obọbọkọ ikpa ya me ubọk ebi osat cha, mè ifuk, mè isa ije isi Uwu Mbuban Okumugwem, mè iben iwele me isi Okumugwem,

¹⁵mè iriaak uriaak inyi Okumugwem ibe, “Jei Okumugwem Ogwukaan̄ Inyọn̄ mè Ijọn̄, Awaji ebi Ijeren, ogwu òkup me inyọn̄ ogboon̄ ubọọn̄ me etete ebi mbem emen inyọn̄, owu gaalek ore Awaji òkup me ibot mkpulu otutuuk ido geelek me linyọn̄. Owu orom inyọn̄ mè ijọn̄.

¹⁶Jei Okumugwem, gban̄ utọn̄, mè nọ! Jei Okumugwem, chili chieen̄ kwun̄, mè mun̄! Gban̄ otutuuk ikọ Senakerip oriabe inu isa irọ Awaji òkup me ugwem ochak.

¹⁷“Jei Okumugwem, me atikọ, ebi ubọọn̄ ebi Asiria mîjijaka owuwa ido isan̄a, mè ijijaka si ijọn̄ ebi ido cha geelek igbaalek.

¹⁸Ema mîtọọn̄ awaji ebi ife cha itaak me ukan̄, mè ijijaka awaji cha isan̄a, mije, inu cha kpere awaji. Ema ìre gaalek uti mè ewuuk, inu ebilene esabe ubọk kiban̄ irom.

¹⁹Mgbọ yi, jei Okumugwem Awaji kiji, nyan̄a eji sibi me ubọk kan̄, inyi otutuuk ido ebi linyọn̄ eriọọn̄ ibe ke îre owu Okumugwem gaalek ore Awaji.”

²⁰Asaya gwun̄ kè Amọs oneniria etip ijet Ejikaya ibe, “Okumugwem, Awaji ebi Ijeren ìtumu ibe ikeyi: Nra inọ uriaak owu oriaakbe ofolek kè Senakerip ogwu ubọọn̄ Asiria.

²¹Ikọ Okumugwem otumube ikeme ọmọ ìre ikeyi: “ ‘Ujuja ama Sayọn môkpọ owu chieen̄ isiki, mè ichak owu me imọm; ama Jeruselem môkitọp ibot kan̄ mgbọ owu môkilibi inan̄a.

²²Ìre ekene ke osọ otu inyi, mè itumu ifiat? Sà ìre ekene ke otumu ikọ ibene ida inyi, mè ibene chieen̄ kwun̄ ikpọ me ugumulek? Îre Ogwu Mbuban ebi Ijeren ke orọ inu cha inyi!

²³Sa me otu ebi ikwaan̄ kwun̄, owu osọ otu inyi Ogwukaan̄-ene; mè itumu ibe, “Sa me owuwa uji akọn̄ n̄a, emi nnene ire òta ibot ogoon̄ òbebene, òta ibot ogoon̄ Lebanọn. Nchon uti olik kan̄ echi òbebene ichit, mè uti siperes kan̄ echi òjajaan̄ lek ichit. Nre ere òbebene ichit me okputut ijọn̄ kan̄, mè lek oron kan̄ agan̄ òjajaan̄ ichit.

²⁴Nrọkọ udọn̄ mun̄ me ido ebi ofifi ife, mè inwọ mun̄ ebi agan̄ ya. Nsa akajit ukot n̄a ijak mun̄ me otutuuk okwaan̄ ebi Ijipiti ichiaak ita kpai.”

²⁵“ ‘Ìre owu òkanọnọ? Ǹdọdọmọ isan̄a karake akat. Ǹtọtọt itele me ujọn̄ọ ujọn̄ọ mgbọ; mgbọ keyi ke nrọ ibe irọ iso. Ǹtọt ibe ke owu môrọ ibe owuwa ama mgban akọn̄ ikana èdọ ewuuk.

²⁶Ebi ama cha kpeyaka ikaan̄ unye geege, owot îfieek ema, esip si ogagak ema isi. Ema ekup kubọk asabọn uti òkup me oron, mè ikup si kubọk nsek otu inwan̄; kubọk mbubet òkitibi me inyọn̄ otoon̄-uwu, echi uyok efet ochiaakbe ikpan̄ sabum îbotibi isibi.

²⁷“ ‘Ire, emi nriọọn̄ ere owu okikup, mè iriọọn̄ mgbọ okinan̄a isibi, mè mgbọ okika inu, mè iriọọn̄ si ubọk owu okirọ inu afa afa ikeme emi.

²⁸Mije owu okirọ inu afa afa me lek n̄a, mè mije ugumulek kwun̄ òrere emi utọn̄, emi mâsa ukọọk n̄a igọbọ owu me otu inwọm, mè isa mgbidim okwukwut n̄a ikwuk irieen̄ owu me otu, mè irọ inyi owu ògwu òkom òfo me lek oniin̄ yaage ojebe inu.’

²⁹“Eyiyi môre inu ijejeen̄ inyi owu, Ejikaya: “Acha keyi, enyi mêrie inu echi òkup me lek kiban̄ itibi; òso acha iba, inu echi ònan̄a me lek eyi adasi acha ke enyi eberie. Me òso acha ita, ìwop mfut, mè irọkọ, ìwop uko gerep, mè ìrie mfut ònan̄a me lek.

³⁰Ebi uwu kè Juda ebi ìsisik mêkpọk itibi ugwun̄-ijọn̄ me inyọn̄ ijọn̄ kiban̄, mè ito mfut, mè imumana.

³¹Mije, ebi ìsisik mênan̄a me Jeruselem isibi inu, ebi ìnwọnwọnọ akọn̄ mênan̄a me ogoon̄ Sayọn isibi inu. Îre sa me ikpele ulọk Okumugwem Ogwukaan̄ Inyọn̄ mè Ijọn̄ ke inu yi oborọ.

³²“Eya orọ, inu Okumugwem otumube ofolek ogwu ubọọn̄ Asiria ìre ikeyi: “Ọmọ ìkponin̄ ama keyi; ìkpososook si otu oraan̄ ge ikeyi me ama yi. Ìkpoben agbọ kan̄ isa ije ikweek ama yi; ìkponama obubot mbin akọn̄ ichak me lek mgban ama yi.

³³Oniin̄ îjebe inu ke ìboje si ifo; ire ama keyi, ìkponin̄. Emi Okumugwem ntumu.

³⁴Emi mâkwek ama yi, mè inyan̄a isibi, mije n̄a mè mije kè Debit ogwu ikwaan̄ n̄a.”

³⁵Me eririeen̄ ya, ogwu osat Okumugwem osisibi isi orieen̄ akọn̄ ebi Asiria, mè ikpan̄ efit mè akọp obop ene jeeta mè obop go. Mgbọ ebi ene ebolobe chieen̄ me ewelegwe, eyaka inimun̄ nkwukwu ene nkwukwu ene olilambe ijot ijọn̄.

³⁶Eya orọ, Senakerip ogwu ubọọn̄ Asiria ojijibi orieen̄ akọn̄ kan̄, mè igwu ikom ije ifo Ninife ama kan̄, mè ibia me ere ya.

³⁷Usen ge, mgbọ îkitọbọ ebum me emen uwu awaji kan̄ ekigwen Nisirọk, bọn ebirieen̄ kan̄, Adaramelek melek Sareja esasa oge akọn̄ ikep ọmọ ikpan̄, mè ilibi ifon ido ebi Ararat. Esaradọn ogwu gwun̄ onenikana ubọọn̄ me irek kan̄.