Read obolo II Ubọọn̄ 2 Bible Online

II Ubọọn̄ 2 - obolo bible

II Ubọọn̄ 2

¹Inenikem mgbọ Okumugwem obonisa ogbolodom imọnọ Ilaija isa ifo emen inyọn̄, Ilaija mè Ilaisia enanan̄a me Giligan ikije me lek oniin̄.

²Ilaija onenibe Ilaisia, “Kup me ere keyi, ke Okumugwem ìbe emi ǹsi Beten.” Ire, Ilaisia otutumu inyi Ilaija ibe, “Kè lek ugwem Okumugwem, mè kè lek kwun̄, emi m̀kpatele owu.” Mije keya, ema ene iba enenigbaan̄ ije isi Beten.

³Otu ogbo ebi nriran ìluk me Beten enanan̄a isibi inu me lek kè Ilaisia, mè inido ibe, “Ìre owu oriọọn̄ ibe ke Okumugwem ìbomọnọ nte uwu kwun̄ isan̄a me lek kwun̄ cherekeyi?” Ilaisia ofọfọọk ema ibe, “Iin̄, nriọọn̄. Ire, ikayaka ìsan̄a amọn ofolek.”

⁴Ilaija onenitumu inyi ọmọ ibe, “Ilaisia, kup me ere keyi, ke Okumugwem ìbe emi ǹsi Jeriko.” Ilaisia ofọfọọk ibe, “Kè lek ugwem Okumugwem, mè kè lek kwun̄, emi m̀kpatele owu.” Mije keya, ema ene iba enenigbaan̄ ije isi Jeriko.

⁵Otu ogbo ebi nriran ìluk me Jeriko enanan̄a isibi inu me lek kè Ilaisia, mè inido ibe, “Ìre owu oriọọn̄ ibe ke Okumugwem ìbomọnọ nte uwu kwun̄ isan̄a me lek kwun̄ cherekeyi?” Ilaisia ofọfọọk ema ibe, “Iin̄, nriọọn̄. Ire, ikayaka ìsan̄a amọn ofolek.”

⁶Ilaija onenitumu inyi ọmọ ibe, “Ilaisia, kup me ere keyi, ke Okumugwem ìbe emi ǹsi agba okwaan̄ Jodan.” Ilaisia ofọfọọk ibe, “Kè lek ugwem Okumugwem, mè kè lek kwun̄, emi m̀kpatele owu.” Mije keya, ema ene iba enenikigbaan̄ ije inyi isi.

⁷Akọp ebi nriran go ebi otu ogbo ebi nriran ìkiluk me agan̄ ya enenikije igọọk ema me udun̄, mè iyaka ikeke. Ire, kpeje igbet ema lek. Ema ene iba si ejeje ire agba okwaan̄ Jodan, mè ikeke.

⁸Ilaija oneniwọọk ofọnti inyọn̄ kan̄, mè itet ikat, mè isa isulu mun̄ okwaan̄ ya. Mun̄ okwaan̄ ya otọtọbọ ibum iba, inyi ulom mè ujit. Ema ene iba ejeje isaba okwaan̄ ya me nchat ijọn̄.

⁹Ema isasaba okwaan̄ itoon̄, Ilaija onenibe Ilaisia, “Tumu-nu, ìre keke ke oweek ibe emi ǹrọ ǹnyi owu sabum mênimọnọ emi isan̄a itele owu?” Ilaisia ofọfọọk ibe, “Nyi emi uche ekwukwu òkup owu me emen irek iba.”

¹⁰Ilaija obebe ọmọ, “Owu odo inu òyọyọt. Ubọk geelek, ire omun̄ emi mgbọ ekimọnọ emi isan̄a me lek kwun̄, owu môkaan̄ inu ya odobe. Ilọ ikeya, owu òkpokaan̄.”

¹¹Ike ema ene iba ekije, mè ikikpa ukpatu, me ekakpọge chieen̄, uji akọn̄ òkisak kubọk ukan̄ melek ebi kè inyinya ìkisak kubọk ukan̄ okakana isibi, mè iche ema ene iba, ge isan̄a me lek ge, efet ogbolodom obeben Ilaija mgbọ yaage ibene ifo emen inyọn̄.

¹²Ilaisia omumun̄ inu ya, mè itaan̄ ukpo ibe, “Nte n̄a! Nte n̄a! Jei, uji akọn̄ Ijeren mè ebi ìkikọkọp!” Ilaisia ìkayaka ìmun̄ Ilaija ofifi. Itetet ofọnti òkup ọmọ me lek itaba igwak okpọkọ iba.

¹³Mgbọ inu ya orọbe, ofọnti inyọn̄ kè Ilaija înan̄a me lek kè Ilaija irọn̄ me ijọn̄. Ilaisia omọmọnọ ofọnti inyọn̄ kè Ilaija ya, mè isa ikaan̄ me ubọk igwu ikom ije isi ikeke me agba okwaan̄ Jodan.

¹⁴Ilaisia onenimọnọ ofọnti inyọn̄ kè Ilaija ya ònanan̄a me lek kè Ilaija irọn̄ isa isulu mun̄ okwaan̄ Jodan ya kubọk mgbọ Ilaija osulube, mè itumu ibe, “Mọmọ Okumugwem, Awaji kè Ilaija ya?” Mgbọ îsulube mun̄ okwaan̄ ya, mun̄ ya otọtọbọ ibum iba, inyi agan̄ ulom mè agan̄ ujit. Ọmọ ojeje isaba.

¹⁵Ebi otu ogbo ebi nriran ìkiluk me Jeriko cha, ebi ìkeke me ujọn̄ọ ere ikikpọ inu cha òkirọ, ekekibe, “Ekwukwu kè Ilaija înin̄ emen kè Ilaisia.” Ema enenije ikweek ọmọ, mè inigele igwook me ijọn̄ inyi ọmọ,

¹⁶mè itumu inyi ọmọ ibe, “Kpọ, eji ebi usun̄ kwun̄, eji mîkaan̄ akọp ebirieen̄ go lek onyebe me ere keyi melek kiji. Usini mgbọ, Ekwukwu Okumugwem îra iben nte uwu kwun̄ isi iyik me inyọn̄ ogoon̄ ge, mè ìre me agbagba iteke ge. Tele mè eji eria ene ibe eje esibi esi eweek.” Ilaisia obebe ema, “In̄-in̄, ikaria ene geege.”

¹⁷Ire, ebi nriran cha ekpọkpọ itet lek inye ikibeek mege esip otetet Ilaisia. Inenibe ema, “Ngwa, ìria ma.” Ema eneniria akọp ebirieen̄ go isibi ibe esi eweek. Ife cha esisi iweek Ilaija otuuk kè usen ita, kpemun̄.

¹⁸Ema ekaka inu me lek kè Ilaisia me Jeriko ere îkupbe. Ibebe ema, “Ìre ǹkafat ìtumu ibe enyi ekasi?”

¹⁹Usen ge, ebi ibot ama ile Jeriko enenisi itumu inyi Ilaisia ibe, “Ogwu nte uwu kiji, ike owu omun̄be, ama yi ìre ama òkup me ata ere. Ire, mun̄ òkup me ama yi îfieek enenen, ijọn̄ si ìkakisibi inu.”

²⁰Ilaisia onenibe ema, “Ìsa ayaya okwa ge ìjet emi, mè ìtap uchi me emen.” Esasa inu.

²¹Ilaisia onenibọkọ isa ije isi ibot ogbuuruk, mè itọp uchi ya igwook me emen mun̄ ya, mè itumu ibe, “Okumugwem ìbe ikeyi: ‘Nra igwa mun̄ keyi. Mun̄ yi ìkpoyaka ikikpan̄ ene ofifi, ijọn̄ keyi si ìkpoyaka inin̄ ora.’ ”

²²Mun̄ ama ya okakana ata mudim mege inire cherekeyi, igọọk me lek ikọ Ilaisia otumube.

²³Ilaisia oneninan̄a me Jeriko ikije isi Beten. Me oniin̄ ije kan̄, usini nsabọn̄ enanan̄a me ama ya isibi, mè inikichak ọmọ, mè ikibe, “Iin̄, kije ikeya, ogwu ǹlak ibot! Kije ikeya, ogwu ǹlak ibot!”

²⁴Ilaisia oraraan̄ chieen̄ ikpọ ema, mè isa erieen̄ Okumugwem ifieek otu inyi ema. Ibo nriọk iba enanan̄a me oron isibi mgbọ yaage, mè inigwak akọp ene ini mè ene iba me lek nsabọn cha ikpan̄ igwook.

²⁵Ilaisia onenije ije kan̄ isi ire ogoon̄ Kamen, mè inigwu ikom ifo Sameria.