Read obolo II Ubọọn̄ 21 Bible Online

II Ubọọn̄ 21 - obolo bible

II Ubọọn̄ 21

¹Manasi ìre akọp mè acha iba mgbọ îkanabe ogwu ubọọn̄, mè ikup me Jeruselem ikpulu akọp acha go mè go. Erieen̄ ogwu uga ìre Efisiba.

²Manasi orọrọ ijo inu me chieen̄ Okumugwem, mije îrọbe ojelek mbuban inu cha echi ebi ido cha erọbe eyi Okumugwem obakbe me lek irieen̄ ema isan̄a me lek ijọn̄ ya mgbọ ebi Ijeren ekinu.

³Manasi îkpọk inama otutuuk isi-ijọn̄ cha echi Ejikaya ogwu ute ogbugbọbe igwook, mè ikpọk inama ntook inyi Baali, mè igwuun̄ si uti yọk Asera, kubọk Eyabu ogwu ubọọn̄ Ijeren orọbe, mè ikitọbọ ebum inyi otutuuk ntoronyan̄ òkup me akpa isinyọn̄, mè ikisi ikwaan̄ inyi.

⁴Înama si owuwa ntook ngwugwa me emen Uwu Mbuban Okumugwem, òrere ere ya Okumugwem otumube ibe ke îre ere ebekimin Erieen̄ kan̄ me Jeruselem.

⁵Înama si owuwa ntook inyi otutuuk ntoronyan̄ òkup me akpa isinyọn̄ me emen oyet egep iba òkup me Uwu Mbuban Okumugwem.

⁶Îwọp si ogwu gwun̄ enerieen̄ me ukan̄ isa igwa ngwugwa, mè ikido ido-inu, mè ikitet ǹcha, mè ikisi ido ido-inu me ubọk ebi nriran ekwukwu jom-jòm mè ebi yọk-ofia. Manasi îrọ ogbogbo ijo inu me chieen̄ Okumugwem, mè isa me ikeya irọ Okumugwem inaan̄ ejit enenen.

⁷Îsa uti yọk Asera îrọbe initap me emen Uwu Mbuban, òrere ere Okumugwem otumube inyi Debit mè ogwu gwun̄ Solomọn ibe, “Îre me emen Uwu Mbuban keyi, mè emen ama Jeruselem eyi ngobobe inyi lek n̄a me etete otutuuk otoko ebi Ijeren, ke ebekimin Erieen̄ n̄a isi ire mgbọ geelek.

⁸Ire gaalek ke ebi Ijeren mêgbala chieen̄ ikirọ inu geelek nnyibe ema ida ibe ekerọ, mè ikisun̄ otutuuk Ikan Mosis ogwu ikwaan̄ n̄a onyibe ema, emi m̀kpayaka ikpọk itele ibe ukot kiban̄ inan̄a me ijọn̄ yi eyi nnyibe ebi nte nte kiban̄ ofifi.”

⁹Ire, ebi ife chi kpegban̄ utọn̄. Manasi osasa ema ije ilọ oniin̄, ema erọrọ ijo inu igak ubọk ebi ofifi ido erọbe, eyi Okumugwem obakbe me lek ijijaka ido cha isan̄a mgbọ ebi Ijeren ekinu.

¹⁰Okumugwem onenitumu inan̄a me otu ebi ikwaan̄ kan̄ ebi nriran ibe ikeyi:

¹¹“Mije Manasi ogwu ubọọn̄ Juda orọbe owuwa mbuban inu chi, mè irọ ijo inu igak otutuuk echi ebi Amọ ebi ìdadasi iluk me ere yi erọbe, mè irọ si ibe ebi Juda egọọk ọmọ etọbọ ebum enyi mkpọmfaka kan̄ cha,

¹²eya orọ, Okumugwem, Awaji ebi Ijeren ìtumu ibe ikeyi: Emi mâsa ikpele ufialek inu me Jeruselem mè Juda, eyi môrọbe inyi utọn̄ ison ebi geelek mênọbe.

¹³Itip-oyerebet ntipbe Sameria mè ifieek-oyerebet mfieekbe itip ebi uwu kè Eyabu ke mbasa itip Jeruselem. M̀batututuku Jeruselem inọọn̄, mè iben ikana ikwuun̄, kubọk etuku emen alala itana.

¹⁴Mâjit ebi n̄a ebi ìkwakwaan̄ isik, mè iyaka ema itap me ubọk ebi ochicha kiban̄, inyi etim akọn̄ ekpan̄ ema, mè efum ema esan̄a kpai,

¹⁵mije ema mîrọ inu òfefieek emi me chieen̄ enenen, mè irọ ibe ejit inaan̄ emi karake ebi nte nte kiban̄ enan̄abe me Ijipiti isibi mege inire cherekeyi.”

¹⁶Ubọk kè Manasi îfiin̄ si eje ebi kpelọ inu geege enenen, eje ebi îkpan̄be ìjojot otutuuk Jeruselem bene me okputut re okputut. Isan̄a me lek keya, Manasi îrọ ibe ebi Juda erọ ijo inu me chieen̄ Okumugwem.

¹⁷Otutuuk ofifi inu òrọrọ me ukot mkpulu kè Manasi, mè otutuuk inu îrọbe, mè otutuuk ijo inu îrọbe, mîge otutuuk itap me emen ikpa mfufuk echi ebi ubọọn̄ Juda.

¹⁸Manasi onenikwu ifo igọọk ebi nte nte kan̄, ebeben ifuun̄ me emen uko ajakajak uwu kan̄, òrere uko ajakajak kè Uja. Amọn ogwu gwun̄ onenikana ubọọn̄ me irek kan̄.

¹⁹Amọn ìre akọp acha iba mè iba mgbọ îkanabe ogwu ubọọn̄, mè ikup me Jeruselem ikpulu acha iba. Erieen̄ ogwu uga ìre Mesulemet, gwun̄ kè Aruju ogwu Jotiba.

²⁰Amọn orọrọ ijo inu me chieen̄ Okumugwem, kubọk nte kan̄ Manasi orọbe.

²¹Îrọ otutuuk ijo ugwem ogwu ute orọbe, mè itọbọ ebum inyi mkpọmfaka cha echi ogwu ute otọbọbe ebum inyi, mè ikisi ikwaan̄ inyi.

²²Amọn ìjijit Okumugwem Awaji ebi nte nte kan̄ itele, ìkaluk si ugwem ìgọọk me oniin̄ eyi Okumugwem.

²³Ebi ikwaan̄ kè Amọn etọtọt otitọt mkpa ikeme ọmọ, mè ikpan̄ ọmọ me emen uwu kan̄.

²⁴Ebi ido Juda etetet otutuuk ebi ìtọtọt otitọt mkpa ikeme ogwu ubọọn̄ Amọn ya ikpan̄ isan̄a kpai, mè inisa Josaya ogwu gwun̄ ito ubọọn̄ me irek kan̄.

²⁵Otutuuk ofifi inu òrọrọ me ukot mkpulu kè Amọn, mè inu îrọbe, mîge otutuuk itap me emen ikpa mfufuk echi ebi ubọọn̄ Juda.

²⁶Ebeben Amọn ifuun̄ me emen udọn̄-ufuun̄ kan̄ me uko ajakajak kè Uja. Josaya ogwu gwun̄ onenikana ubọọn̄ me irek kan̄.