Read obolo II Ubọọn̄ 22 Bible Online

II Ubọọn̄ 22 - obolo bible

II Ubọọn̄ 22

¹Josaya ìre acha jeeta mgbọ îkanabe ogwu ubọọn̄, mè ikup me Jeruselem ikpulu akọp acha ita mè ge. Erieen̄ ogwu uga ìre Jedida, gwun̄ kè Adaya ogwu Bojikat.

²Josaya îrọ inu òtatat me chieen̄ Okumugwem, mè iluk ugwem kan̄ igọọk otutuuk ubọk Debit ogwu ute ukot ikaan̄ olukbe. Ìkagwaka ìnan̄a ìtele ugwem kè Debit me agan̄ geege.

³Me òso akọp mè acha jeeta me lek mkpulu ogwu ubọọn̄ Josaya, ogwu ubọọn̄ oneniria ogwu uti ikpa, Safan gwun̄ kè Ajaliya, gwun̄ gwun̄ kè Mesulam isi Uwu Mbuban Okumugwem, mè itumu inyi ibe:

⁴“Si lek kè Ilikiya ogwu òban Awaji, si tumu nyi ibe ititiin̄ ikpoko ebi ìkibem isotu ebọkọbe me ubọk ebi ene,

⁵mè isa ikana itap ubọk ebi ìkikpọ chieen̄ me lek ikwaan̄ me lek Uwu Mbuban, mè esa ekpe ebi ikwaan̄ cha ìkisi ikwaan̄ me ere òfafiat me lek Uwu Mbuban Okumugwem,

⁶òrere ebi usọ ikwaan̄ uti, mè ebi ìnama uwu, mè ebi ìkinama mgban, mè esa elep uwot mè ewuuk ebabala echi ebesa irọ ikwaan̄ me ere òfafiat me lek uwu ya.

⁷Ire, ìkakup me uyọt ibe ebi ibot ikwaan̄ cha erọ ifuk me ibot ikpoko cha, mije, ema mîgbe utoon̄-ejit me lek ikwaan̄ kiban̄.”

⁸Ilikiya ogwu òban Awaji onenitumu inyi Safan ogwu uti ikpa ibe, “Mmun̄ lek Ikpa Ikan me Uwu Mbuban Okumugwem.” Inenikana Ikpa Ikan ya inyi Safan, Safan ofufuk.

⁹Safan ogwu uti ikpa onenisi lek ogwu ubọọn̄ isi inyi ufọọk-otu ikwaan̄ îriabe ọmọ, mè itumu inyi ibe: “Ebi ikwaan̄ kwun̄ mîfuk ikpoko òkup me Uwu Mbuban isa inyi ebi ìkikpọ chieen̄ me lek ikwaan̄ Uwu Mbuban Okumugwem.”

¹⁰Safan ogwu uti ikpa onenitumu si inyi ogwu ubọọn̄ ibe, “Ilikiya ogwu ngwugwa înyi emi ikpa ge.” Safan onenifuk inu egebe me emen ikpa ya isibi me isi ogwu ubọọn̄.

¹¹Mgbọ ogwu ubọọn̄ onọbe ikọ òkup me emen Ikpa Ikan ya, itataba ofọnti òkup ọmọ me lek igwak,

¹²mè inigwen Ilikiya ogwu ngwugwa, mè Ayikam gwun̄ kè Safan, mè Akibọru gwun̄ kè Mikaya, mè Safan ogwu uti ikpa, mè Ajaya ogwu ikwaan̄ ogwu ubọọn̄, mè inyi ema ida ibe:

¹³“Ìsi ìsi ìdo ida Okumugwem me ibot n̄a melek ibot otutuuk ebi Juda ofolek inu egebe me emen ikpa yi eweekbe imun̄. Okumugwem înaan̄ ejit enenen ikeme eji, mije, ebi nte nte kiji kpegban̄ utọn̄ me lek ikọ egebe me emen ikpa yi, kpeluk si ugwem ikpọ me lek otutuuk inu egebe me emen Ikpa yi ibe eji erọ.”

¹⁴Ilikiya ogwu ngwugwa, mè Ayikam, mè Akibọru, mè Safan, mè Ajaya enanan̄a isi itumu ikọ melek ogwu nriran Uluda, nwa kè Salum gwun̄ kè Tikiba, gwun̄ gwun̄ kè Arayas. Salum yi ore ogwu òkikpọ chieen̄ me lek ere ekisun̄ ofọnti ikwaan̄ me Uwu Mbuban. Uluda ìluk me aya okpọkọ Agan̄ Òso Iba me Jeruselem.

¹⁵Uluda onenitumu inyi ema ibe: “Okumugwem, Awaji ebi Ijeren ìtumu ibe ikeyi: Ìsi ìtumu ìnyi ogwu òraria enyi inu me lek n̄a ibe

¹⁶ke Okumugwem ìbe ikeyi: ‘M̀basasa ufialek inikeme ere yi mè ebi ìluk me emen kan̄, kubọk egebe me emen ikpa ogwu ubọọn̄ Juda ofukbe.

¹⁷Mije, ema mîyaak emi, mè iyaka ikisi iwọp nsensi inyi ebi kè ofifi awaji, mè isa ijo irọrọ kiban̄ cha irọ ibe ejit inaan̄ emi enenen me lek ere yi. Unaan̄-ejit n̄a me lek kiban̄ ìkposiki.’

¹⁸Ìtumu ìnyi ogwu ubọọn̄ Juda ogwu òraria enyi inu ibe enyi enedo ida Okumugwem ibe, ‘Òfo me lek ikọ ya onọbe, Okumugwem, Awaji ebi Ijeren ìbe ikeyi:

¹⁹Mije owu ofieekbe ejit, mè igele lek isiki me isi Okumugwem, mè itaba ofọnti òkup owu me lek igwak, mè ito ito mgbọ owu onọbe ikọ ntumube ikeme ere yi mè ebi ìluk me emen kan̄, ibe ke mêjijaka ere yi, mè irọ inyi ikana ere efieekbe otu inyi, emi si nra inọ ida ito kwun̄. Emi Okumugwem ntumu.

²⁰Eya orọ, owu òkposa chieen̄ kwun̄ imun̄ otutuuk ufialek cha mbaria itap me ere yi. Mâtele ibe owu òkwu òfo ògọọk ebi nte nte kwun̄, mè eben owu efuun̄ me esuuk.’ ” Ebi osat cha esasa etip ya ifo isi ilook ogwu ubọọn̄.