Read obolo II Ubọọn̄ 23 Bible Online

II Ubọọn̄ 23 - obolo bible

II Ubọọn̄ 23

¹Ogwu ubọọn̄ Josaya onenigwen otutuuk ebi ugane Juda melek Jeruselem ititiin̄,

²mè inisa otutuuk ebi ido Juda, mè otutuuk ebi ama Jeruselem, melek ebi ngwugwa, mè ebi nriran, mè otutuuk ebi ene, ebi asasa melek ebi ilile, igbaalek kan̄ ije isi Uwu Mbuban Okumugwem. Inenifuk otutuuk ikọ egebe me emen Ikpa Inyan̄a-ibot ya emun̄be me Uwu Mbuban Okumugwem isibi inyi ema otutuuk ene enọ.

³Ogwu ubọọn̄ oneninene ikeke me irek unye kan̄ kubọk ogwu ubọọn̄, me ebon atà me emen Uwu Mbuban, mè ikpọk irọ ayaya inyan̄a-ibot me isi Okumugwem, ibe ke ọmọ môgọọk Okumugwem, mè ikirọ ikọ îtọbe, mè inu geelek înyibe ida ibe erọ, mè ikirọ si orọmijọn̄ Okumugwem me otutuuk ejit kan̄ mè otutuuk efuuk kan̄, mè ikirọ otutuuk otu inyan̄a-ibot Okumugwem, kubọk egebe me emen Ikpa Ikan ya. Otutuuk ebi ene egọgọọk si ichieek otu inyan̄a-ibot ya.

⁴Ogwu ubọọn̄ oneninyi Ilikiya ogwu òban Awaji, mè ebi ngwugwa ebi ìbebene me irek ikwaan̄ igọọk ọmọ, mè ebi ìkibem isotu, ida ibe ekpulu otutuuk nroon̄ ikwaan̄ geelek erọbe inyi Baali mè Asera, mè echi erọbe inyi otutuuk ebi kè ntoronyan̄ akpa isinyọn̄, esan̄a esibi me Uwu Mbuban Okumugwem. Ogwu ubọọn̄ otatap ukan̄ iwọp otutuuk inu cha me udun̄ ama Jeruselem, me emen iteke Kidọrọn, mè inikpulu ntọn̄ ònan̄a me lek isa ifo Beten.

⁵Ogwu ubọọn̄ Josaya osasan̄a ebi ngwugwa yọk cha ebi adasi ebi ubọọn̄ Juda etobe ibe ekewọp nsensi me isi-ijọn̄ geelek me ama ile geelek me Juda mè echi òkup ikana Jeruselem isan̄a. Îsan̄a si ebi ngwugwa yọk cha ìkiwọp nsensi inyi Baali, mè ura, mè onyan̄, mè ogbogbo ebi kè ntoronyan̄ òkup esese esese, mè otutuuk inu geelek òkinyi utoon̄ me akpa isinyọn̄.

⁶Ogwu ubọọn̄ osasan̄a si uti yọk Asera isan̄a me Uwu Mbuban Okumugwem, mè isa isibi isi iteke Kidọrọn, me udun̄ ama Jeruselem, mè itap ukan̄ iwọp, mè ikọk echi geelek ikatakage ìriọk ikana mfuun̄, mè ikpulu mfuun̄ cha isi igigen̄e igwook me inyọn̄ udọn̄-ufuun̄ ebi ikike echi òkup me udun̄ ama ya.

⁷Ogwu ubọọn̄ îgbugbọ si uwu ere ebirieen̄ ebi òje oyet isi yọk cha ekiluk echi enamabe me emen Uwu Mbuban Okumugwem, òrere si ere ebibaan̄ ekikup ikilọk ekwut mkpọmfaka Asera.

⁸Ogwu ubọọn̄ okpukpulu otutuuk ebi ngwugwa geelek inan̄a me ama ile Juda geelek inigwook me Jeruselem, mè ichaka mbuban me lek isi-ijọn̄ geelek ere ebi ngwugwa cha ekiwọp nsensi. Îchaka mbuban me lek isi-ijọn̄ cha geelek, ibene me Geba isi ire Bieseba, mè igbugbọ otutuuk isi-ijọn̄ òkup me otunchit geelek, echi òkup me otunchit kè Josuwa ogwu òkpulu ama. Otunchit ya ìkup me agan̄ ujit otunchit ama.

⁹Ubọk geelek ibe ke ebi ngwugwa yọk isi-ijọn̄ cha kpegọọk isi ikwaan̄ me inyọn̄ ntook Okumugwem me Jeruselem, ema mîkigọọk ebi ngwugwa ogbo kiban̄ irie fituru kpunube olat me lek.

¹⁰Ogwu ubọọn̄ Josaya îchaka si mbuban me lek mkpọmfaka enamabe inyi Tofet me iteke Ben Inọm, inyi ene geege ikayaka ìkọt ìwọp gwun̄ kan̄ enerieen̄ mè ìre gwun̄ kan̄ enenwaan̄ me ukan̄ me ere ya ìsa ìgwa ngwugwa ìnyi Molek.

¹¹Îsan̄a si otutuuk inyinya cha adasi ebi ubọọn̄ Juda efakabe itap me ubọk ura, echi esun̄be me otunchit oyet egep Uwu Mbuban Okumugwem, me agba lek uwu ogwu ibot ikwaan̄ ge ekigwen Netan-Melek me oyet egep ya isan̄a. Îtap si ukan̄ iwọp uji akọn̄ mfaka ura cha isan̄a kpai.

¹²Îgbugbọ si ntook geelek ebi ubọọn̄ Juda enamabe itoon̄ me inyọn̄ otoon̄-uwu eyi uwu agan̄ inyọn̄ kè Ayaji ogwu ubọọn̄, mè igbugbọ si ntook cha echi ogwu ubọọn̄ Manasi onamabe me emen oyet egep iba eyi Uwu Mbuban Okumugwem. Ìsasan̄a ema isan̄a me ere ya, mè isulu ikpukpuku, mè inikpulu m̀kpukpuku kiban̄ itọọn̄ ifiin̄ me emen iteke Kidọrọn.

¹³Ogwu ubọọn̄ îchaka si mbuban me lek otutuuk isi-ijọn̄ òkup me agan̄ mbum-ura ama Jeruselem, me agan̄ osiki ogoon̄ Mfufiat, echi Solomọn ogwu ubọọn̄ Ijeren onamabe inyi Asitoret, òchichaka awaji ebi Sidọn, mè Kemos òrere òchichaka awaji ebi Mowabu, mè Molek òrere òchichaka awaji ebi Amọn.

¹⁴Josaya ogwu ubọọn̄ îgbugbọ si ewuuk mfaka cha egwugwuun̄be, mè ìchon otutuuk uti yọk Asera geelek igwook, mè inisa ukwuuk ene iyiyala ichit ere cha.

¹⁵Îsan̄a si ntook ngwugwa òkup me Beten, òrere isi-ijọn̄ eyi Jerobuwam gwun̄ kè Nebat, ogwu òrọrọ ibe ebi Ijeren erọ ijo inu, onamabe. Ogwu ubọọn̄ îgbugbọ si ntook keyi melek isi-ijọn̄ kan̄, mè itap ukan̄ iwọp isi-ijọn̄ ya, mè isulu ikpukpuku ikana mfuun̄, mè iwọp si uti yọk Asera òkup me ere ya igbaalek.

¹⁶Josaya onenikpọ, mè imun̄ owuwa udọn̄-ufuun̄ òkup me agba lek ogoon̄ me ere ya, mè iria ibe esi ekpulu ukwuuk ene me emen udọn̄-ufuun̄ cha, mè inikpulu ukwuuk ene cha igwook me inyọn̄ ntook ya, mè itap ukan̄ me lek iwọp, mè isa me ikeya ichaka mbuban me lek ntook ya. Otutuuk inu chi ìmọnọ irek igọọk me lek ikọ Okumugwem eyi ogwu ikwaan̄ Awaji ogwu òtutumu ikọ òfo me lek inu chi otumube.

¹⁷Ogwu ubọọn̄ onenido ebi ene ibe, “Ìre kpasi ewuuk udọn̄-ufuun̄ ire eya nkimun̄?” Ebirieen̄ ama ya efọfọọk ọmọ ibe, “Îre udọn̄-ufuun̄ ogwu ikwaan̄ Awaji ge ogwu ònan̄a me Juda inu, mè iniben nriran, itumu inu chi owu okirọ mgbọ keyi, ikeme ntook ngwugwa òkup me Beten.”

¹⁸Ogwu ubọọn̄ onenibe ema, “Ire ikeya, ìtele ukwuuk kan̄, ikasisaak.” Sa me ikeya, kpechak ubọk me lek ukwuuk kan̄, kpechak si ubọk me lek echi ogwu nriran ònan̄a me Sameria.

¹⁹Otutuuk ntook isi-ijọn̄ cha echi ebi ubọọn̄ Ijeren enamabe me ama ile Sameria geelek isa irọ ibe ejit inaan̄ Okumugwem, ogwu ubọọn̄ Josaya îgbugbọ otutuuk igwook, mè irọ ema si inu yaage îrọbe echi òkup me Beten.

²⁰Josaya onenikpan̄ otutuuk ebi ngwugwa ìkisi ikwaan̄ me isi-ijọn̄ cha me inyọn̄ ntook ngwugwa cha, mè itap ukan̄ iwọp ukwuuk ene me inyọn̄ ntook cha. Mgbọ îrọbe inu cha isan̄a, igwugwu ikom ifo Jeruselem.

²¹Ogwu ubọọn̄ oneninyi otutuuk ebi ene ida ibe: “Ìrie ijọk Iraraka ìnyi Okumugwem Awaji kinyi, ike egebe me emen Ikpa Inyan̄a-Ibot yi.”

²²Bene me ukot mgbọ ebi oyerebet ebi ìkpukpulu Ijeren, na re ukot ebi ubọọn̄ ebi ìkpukpulu Ijeren mè ebi ubọọn̄ ebi ìkpukpulu Juda, kperarak irie ojelek ijọk Iraraka keya.

²³Ire, îre me òso akọp mè acha jeeta me mkpulu ogwu ubọọn̄ Josaya ke erie ijọk Iraraka yi inyi Okumugwem me Jeruselem.

²⁴Josaya îsan̄a si ebi nriran ekwukwu jom-jòm mè ebi yọk-ofia geelek mè ebi ikaan̄ geelek ebi ene ekaan̄be me uwu, mè esese mkpọmfaka geelek, mè òchichaka inu geelek eweekbe imun̄ me ido Juda mè ama Jeruselem. Josaya ìrọ inu yi isasa irọ ikan cha egebe me emen Ikpa Ilikiya ogwu ngwugwa omun̄be me Uwu Mbuban Okumugwem iso.

²⁵Sabum ukot kè Josaya, kpunu ogwu ubọọn̄ geege òbet lek kan̄, ogwu òsasa me otutuuk ejit kan̄, mè otutuuk efuuk kan̄, mè otutuuk unye kan̄ igwu ikom igọọk Okumugwem igọọk me lek otutuuk Ikan kè Mosis. Karake ukot kan̄ orakabe si, kpunu ogwu ubọọn̄ geege òbet lek kan̄.

²⁶Ubọk geelek si, Okumugwem ìkatele ikpele uyok uyok unaan̄-ejit kan̄ ya înaan̄be inyi ebi Juda mije otutuuk ijo inu cha Manasi orọbe isa irọ ibe ejit inaan̄ Okumugwem.

²⁷Eya orọ Okumugwem otumube ibe, “Mâsan̄a si Juda isan̄a me isi n̄a, kubọk nsan̄abe Ijeren. Mâjit si ama ile yi, òrere Jeruselem ama ngobobe, mè ijit si Uwu Mbuban yi eyi ntumube ibe ìre ere ebekimin Erieen̄ n̄a.”

²⁸Otutuuk ofifi inu òrọrọ me ukot mkpulu kè Josaya, mè otutuuk inu îrọbe, mîge otutuuk itap me emen ikpa mfufuk echi ebi ubọọn̄ Juda.

²⁹Me ukot kè Josaya, Neko ogwu ubọọn̄ Ijipiti osasa ebi akọn̄ kan̄ isibi isi okwaan̄ Yuferetis ibosi itap ubọk inyi ogwu ubọọn̄ Asiria me akọn̄. Ogwu ubọọn̄ Josaya ojijibi akọn̄ isibi isi itim me lek kè Neko ogwu ubọọn̄ Ijipiti, ire, Neko okakana isi ikweek ọmọ, mè ikpan̄ ọmọ me Megido.

³⁰Ebi ikwaan̄ kan̄ esasa nkwukwu kan̄ me emen uji akọn̄ ikọp inan̄a me Megido ika inu Jeruselem, mè inifuun̄ ọmọ me emen udọn̄-ufuun̄ kan̄. Ebi ido Juda enenitọkọ aran̄ me ibot kè Jeyowayaji ogwu gwun̄, mè irọ ọmọ ubọọn̄ me irek ogwu ute.

³¹Jeyowayaji ìre akọp acha iba mè ita mgbọ îkanabe ogwu ubọọn̄, mè ikup me Jeruselem ikpulu onyan̄ ita. Erieen̄ ogwu uga ìre Amutali gwun̄ kè Jerimaya ogwu Libina.

³²Jeyowayaji orọrọ ijo inu me chieen̄ Okumugwem, kubọk ebi nte nte kan̄ ukot ikaan̄ erọbe.

³³Neko ogwu Fero Ijipiti otetet ọmọ isi itap me mkpọn me Ribila me ido Amat, inyi ikayaka ìre ogwu ubọọn̄ me Jeruselem. Inenifieek obop kilo alata okuket ita mè efit kilo ini, mè akọp kilo alata araran̄ ita mè kilo ini itoon̄ me ibot ebi Juda kubọk mkpukpe.

³⁴Ogwu Fero Neko onenisa Eliyakim gwun̄ kè Josaya irọ ogwu ubọọn̄ me irek kè Josaya ogwu ute, mè inwene Eliyakim erieen̄ ibe ekegwen Jioyakim. Inenisa Jeyowayaji isi isun̄ me Ijipiti, ikukup me ere ya ikwu.

³⁵Jioyakim, okekikpe Neko ogwu Fero ikpoko alata okuket melek alata araran̄ cha ike îdobe. Jioyakim ìfefieek otitip alata okuket mè alata araran̄ inyi otutuuk ebi ido, me ene me ene, igọọk me otu ifuk ikpoko òkekem me lek ene, isa ikikpe ikpoko cha inyi ogwu Fero Neko.

³⁶Jioyakim ìre akọp acha iba mè go mgbọ îkanabe ogwu ubọọn̄, mè ikup me Jeruselem ikpulu akọp mè acha ge. Erieen̄ ogwu uga ìre Jibida gwun̄ kè Pedaya ogwu Ruma.

³⁷Jioyakim orọrọ ijo inu me chieen̄ Okumugwem kubọk ebi nte nte kan̄ ukot ikaan̄ erọbe.