Read obolo II Ubọọn̄ 6 Bible Online

II Ubọọn̄ 6 - obolo bible

II Ubọọn̄ 6

¹Usen ge, ebi otu ogbo ebi nriran enenitumu inyi Ilaisia ibe, “Ere yi eji ekiluk ìkata eji lek.

²Tele mè eji esi agba okwaan̄ Jodan esi ekep uti, ene ge otu uti ge, mè esa enenama ere òbota eji lek iluluk me ere ya.” Ilaisia obebe ema, “Ìsi ma!”

³Ene ge me lek kiban̄ onenibe Ilaisia, “Soso, nye lek na gọọk eji ebi ikwaan̄ kwun̄ si ma!” Ilaisia onenibe, “Înwọn, mânu,”

⁴mè inigọọk ema ije. Ema ejeje inire okwaan̄ Jodan, mè ikikep uti me ere ya.

⁵Mgbọ ene ge me lek kiban̄ okifieek uti, otuban kan̄ owọwọọk inan̄a me ibot, mè irọn̄ me mun̄. Ogwu enerieen̄ ya otataan̄ ukpo ibe, “Jei, ogwu nte, otuban ya, m̀fọfọọk!”

⁶Ilaisia ogwu ikwaan̄ Awaji onenido ogwu enerieen̄ ya ibe, “Ere owa ke otuban ya orọn̄?” Ogwu enerieen̄ ya onenisa Ilaisia ijeen̄ ere ya, Ilaisia ofefieek sọn̄ uti ge itọp ito me ere ya. Otuban ya onanan̄a iwolo, mè ikite me inyọn̄ isi mun̄.

⁷Ilaisia otutumu inyi ogwu enerieen̄ ya ibe, “Mọnọ!” Inyanyana ubọk imọnọ otuban ya.

⁸Me ike mgbọ ge, ogwu ubọọn̄ Aram onenikitim akọn̄ me lek ebi Ijeren. Ogwu ubọọn̄ ya onenitọt melek ebi ibot akọn̄ kan̄ ibe, “Ere òkup ikeyi ere òkup ikeyi, ke eji eberieen̄ akọn̄ kiji.”

⁹Ogwu ikwaan̄ Awaji oneniria etip ilook ogwu ubọọn̄ Ijeren ibe: “Gbala chieen̄, ikaje ìraka me agan̄ ere òkup ikeyi ere òkup ikeyi, mije, îre ere keya ke ebi Aram ebeje inu.”

¹⁰Ikaan̄ ere ogwu ikwaan̄ Awaji otemebe ogwu ubọọn̄ Ijeren ibe ikasi, ogwu ubọọn̄ îra iria etip ibe ebi ìkup me ere ya egbala chieen̄. Inu yi îrọ iwa mgbọ.

¹¹Inu ya oneninaan̄ ogwu ubọọn̄ Aram ejit enenen, itititiin̄ ebi ibot akọn̄ kan̄, mè ikido ema ibe, “Ìtumu-nu ìnyi emi, ìre ekene me etete kiji okeke inyi ogwu ubọọn̄ Ijeren?”

¹²Ene ge me etete ebi ibot ikwaan̄ kan̄ onenifọọk ibe, “Ìkakaan̄ ene geege me etete kiji òkirọ inu yi, ogwukaan̄ n̄a ogwu ubọọn̄, îre Ilaisia ogwu nriran òkup me Ijeren okirọ. Inu geelek owu okupbe me emen agwut kwun̄ itumu, îra iben isi ikpa inyi ogwu ubọọn̄ Ijeren.”

¹³Ogwu ubọọn̄ onyinyi ida ibe, “Ìsi ìweek-nu ìriọọn̄ ere îkupbe, inyi mâria ebi ene ibe esi etet esa ejet emi.” Esisi iweek imun̄, mè inilook ogwu ubọọn̄ ibe ke ìkup me Dotan.

¹⁴Ogwu ubọọn̄ Aram oneniria owuwa inyinya akọn̄, mè uji akọn̄, mè ogbogbo ebi akọn̄ isi Dotan. Ema esisi ikpa mbin akọn̄ ikana ama ya me ejit eririeen̄.

¹⁵Me agan̄ egwe, gwun̄ uwu ogwu ikwaan̄ Awaji obobolo chieen̄, mè inan̄a isibi oyet, mè inimun̄ ogbogbo ebi akọn̄, mè ogbogbo inyinya mè ebi kè uji akọn̄ egbanbe ikana ama kiban̄ okokop, mè ilibi isi itumu inyi ogwu ute-uwu ibe, “Jei, ogwu nte, eji eberọrọ?”

¹⁶Ogwu ute-uwu onenibe ọmọ, “Kafieek owot! Ebi ìkup melek kiji mîwa igak ebi ìkup melek kiban̄!”

¹⁷Ilaisia orariaak uriaak ibe, “Soso, Okumugwem, chili gwun̄ uwu n̄a chieen̄, inyi imọọn̄ inu.” Okumugwem ochichili chieen̄ ogwu gwun̄ uwu ya, imumun̄ ogbogbo inyinya melek uji akọn̄ òkilomo kubọk ukan̄ ojotbe otutuuk inyọn̄ orioon̄ ya ògbagban ikana Ilaisia okokop.

¹⁸Ike ebi ochicha cha ekije ikwala isibi inu me lek kè Ilaisia, Ilaisia orariaak uriaak inyi Okumugwem ibe, “Soso, tap ebi ife chi ǹnàan̄!” Okumugwem otatap ife cha ǹnàan̄, ike Ilaisia otumube.

¹⁹Ilaisia onenitumu inyi ebi ife cha ibe, “Ìkare oniin̄ keyi ke enyi ebenin̄, ìkarere si ama keyi ke enyi ekiweek. Ìna, ke mâsa enyi isi ijeen̄ ogwu enyi ekiweek.” Inenisa ema ije isi Sameria.

²⁰Mgbọ Ilaisia osabe ife cha ije inin̄ emen ama Sameria, ineniriak uriaak ibe, “Okumugwem, chili chieen̄ ebi ife chi, inyi ema emọọn̄ inu.” Okumugwem ochichili chieen̄ kiban̄, ema emumun̄ ibe ke ema ekup me eden̄ ama Sameria.

²¹Mgbọ ogwu ubọọn̄ Ijeren omun̄be ife cha, idodo Ilaisia ibe, “Ogwu nte n̄a, ìre m̀kpakpan̄ ife chi ni?”

²²Ilaisia onenibe ọmọ, “In̄-in̄, kakpan̄. Ìre owu môkpan̄ ogwu akọn̄ osabe oge akọn̄ kwun̄ mè ogbaan̄ kwun̄ itet me isi akọn̄ ni? Yik inorie mè mudim nyi ema erie mè enwọ, mè egwu ekom efon egọọk ogwu ibot kiban̄.”

²³Ogwu ubọọn̄ onenito ikpele ijọk inyi ema. Ema irerie, mè inwọ isan̄a, iraria ema ifon, ema egwugwu ikom ifon igọọk ogwu ibot kiban̄. Bene me mgbọ ya, ebi Aram kpeyaka ikinu enun̄unun̄ me ido Ijeren.

²⁴Ike mgbọ okije, Ben-Adadi ogwu ubọọn̄ ido Aram onenititiin̄ otutuuk ebi akọn̄ kan̄, mè inijibi akọn̄ isi Sameria, mè ikpa mbin akọn̄ ikana ama ya.

²⁵Mije mbin akọn̄ ya okupbe ifiin̄ enenen, uga akan̄ oninin̄ Sameria, ire lek otu ewe ibot inyinya akpan ge orebe akọp ikpoko alata okuket jeeta, sà otu ewe mgbidim iko ifin elesia[1] ge ore ikpoko alata okuket go.

²⁶Usen ge, mgbọ ogwu ubọọn̄ Ijeren okije me inyọn̄ mgban ewakbe ikana ama, ogwu enenwaan̄ ge omumun̄ ọmọ, mè itaan̄ ukpo itumu inyi ibe, “Ogwu nte, ogwu ubọọn̄, soso, nyan̄a emi!”

²⁷Ogwu ubọọn̄ ofọfọọk ibe, “Ire Okumugwem ìkatap ubọk ìnyi owu, ìre emi m̀basa ntap-ubọk me ere owa initap inyi owu? Ìre me ere igen̄ akpa? Sà ìre me ere ichimi miin̄?”

²⁸Ogwu ubọọn̄ onenido ogwu enenwaan̄ ya ibe, “Keke ore ufialek kwun̄?” Ogwu enenwaan̄ ya ofọfọọk ibe, “Kpọ, ogwu enenwaan̄ yi onitumu inyi emi ibe, ‘Sa gwun̄ enerieen̄ kwun̄ na, inyi eji ekpan̄ etaka cherekeyi, isire iyakwut, eji mênenikpan̄ eyi n̄a itaka.’

²⁹Eji enenikpan̄ gwun̄ n̄a enerieen̄ itaka. Me ofit iwele kan̄, nnenibe ogwu enenwaan̄ yi, ‘Owu sa gwun̄ kwun̄ enerieen̄ na, inyi eji ekpan̄ etaka.’ Ire, ogwu enenwaan̄ yi obeben ogwu gwun̄ isi ilet.”

³⁰Mgbọ ogwu ubọọn̄ onọbe ikọ ogwu enenwaan̄ ya otumube, itataba ofọnti òkup ọmọ me lek igwak. Ike îkije me inyọn̄ mgban ama ya, ebi ene ekekikpọ, mè imun̄ ibe ke îtap ofọnti ufieejit me irak.

³¹Ogwu ubọọn̄ onenikinina lek ibe, “Kè Awaji isulu emi osusut, mè itoon̄ urot, ire ǹkafieek ebek kè Ilaisia gwun̄ kè Safat ìsan̄a cherekeyi!”

³²Ilaisia ìsiki ikweek me uwu kan̄, ọmọ melek ebi ugane, mgbọ ogwu ubọọn̄ oriabe ogwu osat ge inu me lek kè Ilaisia. Ire, sabum ogwu osat ya onire, Ilaisia otutumu inyi ebi ugane cha ibe, “Ìfat ìkpọ-nu ike ogwu òkpan̄ ene yi oriabe ene ibe inifieek emi ebek! Ogwu osat ya isinu, ìgon afọn̄, ikachieek ibe inin̄. Ìre enyi kpefat inọ ida ukot ogwu nte uwu kan̄ okigọọk ọmọ me udun̄?”

³³Ikọ ya me otu îkitumu inyi ema, ogwu osat ya onenire. Ogwu ubọọn̄ otutumu ibe, “Ùrioon̄ keyi ìnan̄a me ubọk Okumugwem. M̀bajeje iyaka ikpọk ikup ikikpọ ibe Okumugwem mônitap ubọk inyi eji?”