Read obolo II Ubọọn̄ 7 Bible Online

II Ubọọn̄ 7 - obolo bible

II Ubọọn̄ 7

¹Ilaisia onenitumu ibe, “Ìgban̄ ikọ Okumugwem otumube. Okumugwem ìbe ikeyi: Me ike mgbọ keyi iyakwut, me otunchit ama Sameria, mêlep iko akpa wit ekọkọk jaaba mè mgbidim me ikpoko alata okuket ge, mè ilep si akpa balì ekọkọk, akọp mè iko go, me ikpoko alata okuket ge.”

²Ogwu ibot ikwaan̄ òkitap ubọk inyi ogwu ubọọn̄ onenitumu inyi ogwu ikwaan̄ Awaji ibe, “Kpọ, ikerere ibe ke Okumugwem ìchichili ebi kè nruruk akpa isinyọn̄ ibook, ikọ keya ìkpokọt irọ iso.” Ilaisia ofọfọọk ọmọ ibe, “Kpọ, owu môsa chieen̄ kwun̄ imun̄, ire, owu òkporie geege me lek!”

³Me ike mgbọ ya, îkaan̄ ebirieen̄ ini ìkifiak orukan̄ inyakpa ìkup me otunchit ama Sameria. Ema enenikinina lek ibe, “Ìre eji ebekpọkpọ ikup ikeyi me ere yi mege mkpa ònoben eji ni?

⁴Ire eji ibe mêje inin̄ emen ama, me ere ya, uraafiọọn̄ môkpan̄ eji isan̄a. Eji iyaka ibabia me ere keyi, mkpa okup inyi eji. Mgbọ yi, eji eneje esi emen orieen̄ akọn̄ ebi Aram esi ekana lek kiji enyi ebi akọn̄ Aram. Ire ema itele ibe eji egat ugwem, eji mêgat, ire ema ikpan̄ eji, eji mêkwaan̄.”

⁵Me otu ikakwun̄ usen ya, ema enanan̄a ije isi orieen̄ akọn̄ ebi Aram. Mgbọ ema ejebe ire otu utọn̄ orieen̄ akọn̄ ya, ema emumun̄ ibe ke okwukwek akọn̄ ya ìlaak ukpọk, kpunu ene geege me emen.

⁶Sabum mgbọ ya, Ogwukaan̄-ene îrọ inyi ebi akọn̄ Aram enọ ida okput owuwa uji akọn̄, mè owuwa inyinya, mè okput ogbogbo ebi akọn̄ okinu. Ema ekekitumu me lek kiban̄ ibe, “Kpọ, ogwu ubọọn̄ Ijeren îra igween̄ ebi ubọọn̄ ebi Et mè ebi ubọọn̄ Ijipiti, inyi ejibi akọn̄ enu eji lek!”

⁷Eya orọ, ema elilim me otu ikakwun̄ usen ya, mè itele uwu ọfọ kiban̄, mè inyinya kiban̄, mè inyinya akpan kiban̄. Ema ejujuuk orieen̄ akọn̄ kiban̄ itele ubọk îkupbe, ogwu ikup, olibi oweek ebek ugwem kan̄.

⁸Ebi inyakpa cha enenije ire ere orieen̄ akọn̄ ebi Aram ya, mè inin̄ emen uwu ọfọ ge, mè ikpulu inorie irie, mè inwọ miin̄, mè ikpulu alata okuket, mè alata araran̄, melek ebi kè ofọnti me uwu ọfọ keya isa isi ileek inyi lek kiban̄. Ema egwugwu ikom inu, mè ininin̄ emen ofifi uwu ọfọ, mè ifum si inu isa isi ileek inyi lek kiban̄.

⁹Ema enenitumu me lek kiban̄ ibe, “Inu yi eji ekirọ ìkatat! Cherekeyi ìre usen ata etip. Ìkagbe ibe eji eben ata etip yi echit me lek kiji gaalek. Ire eji ikup ikikpọ ibe egwe iwele sabum eji èsi elook ebi ene, osusut ijo inu môre eji lek. Ngwa, eji eneje esi esa ata etip yi esi elook me uwu ogwu ubọọn̄.”

¹⁰Ema enanan̄a ije isi otunchit ama, mè igwen ebi ìkibem otunchit itumu inyi ibe, “Eji mîje isi orieen̄ akọn̄ ebi Aram, eji kpemun̄ ene geege, kpenọnọ si ida ebilene geege me ere ya. Ebi kè inyinya etobobe, mè ebi kè inyinya akpan etobobe gaalek ekup me ere cha. Otutuuk uwu ọfọ kiban̄ ìkup ubọk îkupbe melek inu me emen.”

¹¹Ebi ìkibem otunchit ama eneniben etip ya isi ilook me emen uwu ogwu ubọọn̄.

¹²Ogwu ubọọn̄ onanan̄a ikeke me ejit eririeen̄ ya, mè initumu inyi ebi ibot ikwaan̄ kan̄ ibe, “Ìna ǹtumu inu ebi Aram cha eweekbe irọrọ eji ǹnyi enyi. Ema mîriọọn̄ ibe ke eji ekup me uraafiọọn̄, eya orọ ema echakbe lek inan̄a isibi itele orieen̄ akọn̄ kiban̄ isi ileek me emen oron, mè ikeek ibe ke eji mênan̄a me emen ama isibi inu, inyi ema enetet eji me agam, mè eraka enin̄ emen ama.”

¹³Ene ge me lek ebi ibot ikwaan̄ cha onenitumu inyi ogwu ubọọn̄ ibe, “Kpọ, eji eneria ebi akọn̄ melek inyinya go me etete inyinya òsisik me emen ama, inyi ema esi eweek eriọọn̄ inu òrọrọ me ere ya. Ema ebekup kubọk otutuuk ebi Ijeren ìkukup ikikpọ mgbọ mkpa môbenbe ema. Mè ìre mkpa ìben ema me lek oniin̄, mè ìre ìben ema melek otutuuk ene me emen ama, kpunu esese.”

¹⁴Ogwu ubọọn̄ onenigobo ebi akọn̄ iria isibi me emen uji akọn̄ iba melek ebi kè inyinya òje me lek, mè ininyi ema ida ibe esi ekpọ-nu inu òrọrọ me lek ebi akọn̄ Aram.

¹⁵Ebi ife cha elilibi isibi igọọk me oniin̄ ebi akọn̄ Aram cha eliin̄be mege isi ire okwaan̄ Jodan. Ike ema ekije, ema emumun̄ ebi kè ofọnti, mè nroon̄ ikwaan̄, echi ebi akọn̄ Aram etọọn̄be ifiin̄ mgbọ ema ekililiin̄ inan̄a me ugwat-lek. Inu cha ìkpọkpọ ifiaak ikana ijot otutuuk lek oniin̄. Ebi osat cha enenisa etip inu ema emun̄be igwu ikom ika inilook ogwu ubọọn̄.

¹⁶Ebi Sameria egbugbuku isibi isi mfum me orieen̄ akọn̄ ebi Aram. Enenikilep iko akpa wit ekọkọk jaaba mè mgbidim me ikpoko alata okuket ge, mè ilep si akpa balì ekọkọk, akọp mè iko go, me ikpoko alata okuket ge, kubọk Okumugwem otumube ibe ke môrọ.

¹⁷Ogwu ubọọn̄ oneniria ogwu ikwaan̄ òkitap ubọk inyi ọmọ ito me otunchit ibe ikikpọ chieen̄ me ere ya. Ike ebi ene ekinyinyan̄a oniin̄, edada ọmọ ito me ijọn̄ me otunchit ya, mè ijak ikpan̄, ikwukwu, kubọk ogwu ikwaan̄ Awaji otumube mgbọ ogwu ubọọn̄ onube uwu kan̄.

¹⁸Ogwu ikwaan̄ Awaji ìtumu inyi ogwu ubọọn̄ ibe: “Me ike mgbọ keyi me iyakwut, me otunchit ama Sameria, mêlep iko akpa wit ekọkọk jaaba mè mgbidim me ikpoko alata okuket ge, mè ilep si akpa balì ekọkọk, akọp mè iko go, me ikpoko alata okuket ge.”

¹⁹Ogwu ibot ikwaan̄ òkitap ubọk inyi ogwu ubọọn̄ ya ìtumu inyi ogwu ikwaan̄ Awaji ibe, “Kpọ, ikerere ibe ke Okumugwem ìchichili ebi kè nruruk akpa isinyọn̄ ibook, ikọ keya ìkpokọt irọ iso.” Ilaisia ofọfọọk ọmọ ibe, “Kpọ, owu môsa chieen̄ kwun̄ imun̄, ire, owu òkporie geege me lek!”

²⁰Ikọ ya si okpọkpọ irọ iso ike Ilaisia otumube. Ebi ene mîjak ọmọ me otunchit ama, ikwukwu.