Read obolo II Ubọọn̄ 8 Bible Online

II Ubọọn̄ 8 - obolo bible

II Ubọọn̄ 8

¹Me ike mgbọ ge, Ilaisia onenitumu inyi ogwu enenwaan̄ Sunem ogwu îjomobe ogwu gwun̄ enerieen̄ me mkpa ya ibe, “Nan̄a me ama yi sibi, owu melek ebi ototun̄ ukan̄ kwun̄, mè si luk sọntiik mgbọ me ere geelek omabe, mije, Okumugwem îra itumu ifieek ibe ke akan̄ môkup, akan̄ ya ìbokup me lek ijọn̄ yi acha jaaba.”

²Ogwu enenwaan̄ ya orọrọ si ike ogwu ikwaan̄ Awaji otumube. Isasa ebi ototun̄ ukan̄ kan̄ igbaalek inan̄a isibi isi iluk me ido Filisia acha jaaba.

³Me òta acha jaaba ya, ogwu enenwaan̄ ya onanan̄a me ido Filisia ya igwu ikom ika, mè inisi ibeek ogwu ubọọn̄ ibe iyaka uwu kan̄ mè ijọn̄ kan̄ inyi ọmọ.

⁴Me ike mgbọ ya, ogwu ubọọn̄ ìkitumu ikọ melek Geyaji, gwun̄ uwu ogwu ikwaan̄ Awaji, mè ikibe, “Kpa-nu nyi emi otutuuk ikpele ikwaan̄ Ilaisia orọbe.”

⁵Geyaji onenikikpa inyi ogwu ubọọn̄ ike Ilaisia orọbe inyi ogwu òkwukwu ijomo me mkpa. Geyaji òkikpakpa ikọ ya me otu, ogwu enenwaan̄ ogwu Ilaisia orọbe inyi ogwu gwun̄ enerieen̄ ijomo me mkpa ya onunu, mè inikibeek ogwu ubọọn̄ ibe ikana uwu kan̄ mè ijọn̄ kan̄ inyi ọmọ. Geyaji otutumu inyi ogwu ubọọn̄ ibe, “Ogwu nte, ogwu ubọọn̄! Kpọ ogwu enenwaan̄ ya ire ogwu, kpọ gwun̄ kan̄ ya ogwu Ilaisia ojomobe me mkpa ire ogwu si.”

⁶Ogwu ubọọn̄ onenido ogwu enenwaan̄ ya ubọk inu ya orọbe, ogwu enenwaan̄ okpakpa otutuuk inyi. Ogwu ubọọn̄ onenigwen ogwu ibot ikwaan̄ kan̄ ge inyi ogwu enenwaan̄ ya, mè itumu inyi ibe, “Otutuuk inu geelek òrere eyi ogwu enenwaan̄ yi, yaka nyi, mè nyi si otutuuk ikpoko mfut ijọn̄ kan̄, bene me usen înan̄abe mege inire mgbọ keyi.”

⁷Ilaisia onenisi Damasikọs, ama ibot me ido Aram. Me ike mgbọ ya, lek kè Ben-Adadi ogwu ubọọn̄ Aram ìkanye. Enenitumu inyi ibe ke ogwu ikwaan̄ Awaji înu inire Damasikọs.

⁸Ogwu ubọọn̄ otutumu inyi Ajayen ibe, “Mọnọ inyinyi môsabe iche inyi ogwu ikwaan̄ Awaji kaan̄ me ubọk, mè je si lek kan̄. Tumu nyi ibe iweek iriọọn̄ me otu Okumugwem mè ìre mânan̄a ikeke me ijọn̄ orukan̄ keyi me ògat ugwem.”

⁹Ajayen onanan̄a ije isi lek kè Ilaisia, mè ikpulu inu inyinyi cha ikaan̄ me ubọk. Îmọnọ inu ònwọnwọn ichit me Damasikọs itoon̄ ijot inyọn̄ akọp aligọ ini isa igbaalek ije. Inenire, mè inin̄ isi ikeke me isi kè Ilaisia, mè inibe ọmọ, “Ben-Adadi gwun̄ kwun̄ enerieen̄, ogwu ubọọn̄ Aram, oria emi inu ibe emi ǹnendo owu ibe mè ìre ọmọ mônan̄a ikeke me ijọn̄ orukan̄ keyi me ògat ugwem.”

¹⁰Ilaisia ofọfọọk Ajayen ibe, “Si tumu nyi ibe, ‘Owu môgat ugwem.’ Ire, Okumugwem îjeen̄ emi ibe ke ogwugwu ìbokwukwu.”

¹¹Ilaisia onenitet isi kan̄ itat, mè igwuun̄ chieen̄ me isi kè Ajayen ikikpọ mege esip otetet Ajayen, ire lek Ilaisia ogwu ikwaan̄ Awaji obenebe ikito ito.

¹²Ajayen onenido ọmọ ibe, “Ìre keke orọ Ogwukaan̄ n̄a okito ito?” Ifọfọọk ibe, “Mije, nriọọn̄ inu ikpak owu oborọ ebi Ijeren. Owu môtaak ukan̄ me lek ama mgban akọn̄ kiban̄ cha, mè isa oge akọn̄ ikpaan̄ nsabọn irieen̄ kiban̄, mè itọọn̄ asa nsabọn kiban̄ ikpọk isan me ijọn̄, mè ichiin̄ owot ebi nwa-owot kiban̄ ibak.”

¹³Ajayen onenibe ọmọ, “Emi ogwu usun̄ kwun̄, ibo ikike, m̀bajeje ikọt irọ ojelek ikpele inu òkup ikecha?” Ilaisia ofọfọọk ibe, “Okumugwem îjeen̄ emi ibe ke owu obonire ogwu ubọọn̄ Aram.”

¹⁴Ajayen onenitele Ilaisia, mè igwu ikom ifo igọọk ogwu ute-uwu. Ogwu ute-uwu ododo ibe, “Ìre keke ke Ilaisia otumu inyi owu?” Ajayen ofọfọọk ibe, “Ìbe ke owu môgat ugwem.”

¹⁵Ire, me ofit iwele kan̄, Ajayen omọmọnọ ulobo ekwut elọlọk ge ijiin̄ me emen mun̄, mè isa isi iwele ichit isi ogwu ubọọn̄, ogwu ubọọn̄ okwukwu. Ajayen onenikana ogwu ubọọn̄ Aram me irek kè Ben-Adadi.

¹⁶Me òso acha go me lek mkpulu kè Joram ogwu ubọọn̄ Ijeren, òrere gwun̄ kè Eyabu, Jeyoram gwun̄ kè Jiosefat onenibene ikikpulu Juda. Jiosefat îwuuk lek ikpulu ido Juda.

¹⁷Jeyoram ìre akọp acha ita mè iba mgbọ îkanabe ogwu ubọọn̄, mè ikup me Jeruselem ikpulu acha jeeta.

¹⁸Jeyoram îrọ ijo ugwem yaage ebi ubọọn̄ Ijeren erọbe, kubọk ebi uwu kè Eyabu erọbe, mije, gwun̄ enenwaan̄ kè Eyabu ore nwa kan̄. Îrọ ijo inu me chieen̄ Okumugwem.

¹⁹Ire, Okumugwem ìkaweek ijijijaka Juda, bak me lek kè Debit ogwu usun̄ kan̄, mije inyan̄a-ibot înyan̄abe ibe ke ọmọ môrọ inyi otitọn̄ eyi mkpulu kè Debit melek ebi owot iman kan̄ ibia ire mgbọ geelek.

²⁰Me ukot mkpulu kè Jeyoram ke ebi ido Edọm efieek inan̄a me irak mkpulu Juda, mè ito ubọọn̄ eyi kiban̄.

²¹Jeyoram onenijibi akọn̄ isi Jairi, ọmọ melek otutuuk uji akọn̄ kan̄. Ebi Edọm ererieen̄ akọn̄ ikana ọmọ melek ebi ibot uji akọn̄ kan̄ okokop. Me eririeen̄, ema etitim akọn̄ me lek ebi Edọm. Ebi akọn̄ kan̄ elilibi inwọnọ, mè ifon.

²²Sa me ikeya ke Edọm obum isibi me irak ubọk ebi Juda mege inire cherekeyi. Emen mgbọ ya si ke ama Libina obum si isibi me irak ubọk ebi Juda.

²³Otutuuk ofifi inu òrọrọ me ukot mkpulu kè Jeyoram, mè inu îrọbe, mîge otutuuk itap me emen ikpa mfufuk echi ebi ubọọn̄ Juda.

²⁴Jeyoram onenikwu ifo igọọk ebi nte nte kan̄, ebeben ifuun̄ me agba lek ebi nte nte kan̄ me ama kè Debit. Ayajaya ogwu gwun̄ onenikana ubọọn̄ me irek kan̄.

²⁵Me òso akọp mè acha iba me lek mkpulu kè Joram gwun̄ kè Eyabu ogwu ubọọn̄ Ijeren, Ayajaya gwun̄ kè Jeyoram onenikana ogwu ubọọn̄ Juda.

²⁶Ayajaya ìre akọp acha iba mè iba mgbọ îkanabe ogwu ubọọn̄ Juda, mè ikup me Jeruselem ikpulu acha ge. Ogwu uga ìre Atalia gwun̄ gwun̄ kè Omiri, ogwu ubọọn̄ Ijeren.

²⁷Ayajaya îrọ ijo ugwem yaage ebi uwu kè Eyabu erọbe, mè irọ ijo inu me chieen̄ Okumugwem kubọk ebi uwu kè Eyabu erọbe, mije, gwun̄ owot iman kè Eyabu ore nwa kan̄.

²⁸Ike mgbọ ge, Ayajaya onenigọọk Joram gwun̄ kè Eyabu isi itim akọn̄ me lek kè Ajayen ogwu ubọọn̄ Aram me ama Ramot me agan̄ Giliadi. Ebi Aram etatap Joram unan me lek.

²⁹Joram ogwugwu ikom inu Jesereli inikup, inyi unan ebi Aram etapbe ọmọ me lek me Rama me Giliadi mgbọ îsibe akọn̄ me lek kè Ajayen ogwu ubọọn̄ Aram ita. Ayajaya ogwu ubọọn̄ Juda, òre gwun̄ kè Jeyoram, oneninan̄a inu Jesereli inikpọ Joram gwun̄ kè Eyabu me ijọn̄ orukan̄ ya.