Read obolo I Mfuf 10 Bible Online

I Mfuf 10 - obolo bible

I Mfuf 10

¹Me ike mgbọ ge, ebi Filisia enenitim akọn̄ me lek ebi Ijeren. Ebi akọn̄ Ijeren elililiin̄ inan̄a me isi urum akọn̄ ebi Filisia. Owuwa ebi Ijeren ekwakwaan̄ irurọrọn̄ọ me inyọn̄ ogoon̄ Gilibowa.

²Ebi akọn̄ Filisia ekpọkpọ itet lek inye ikigọọk Sọọlu mè ebi bọn, mè ikpan̄ ebi bọn, Jonatan mè Abinadap mè Malikisuwa.

³Akọn̄ ya oneninye enenen me lek kè Sọọlu, ebi ìkisook oraan̄ elilibi isoon̄ ọmọ, mè isook ọmọ itap uga unan me lek.

⁴Sọọlu onenitumu inyi ogwu òkiben nroon̄ akọn̄ kan̄ ibe, “Wọọk oge akọn̄ kwun̄ sa chim emi kpan̄, inyi ebi Filisia chi, ife ekafieekge afi, ekanirọ emi inu ochak.” Ire, ogwu òkiben nroon̄ akọn̄ kan̄ ya ìkachieek, mije ukpook îtet ọmọ enenen. Eya orọ, Sọọlu omọmọnọ oge akọn̄ òkup ọmọ me ubọk iyaka igwuun̄ me lek kan̄, mè inan̄a irọn̄ ikeme, mè isa me ikeya ikpan̄ lek kan̄.

⁵Mgbọ ogwu òkiben nroon̄ akọn̄ kan̄ ya omun̄be ibe ke Sọọlu îkwu, ọmọ si owọwọọk oge akọn̄ kan̄ iyaka igwuun̄ me lek kan̄, mè inan̄a irọn̄ ikeme, mè ikwu.

⁶Sa me ikeyi ke Sọọlu okwu, ọmọ melek bọn ebirieen̄ ita kan̄, melek otutuuk ebi uwu kan̄.

⁷Mgbọ otutuuk ebi Ijeren ebi ìluk me iteke ijọn̄ Jesereli emun̄be ibe ke ebi akọn̄ Ijeren mîliliin̄ isan̄a me isi akọn̄, mè imun̄ si ibe ke Sọọlu mè ebi bọn mîkwaan̄, ema enanan̄a itele ama kiban̄, mè ililiin̄ iweek ere itap ibot. Ebi Filisia enunu, mè ininin̄ emen ama cha iluk.

⁸Me ofit iwele, mgbọ ebi Filisia enube ibenigbala inu òkup me lek ebi ìkwakwaan̄ me isi akọn̄ ya, ema emumun̄ nkwukwu kè Sọọlu mè echi bọn ebirieen̄ ita kan̄ elilambe me inyọn̄ ogoon̄ Gilibowa.

⁹Enenigbala inu ema emun̄be me lek kè Sọọlu, mè ifieek ibot kan̄, mè ikpulu si otutuuk nroon̄ akọn̄ kan̄, mè iria ebi osat ikana otutuuk ido Filisia me isi yọk me isi yọk, mè etete otutuuk ebi kiban̄, ibe esi elook etip mkpa kè Sọọlu mè ntim-mkpan̄ ema etimbe ikpan̄ ebi Ijeren ekana ere.

¹⁰Ema ebeben nroon̄ akọn̄ kè Sọọlu isi isun̄ me isi awaji kiban̄, mè iben ibot kan̄ isi ijeen̄ me uwu yọk kiban̄ ekigwen Dagọn.

¹¹Mgbọ otutuuk ebi ama Jabes òkup me agan̄ Giliadi enọbe otutuuk inu ebi Filisia erọbe Sọọlu,

¹²otutuuk ebirieen̄ ebi ìriọọn̄ ukot akọn̄ me ama Jabes enanan̄a isibi isi iben nkwukwu kè Sọọlu mè echi ebi bọn isa ika inu Jabes, mè inifuun̄ ukwuuk kiban̄ me irak nga uti ile ge òkup me ama ya, mè ifieek ejit inyi ema usen jaaba.

¹³Sọọlu ìkwu mije ìkakirọ atikọ melek Okumugwem. Ìkakirọ ida ikọ Okumugwem; ògak ge, îsi isi ido ido-inu me otu ogwu nriran ekwukwu jom-jòm, mè ibọkọ nteme me otu kan̄,

¹⁴ìkado ida Okumugwem. Eya orọ, Okumugwem okpakpan̄ ọmọ, mè ikana mkpulu ido inyi Debit gwun̄ kè Jesi.