Read obolo I Mfuf 12 Bible Online

I Mfuf 12 - obolo bible

I Mfuf 12

¹Îkaan̄ ebi akọn̄ ìnunu me lek kè Debit me Sikilagi, mgbọ îlibibe inwọnọ me ubọk kè Sọọlu gwun̄ kè Kis (ema me lek ebi usọ akọn̄ ebi ìkitap ubọk itim akọn̄ ya inyi Sọọlu.

²Ema otutuuk ekakaan̄ ogbaan̄ kiban̄ me ubọk isa igbaalek inu. Ema ìre ife ìkisa ubọk agan̄ ulom mè agan̄ ujit isook oraan̄, mè ikisa si itọbọ ewuuk me emen olik mgbọlọ. Ema ìre ebi otoko kè Benjamin, bọn ulọk melek Sọọlu.) Ema ìre:

³Ayejeri ogwu ibot kiban̄, mè Jowas, ema bọn ebirieen̄ kè Semaya ogwu Gibiya; mè Jejien mè Pelet bọn ebirieen̄ kè Ajimabet; mè Beraka, mè Jewu ogwu Anatọt,

⁴mè Isimaya ogwu Gibiọn, ogwu ilile ge me etete ebi Akọp Ebi Usọ Akọn̄ Ita cha, mè ire si ogwu ibot inyi Akọp Ebi Usọ Akọn̄ Ita cha; mè Jerimaya, mè Jayajien, mè Joyanan, mè Josabadi ogwu Gedera,

⁵mè Elujai, mè Jerimot, mè Beyalia, mè Semariya, mè Sefatiya ogwu Arufu;

⁶mè Elikana, mè Isiya, mè Ajaren, mè Joyejeri, mè Jasobeyam ogwu Kora;

⁷mè Jowela, mè Jebadiya bọn ebirieen̄ kè Jeroyam ogwu Gedoru.

⁸Usini ebi otoko kè Gadi mîgọọk inu si me lek kè Debit me okwukwek akọn̄ ya me emen èwê. Ema ìre ebi usọ akọn̄ ìbebem lek akọn̄ mgbọ geelek, ebi ìkiben agbọ mè otunwa isibi isi akọn̄. Isi kiban̄ ìkitet ene ukpook kubọk isi egbe àtat, sà ukot kiban̄ okifet me inyọn̄ ogoon̄ kubọk ukot ogaan̄.

⁹Ejeri ore ogwu ibot kiban̄, Obidaya ore ogwu òso iba, Eliabu onenire ogwu òso ita,

¹⁰Misimana onenire ogwu òso ini, Jerimaya onenire òso go,

¹¹Atai onenire ogwu òso gweregwen, Elien onenire ogwu òso jaaba,

¹²Joyanan onenire ogwu òso jeeta, Elijabadi onenire ogwu òso onaan̄ge,

¹³Jerimaya onenire ogwu òso akọp, Makibanai onenire ogwu òso akọp mè ge.

¹⁴Ebi otoko kè Gadi chi ìre ebi ibot akọn̄. Ogwu òsisiki ichit me etete kiban̄ môkọt ikeke ida efit ebi akọn̄, ogwu òmimin ichit môkọt ikeke ida obop ebi akọn̄.

¹⁵Ebibi ere ebi ìsasaba okwaan̄ Jodan me adasi onyan̄ mgbọ okwaan̄ Jodan obaakbe imeen̄ otutuuk agba kan̄ agan̄ iba, mè isi irieen̄ ebi ìkiluk me iteke ijọn̄ agba okwaan̄ ya, mè ililaba ife cha ifon agan̄ mbum-ura mè agan̄ ichep-ura.

¹⁶Usini ebi otoko kè Benjamin mè usini ebi otoko kè Juda mîgọọk inu si me lek kè Debit me okwukwek akọn̄ kan̄ ya.

¹⁷Debit onenisibi isi ikweek ema, mè initumu inyi ema ibe, “Ire enyi enu me esuuk, inenitap ubọk inyi emi, mbọkọ enyi itap, inyi emi melek kinyi egbaan̄ ere ge. Ire, ire enyi enu ibenileke emi itap me ubọk ebi ochicha n̄a, me nkaweekge enyi ikọ geege, kè Awaji ebi nte nte kiji iriọọn̄, mè ikpe enyi mkpukpe.”

¹⁸Ekwukwu Awaji oninin̄ emen kè Amasai, ogwu ibot Akọp Ebi Usọ Akọn̄ Ita cha, inenitumu ibe: “Debit, eji ìre ebi kwun̄! Owu gwun̄ kè Jesi, eji ekup inyi owu! Esuuk, iin̄, esuuk ikup inyi owu, esuuk ikup inyi ebi ìkitap ubọk inyi owu, mije, Awaji kwun̄ ore ogwu ntap-ubọk kwun̄.” Debit onenibọkọ ema itap, mè inisa ema ito me ibot ebi ìkisi enun̄unun̄ afa inyi ọmọ.

¹⁹Usini ebi otoko kè Manasi mîkana si igọọk Debit mgbọ Debit ogọọkbe ebi Filisia ijibi akọn̄ isi itim me lek kè Sọọlu. (Me atikọ, Debit melek ebi kan̄ kpetap ubọk inyi ebi Filisia me akọn̄ ya, mije, ebi ibot ebi Filisia mînin̄ otitọt, mè itumu ifieek ibe Debit ikagọọk ema ìsi, ke môkọt ikana igọọk Sọọlu nte uwu kan̄, mè ileke ema inyi ekpan̄ esan̄a.)

²⁰Mgbọ Debit orebe Sikilagi, usini ebi otoko kè Manasi ekakana igọọk ọmọ. Erieen̄ kiban̄ ìre: Adina, mè Josabadi, mè Jediyayen, mè Maiken, mè Josabadi, mè Eliyu, mè Siletai. Ema, me ene me ene, ìre ebi ibot obop obop ebi akọn̄ me otoko kè Manasi.

²¹Ema mîtap ubọk inyi Debit enenen me igbagban ebi enun̄unun̄ afa me lek kan̄, mije, ema otutuuk ene ìre ebi usọ akọn̄ ìrọriọọn̄ ukot akọn̄. Debit onenirọ ema ebi ibot akọn̄ kan̄.

²²Egwe geelek, ayaya ebi akọn̄ ekpọkpọ ikinu initap ubọk inyi Debit, mege urum ebi akọn̄ kan̄ onenimin enenen kubọk urum ebi akọn̄ Awaji.

²³Otu ifuk ebi ibot akọn̄ ìkakana igọọk Debit me Eburọn, inyi ema enekana mkpulu kè Sọọlu enyi Debit, ike Okumugwem otumube ìre ikeyi:

²⁴Ebi Juda ebi ìkiben agbọ me otunwa, obop ene gweregwen mè efit jeeta, melek òjot òjot nroon̄ akọn̄ kiban̄;

²⁵ebi otoko kè Simiọn, ebi ìriọọn̄ ukot akọn̄, mè ibem lek akọn̄, obop ene jaaba mè efit ene ge;

²⁶ebi otoko kè Libai, obop ene ini mè efit gweregwen,

²⁷igbaalek kè Jeyoyada ogwu ibot ototun̄ ukan̄ kè Erọn, melek obop ebirieen̄ ita mè efit jaaba,

²⁸mè Jadọk, gwun̄ enerieen̄ òkwakwaak chieen̄, mè iriọọn̄ si ukot akọn̄, ọmọ melek akọp ebi ibot akọn̄ iba mè iba ebi ototun̄ ukan̄ kiban̄;

²⁹ebi otoko kè Benjamin, ebi owot iman kè Sọọlu, obop ebirieen̄ ita, owuwa ene me etete kiban̄ ekisisiki si ibot inyi Sọọlu mege ire mgbọ ya;

³⁰ebi otoko kè Iferem, ebi ìriọọn̄ ukot akọn̄, mè ikitaan̄ etip me owot iman kiban̄, akọp obop ene iba mè efit ene jeeta;

³¹ebi ìkike iba otoko kè Manasi, ebi egobobe isibi me erieen̄ me erieen̄ ibe enegọọk erọ Debit ubọọn̄, akọp mè obop ene jeeta;

³²ebi otoko kè Isaka, ebi ìkisa ubọk inu okupbe me ibot mgbọ ikiriọọn̄ inu òbomọnọ irek, mè iriọọn̄ si inu ògbegbe ibe ebi Ijeren erọ, efit ebi ibot iba, melek otutuuk ebi owot iman kiban̄ ebi ema ekikpulu;

³³ebi otoko kè Jebulọn, ebi usọ akọn̄ ìbebem lek akọn̄ mgbọ geelek, melek chieen̄ nroon̄ akọn̄ geelek, ebi ìnu inenitap ubọk inyi Debit me otutuuk ejit kiban̄, akọp obop ene go;

³⁴ebi otoko kè Nafitali, obop ebi ibot akọn̄, igbaalek akọp obop ebi akọn̄ ita mè obop jaaba, ebi ìriọọn̄ ubọk ekisa agbọ mè otunwa itim akọn̄;

³⁵ebi akọn̄ otoko kè Dan, ebi ìbebem lek akọn̄, akọp obop ene iba mè obop jeeta, mè efit ene gweregwen;

³⁶ebi otoko kè Ase, ebi usọ akọn̄ ìbebem lek akọn̄ mgbọ geelek, akọp obop ene ini;

³⁷ebi usaba okwaan̄ Jodan agan̄ mbum-ura, ìrere ebi otoko kè Ruben, mè otoko kè Gadi, mè ìkike iba otoko kè Manasi, melek otutuuk chieen̄ nroon̄ akọn̄ geelek, efit obop ene mè akọp obop iba.

³⁸Otutuuk ife chi ìre ebi ìriọọn̄ ukot akọn̄ ìsasa lek kiban̄ inyi ijeje me isi akọn̄. Ema enu Eburọn me otutuuk ejit kiban̄ inenirọ Debit ubọọn̄ otutuuk Ijeren. Ikeya si, otutuuk ebi Ijeren kechilọ esasa me ejit ge ichieek ibe erọ Debit ubọọn̄.

³⁹Ebi akọn̄ chi egọgọọk Debit ikup otuuk kè egwe ita, ikirie mè ikinwọ, mije, ebi uwu kiban̄ mîsa inorie mè miin̄ ijet ema.

⁴⁰Ebi ngwan̄ kiban̄ si, ebi ìnan̄a me agan̄ ebi otoko kè Isaka, mè agan̄ ebi otoko kè Jebulọn, mè agan̄ ebi otoko kè Nafitali mînan̄a me karake ujọn̄ọ ere cha igọọk inu, mè itoon̄ inorie me inyọn̄ ebi kè inyinya akpan, mè aligọ, mè inyinya mgbidim ukot, mè inyọn̄ orie eriembuuk isa inu me ere ya. Esasa akpa ekọkọk, mè nchicha figi, mè nchicha gerep, mè miin̄, mè aran̄, mè eriembuuk, mè arọọn̄ inu ijot ere gboi, mije, ebi Ijeren ekirie ikpele ijọk.