Read obolo I Mfuf 13 Bible Online

I Mfuf 13 - obolo bible

I Mfuf 13

¹Debit onenitọt otitọt melek ebi ibot akọn̄ kan̄ ebi ìkikpulu obop obop ebi akọn̄, mè ebi ìkikpulu efit efit ebi akọn̄, me ene me ene.

²Inenitumu inyi otutuuk ebi Ijeren ìtititiin̄ ibe, “Ire môneme enyi, mè ire inire si nkeek Okumugwem Awaji kiji, mônwọn ibe eji eria etip ekana otutuuk inyọn̄ ijọn̄ ebi Ijeren egween̄ ebi ngwan̄ kiji me ere geelek, mè egween̄ si ebi ngwugwa mè ebi otoko kè Libai ebi ìluk me etete kiban̄ me ama geelek mè ebi ìluk me asabọn ama òkup me ijọn̄ urie anam, ibe enu enetitiin̄ melek kiji,

³mè eji esi eben okop inyan̄a-ibot Awaji kiji esa eka enu, inyi inikup melek kiji, mije, eji mîkpọ chieen̄ ilọ me lek karake ukot kè Sọọlu.”

⁴Otutuuk ntitiin̄ ama echechieek ibe ke mêrọ inu yi, mije, ke îtat me lek otutuuk ene.

⁵Debit oneniria ikwaan̄ igwen otutuuk Ijeren, bene me lek ebi ìluk me agba okolo Siyoru me Ijipiti isi ire lek ebi ìluk me Lebo Amat, ibe enu inyi esi eben okop inyan̄a-ibot Awaji me Kiriat Jiarim esa eka.

⁶Debit mè otutuuk Ijeren enenigbaan̄ ije isi ama Bayala, òrere Kiriat Jiarim, me Juda isi iben okop inyan̄a-ibot Awaji, eyi ekigwen ibak Erieen̄ Okumugwem ogwu òkweek irek me ogboon̄ ubọọn̄ me etete ebi mbem emen inyọn̄.

⁷Ema eniniben okop inyan̄a-ibot Awaji ya itoon̄ me inyọn̄ ayaya uji ekpirikpo isa ikinan̄a me uwu kè Abinadap isibi. Uja mè Ayio ekekisa uji ekpirikpo ya ikije.

⁸Debit mè otutuuk ebi Ijeren ekekikọt okwa, mè ikijop okwa me otutuuk efuuk kiban̄ me isi Okumugwem, mè ikikwak uneen̄ ile, mè uneen̄ ija, mè ekpete, mè mkpamkpa, mè ikiwut otita.

⁹Mgbọ ema ejebe inire ere igen̄ akpa me Kidọn, ukot eriembuuk cha òkitaba uji ya okwakwala, Uja onyanyana ubọk itet okop inyan̄a-ibot ya, inyi ikanan̄a ìrọn̄.

¹⁰Okumugwem onanaan̄ ejit enenen inyi Uja, mè isulu ọmọ ito me ijọn̄, ikwukwu mgbọ yaage me isi Awaji, mije îchakbe ubọk me lek okop inyan̄a-ibot ya.

¹¹Debit onanaan̄ ejit enenen mije Okumugwem ochilibe unaan̄-ejit kan̄ ibook me lek kè Uja. Debit onenigwen ere ya Pereji Uja,[29] Ikeya ke ekigwen ere ya mege inire chereyi.

¹²Ukpook Awaji onenitet Debit enenen me usen ya, itutumu ibe, “Ire ikeya, ìre emi m̀banijeje ikọt isa okop inyan̄a-ibot Awaji ifo ere nkupbe?”

¹³Debit ìkayaka ìsa okop inyan̄a-ibot ya ìfo, inyi isi ikup melek kan̄ me ama kè Debit. Kpan̄asi ikeya, isasa okop inyan̄a-ibot ya igba uwu kè Obedi-Edọm ogwu Gat isi iyik itele.

¹⁴Okop inyan̄a-ibot Awaji ya obabia me uwu kè Obedi-Edọm otuuk kè onyan̄ ita. Okumugwem onenigbana ebi uwu kè Obedi-Edọm, mè igbana si otutuuk inu geelek îkaan̄be.