Read obolo I Mfuf 14 Bible Online

I Mfuf 14 - obolo bible

I Mfuf 14

¹Ike mgbọ ge, Iram ogwu ubọọn̄ Taya oneniria osat inu me lek kè Debit, mè iria si owuwa uti olik, mè ebi usọ ikwaan̄ ewuuk melek ebi usọ ikwaan̄ uti igbaalek, ibe enenama uwu ogwu ubọọn̄ enyi Debit.

²Debit oneniriọọn̄ ibe ke Okumugwem îrọ ọmọ inye kubọk ogwu ubọọn̄ otutuuk Ijeren, mè ibene ama ubọọn̄ kan̄ igwuun̄ mije ebi Ijeren ìrere ebi eyi Okumugwem.

³Debit onenido si ofifi ebibaan̄ me Jeruselem me lek nwa, mè ibon owuwa bọn ebirieen̄ mè bọn ebibaan̄.

⁴Bọn ebi îbonbe me Jeruselem ìre: Samuwa, mè Sobabu, mè Netan, mè Solomọn,

⁵mè Ibari, mè Elisuwa, mè Elipelet,

⁶mè Noga, mè Nefegi, mè Jafiya,

⁷mè Elisama, mè Beliada,[30] mè Elifelet.

⁸Mgbọ ebi Filisia enọbe ibe ke mîrọ Debit ubọọn̄ otutuuk Ijeren, ema etititiin̄ lek, mè ijibi akọn̄ ikikana iweek ọmọ. Debit onọnọ, mè ijibi akọn̄ si isibi isi ikweek ema.

⁹Ebi Filisia enunu me iteke Refayim, mè inichichim inu me ere cha.

¹⁰Debit onenido Awaji ibe, “Ìre ǹjibi akọn̄ ǹsi ǹtim me lek ebi Filisia chi? Ìre owu môyaka ema itap emi me ubọk?” Okumugwem ofọfọọk ọmọ ibe, “Iin̄, si, ke mâkana ema itap owu me ubọk.”

¹¹Debit onenisa ebi kan̄ ijibi akọn̄ isi Baali-Perajim, mè itim ikpan̄ ebi Filisia me ere ya. Mije keya ke înibe, “Awaji îsa me ubọk n̄a ibum itibi ebi ochicha n̄a, kubọk mun̄ obum itibi mgban.” Eya orọ ekigwen ere ya Baali-Perajim.[31]

¹²Ebi Filisia elilim itele mkpọmfaka kiban̄ me ere ya, Debit onyinyi ida, ebi akọn̄ kan̄ etatap ukan̄ iwọp mkpọmfaka cha.

¹³Ebi Filisia ekpọkpọk inu enun̄unun̄ me iteke ya si.

¹⁴Debit okpọkpọk ido ida Awaji, Awaji ofọfọọk ọmọ ibe, “Kasibi ìsi isi mè isi. Je kana me agan̄ udun̄ kiban̄, mè jibi akọn̄ ya nin̄ ema lek me usaba agan̄ ere uti balisam okekebe cha.

¹⁵Enyi isinọ ida ukot ebi akọn̄ ekije me ebek uti balisam cha, ìjibi akọn̄ ìnin̄ mgbọ yaage, mije, eya ìkijeen̄ ibe ke Okumugwem îra isibi inu inije me isi kinyi, isisi itim akọn̄ me lek ebi Filisia.”

¹⁶Debit onenirọ ike Awaji onyibe ọmọ ida, mè isa me ikeya itim ikpan̄ ebi akọn̄ Filisia, ibene me Gibiọn mege isi igwook me Gejeri.

¹⁷Sa me ikeya, etip kè Debit otataan̄ ikana otutuuk lek ijọn̄ ya, Okumugwem orọrọ inyi ukpook kè Debit itet otutuuk ebi ido geelek.