Read obolo I Mfuf 15 Bible Online

I Mfuf 15 - obolo bible

I Mfuf 15

¹Debit oneninama owuwa uwu inyi lek kan̄ me ama kè Debit, mè ininen̄e si ere isun̄ inyi okop inyan̄a-ibot Awaji, mè igwuun̄ uwu ọfọ inyi.

²Debit oneninyi ida ibe, “Ilọ me lek ebi otoko kè Libai, kpunu ebi geege ìgbegbe ibeben okop inyan̄a-ibot Awaji, mije îre ema ke Okumugwem ogobo ibe ekeben okop inyan̄a-ibot Okumugwem, mè ekesi ikwaan̄ enyi ọmọ isi ire mgbọ geelek.”

³Debit onenigwen otutuuk ebi Ijeren ititiin̄ me Jeruselem, inyi enesi eben okop inyan̄a-ibot Okumugwem esa eka enesun̄ me ere înen̄ebe isun̄ inyi.

⁴Îgwen ebi owot iman kè Erọn melek ebi otoko kè Libai ititiin̄:

⁵Ebi owot iman kè Koyat: Uriyen ogwu ibot, melek efit mè akọp ene iba, ebi ngwan̄;

⁶ebi owot iman kè Merari: Ajaya ogwu ibot, melek efit ene iba mè akọp iba, ebi ngwan̄;

⁷ebi owot iman kè Gesiọm: Juwen ogwu ibot, melek efit ene mè akọp ita, ebi ngwan̄;

⁸ebi owot iman kè Elisafan: Semaya ogwu ibot melek efit ene iba, ebi ngwan̄;

⁹ebi owot iman kè Eburọn: Elien ogwu ibot, melek akọp ene jeeta, ebi ngwan̄;

¹⁰ebi owot iman kè Ujiyen: Aminadap ogwu ibot, melek efit mè akọp mè ene iba, ebi ngwan̄;

¹¹Debit onenigwen Jadọk mè Abiata ebi ngwugwa, mè igwen si Uriyen, mè Ajaya, mè Juwen, mè Semaya, mè Elien, mè Aminadap ebi otoko kè Libai igbaalek,

¹²mè initumu inyi ema ibe, “Enyi ere ebi ibot inyi owot iman geelek eyi otoko kè Libai. Enyi melek ebi otoko kè Libai kechilọ, ìgwọk lek kinyi, mè ìsi ìben okop inyan̄a-ibot Okumugwem, Awaji ebi Ijeren, ìsa ìnisun̄ me ere nnen̄ebe isun̄ inyi.

¹³Îre mije ikarege enyi eben okop ya me adasi mgbọ ke Okumugwem Awaji kiji onaan̄ ejit ikeme eji ijo ijo. Eji si kpedodo ida Okumugwem, inyi eji eriọọn̄ ubọk ebekọt isa okop ya ika.”

¹⁴Ebi ngwugwa mè ebi otoko kè Libai enenigwọk lek, inyi ema mêkọt isi isa okop inyan̄a-ibot Okumugwem, Awaji ebi Ijeren, ika.

¹⁵Ema enenisi, mè isa ogbugboon̄ irak okop inyan̄a-ibot Awaji ya ibene itoon̄ me oguga kiban̄, igọọk me ike Okumugwem onyibe Mosis ida ibe ekerọ.

¹⁶Debit onenitumu inyi ebi ibot owot iman geelek me otoko kè Libai ibe egobo ebi ngwan̄ kiban̄ ebi ìkikọt okwa, inyi ekekọt okwa unwọọn̄, mè ekekwak uneen̄ ile, mè uneen̄ ija, mè mkpamkpa etap me lek.

¹⁷Ebi otoko kè Libai enenigobo Eyiman gwun̄ kè Juwen, igbaalek ebi ngwan̄, ìrere Asafu gwun̄ kè Berekaya, mè Etan gwun̄ kè Kusaya ogwu owot iman kè Merari,

¹⁸melek ebi ngwan̄ kiban̄ ebi ìgọọk ema me udun̄ me irek ikwaan̄, ìrere: Jekaraya, mè Ben, mè Jeyajien, mè Semiramot, mè Jeyen, mè Uni, mè Eliabu, mè Benaya, mè Maseya, mè Matitiya, mè Elifeleyu, mè Mikineya, mè Obedi-Edọm, mè Jeyien, ebi ìkibem otunchit.

¹⁹Ebi ìkikwak nkwukwak: Eyiman, mè Asafu, mè Etan ebekikwak mkpamkpa echi esabe ekwe irọ;

²⁰Jekaraya, mè Ajiyen, mè Semiramot, mè Jeyen, mè Uni, mè Eliabu, mè Maseya, mè Benaya ebekikwak uneen̄ ija ikpọ me lek ida alamot;

²¹Matitiya, mè Elifeleyu, mè Mikineya, mè Obedi-Edọm, mè Jeyien, mè Ajajiya ebekikwak uneen̄ ile igọọk me ida seminit;

²²Kenaya ogwu ibot me otoko kè Libai okikpọ chieen̄ me lek ebi ìkikọt okwa; ikwaan̄ kan̄ ire eya, mije îkaan̄ ida.

²³Berekaya mè Elikana ebekibem otunchit ere esun̄be okop inyan̄a-ibot ya.

²⁴Sebaniya, mè Josafat, mè Netanen, mè Amasai, mè Jekaraya, mè Benaya, mè Elieja ebi ngwugwa ebekiwut otita ikije me isi okop inyan̄a-ibot Awaji ya. Obedi-Edọm mè Jeyiya ebekibem si otunchit ere esun̄be okop inyan̄a-ibot Awaji.

²⁵Debit mè ebi ugane Ijeren mè ebi ibot akọn̄ ìkikpulu obop obop ebi akọn̄ eneninan̄a ije isi isa okop inyan̄a-ibot Okumugwem inan̄a me uwu kè Obedi-Edọm ika inu Jeruselem me ubelejit.

²⁶Enenigwu eriembuuk jaaba, me igwu si orie arọọn̄ jaaba isa igwa ngwugwa, mije ke Awaji îtap ubọk inyi ebi otoko kè Libai ebi ìbeben okop inyan̄a-ibot Okumugwem ya.

²⁷Debit ìtap uga àwurukù inyọn̄ esabe lilin̄ ichim, ọmọ melek otutuuk ebi otoko kè Libai ebi ìbeben okop inyan̄a-ibot ya, mè otutuuk ebi ìkọt okwa, melek Kenaya ogwu ibot otutuuk ebi okwa. Ire, Debit otatap si mgbidim ofọnti ikwaan̄ ebi ngwugwa eyi esabe si lilin̄ ichim itoon̄ me inyọn̄ àwurukù kan̄.

²⁸Otutuuk ebi Ijeren ekekidimi ukpo unwọọn̄, mè ikiwut odu iko orie arọọn̄, mè ikiwut otita, mè ikikwak si mkpamkpa, mè ikikwak uneen̄ ile mè uneen̄ ija ikisa iben okop inyan̄a-ibot Okumugwem ika.

²⁹Mgbọ ekisa okop inyan̄a-ibot Okumugwem ikiraka inin̄ ama kè Debit, Mikali gwun̄ enenwaan̄ kè Sọọlu okukup me otu nruruk ikikpọ. Mgbọ îmun̄be Debit ogwu ubọọn̄ okijop okwa, mè ikinwọọn̄ unwọọn̄, ikpọkpọ ọmọ chieen̄ isiki me emen ejit kan̄.