Read obolo I Mfuf 16 Bible Online

I Mfuf 16 - obolo bible

I Mfuf 16

¹Ema enenisa okop inyan̄a-ibot Awaji ya inu initap me emen uwu ọfọ Debit ogwuun̄be inyi, mè inigwa ngwugwa echi ewọwọp iriọk melek echi esuuk inyi Awaji.

²Mgbọ Debit ogwabe ngwugwa echi ewọwọp mè echi esuuk cha isan̄a, inenisa erieen̄ Okumugwem igbana otutuuk ebi Ijeren,

³mè iniche owut fituru ge ge, mè nchicha mfut asaak, mè nchicha gerep ge ge inyi otutuuk ebi Ijeren geelek, ebirieen̄ mè ebibaan̄.

⁴Inenigobo usini ebi otoko kè Libai ito me ere okop inyan̄a-ibot Okumugwem ya okupbe ibe ekesi ikwaan̄ eyi ibebeek mbeek, mè itọtọn̄ Okumugwem, Awaji ebi Ijeren, mè ibebe ọmọ onirọ me ibot otutuuk ebi Ijeren.

⁵Asafu ore ogwu ibot, Jekaraya ogọgọọk, sabum Jeyen, mè Semiramot, mè Jeyien, mè Matitiya, mè Eliabu, mè Benaya, mè Obedi-Edọm mè Jeyen. Ebibi ebekikwak uneen̄ ile mè uneen̄ ija, sà Asafu obokikwak mkpamkpa.

⁶Benaya mè Jayajien ebi ngwugwa ebekiwut otita mgbọ geelek me isi okop inyan̄a-ibot Awaji.

⁷Usen ya ore adasi mgbọ Debit ojeen̄be Asafu mè ebi melek kan̄ ibe ekekọt okwa itọn̄ yi esa eketọn̄ Okumugwem:

⁸Ìbe Okumugwem onirọ, ìtumu erieen̄ kan̄ ìsibi; ìkpa inu îrọbe ìkana ido geelek.

⁹Ìkọt okwa ìnyi ọmọ, ìkọt okwa ìtọn̄ ọmọ; ìkpa otutuuk uyeke uyeke ikwaan̄ kan̄ ìsibi.

¹⁰Ìsa erieen̄ kan̄ òkup me mbuban ìgugo lek; ebi geelek ìkiriaak ọmọ, ìbele ejit.

¹¹Ìweek Okumugwem, mè ìweek si unye kan̄; ìkiweek ntap-ubọk kan̄ mgbọ geelek.

¹²Ìkeek uyeke uyeke inu cha îrọbe, inu ukechieen̄ kan̄ cha, mè ata oyerebet cha îfieekbe,

¹³enyi bọn owot iman kè Ijeren ogwu ikwaan̄ kan̄, enyi bọn ebirieen̄ kè Jekọp, ebi îgobobe inyi lek kan̄.

¹⁴Ọmọ ore Okumugwem Awaji kiji; ikan kan̄ okikpulu me otutuuk linyọn̄.

¹⁵Ìkikekeek inyan̄a-ibot înyan̄abe ire mgbọ geelek,[32] use îchieekbe ìkikukup ire obop ukot,

¹⁶òrere inyan̄a-ibot înyan̄abe melek kè Ebereyam; mè use kan̄ îchieekbe Ajiki.

¹⁷Îrọ use ya inye inyi Jekọp kubọk ikan kan̄, mè irọ inye inyi ebi Ijeren kubọk inyan̄a-ibot òbokup ire mgbọ geelek.

¹⁸Mgbọ ya ke îtumube ibe, “Mâsa ijọn̄ Kenan inyi owu; môre ìrot inyi bọn owot iman kwun̄.”

¹⁹Me ike mgbọ ya, ema ìre ene inen me inen gaalek; kpewawa me otu ifuk; mè ire si ebi ichen me ijọn̄ Kenan ya.

²⁰Ema ekijijijen̄e ikana ere inan̄a me ido ire me ido, mè inan̄a me ama ubọọn̄ ge isi ofifi.

²¹Ire, Awaji ìkachieek ibe ene geege itutuku ema; ìkigagana ikọ inyi ebi ubọọn̄ me ibot kiban̄ ibe:

²²“Ikalululuk ìchak ubọk me lek ebi ngobobe inyi lek n̄a; ikasasak si ebi nriran n̄a unan geege me lek!”

²³Ìkọt okwa ìnyi Okumugwem, enyi otutuuk ebi linyọn̄; me usen me usen, ìkilook etip unyan̄a kan̄ îkinyan̄a ene.

²⁴Ìkpa umin kan̄ ìkana ìnyi ebi ido geelek; ìkpa si uyeke uyeke ikwaan̄ kan̄ ìnyi otutuuk ebilene.

²⁵Okumugwem îmin enenen, mè igbe ogwu ebetọn̄ enenen; ọmọ ogbe ibe etet ukpook me lek igak otutuuk ofifi awaji geelek.

²⁶Mije, otutuuk awaji ebi ofifi ido geelek ìre mkpọmfaka, ire, Okumugwem, ọmọ orom akpabin inyọn̄.

²⁷Òrirọ mè umin ubọọn̄ ìkakana ọmọ okokop; unye melek unwọọn̄ ìjojot me Uwu Mbuban kan̄.

²⁸Enyi ebi ototun̄ ukan̄ geelek me linyọn̄, ìnyi Okumugwem umin; ìtumu ìsibi ibe ke Okumugwem okaan̄ unye.

²⁹Ìnyi Okumugwem umin ògbegbe erieen̄ kan̄. Ìben akpan ngwugwa ìsa ìnu me isi kan̄; ìtọbọ ebum ìnyi ọmọ, mije, ọmọ îkup mbuban me oniin̄ òkup òrirọ òrirọ.

³⁰Enyi otutuuk ebi linyọn̄, ìtet ukpook me isi kan̄! Ọmọ îsun̄ linyọn̄ ikam me irek; kpebekọt ijujuk isan̄a me akpat.

³¹Akpabin inyọn̄, bele ejit; linyọn̄, nwọọn̄ unwọọn̄; ìkilook ido geelek ibe ke Okumugwem òwa me mkpulu!

³²Okwaan̄, owu si, melek inu geelek òkup me emen kwun̄, bele ejit, mè gbugbut. Ijọn̄ uko, owu si, melek inu geelek òkup me emen kwun̄, bele ejit!

³³Otutuuk uti òkup me oron mônenikikọt okwa inwọọn̄ unwọọn̄; ema mêkọt okwa unwọọn̄ me isi Okumugwem, mije, ọmọ ògwa òkinu inenisibi oyerebet inyi ebi linyọn̄.

³⁴Ìbe Okumugwem onirọ, mije ke ọmọ înwọn, mije, imumechieen̄ kan̄ ìkikukup ire mgbọ geelek.

³⁵Ìtumu ìnyi ọmọ ibe, “Nyan̄a eji, jei Awaji ogwu unyan̄a kiji; titen̄e eji me ido geelek sa gwu kom ka, inyi eji ebe owu onirọ, mè etọn̄ erieen̄ mbuban kwun̄, mè esa owu egugo lek.”

³⁶Itọn̄ ikup inyi Okumugwem, Awaji ebi Ijeren, bene me mgbọ geelek si re mgbọ geelek. Otutuuk ebi ene enenichieek igwook ibe, “Ikup ikeya!” mè itumu si ibe, “Ìtọn̄ Okumugwem.”

³⁷Debit onenito Asafu mè ebi ngwan̄ ibe ekup ekesi ikwaan̄ usen geelek me ere okop inyan̄a-ibot Okumugwem ya okupbe, ike edọmọbe isun̄.

³⁸Debit îto si Obedi-Edọm mè akọp ebi ngwan̄ gweregwen mè jeeta ibe egọọk ekesi ikwaan̄ me ere ya. Obedi-Edọm gwun̄ kè Jedutun melek Osa ere ebi ìkibem otunchit.

³⁹Debit îgobo si Jadọk ogwu ngwugwa mè ebi ngwan̄ ito ibe ekesi ikwaan̄ enyi Okumugwem me Akpatan̄ Mbuban me ere mbuban me Gibiọn,

⁴⁰mè ekegwa ngwugwa ewọwọp iriọk me inyọn̄ ntook ngwugwa enyi Okumugwem mgbọ geelek, me ewelegwe mè ikakwun̄, igọọk me otutuuk inu egebe me emen Ikan Okumugwem, eyi înyibe ebi Ijeren.

⁴¹Ebi ìkitap ubọk inyi ema ìre Eyiman mè Jedutun, igbaalek ofifi ebi geelek egobobe mè igwen me erieen̄ ibe egọọk eketọn̄ Okumugwem, “mije, imumechieen̄ kan̄ ìkikukup ire mgbọ geelek.”

⁴²Ikwaan̄ iwuwut otita mè ikwakwak mkpamkpa, mè ikwaan̄ ikwakwak nkwukwak mgbọ ekikọt okwa itọn̄ inyi Awaji ìkup me ubọk kè Eyiman mè Jedutun. Bọn ebirieen̄ kè Jedutun ke eto ibe ekebem otunchit.

⁴³Mgbọ erọbe inu chi geelek isan̄a, ebi ene eyayat, ogwu ikup, ofo uwu kan̄. Debit si ofofo isi igbana ebi uwu kan̄.