Read obolo I Mfuf 17 Bible Online

I Mfuf 17 - obolo bible

I Mfuf 17

¹Mgbọ Debit okanabe isi iluk me uwu ubọọn̄ kan̄, inenigwen Netan ogwu nriran itumu inyi ibe, “Kpọ-nu! Emi ǹkiluk me emen uwu esabe uti olik inama. Ire, okop inyan̄a-ibot Okumugwem ìkup me emen atanga.”

²Netan onenifọọk Debit ibe, “Inu geelek òkup owu me ejit, rọ, ke Awaji òwa melek kwun̄.”

³Me eririeen̄ usen ya, Okumugwem onenitumu inyi Netan ibe:

⁴“Si tumu nyi ogwu ikwaan̄ n̄a Debit ibe ke emi Okumugwem m̀be ikeyi: Ìkare owu obonama uwu ere mbaluk.

⁵Bene me usen nsan̄abe ebi Ijeren isibi me Ijipiti mege inire cherekeyi, ǹkararak ìluk me emen uwu. Ǹkiluk me emen atanga mè ìyaka ire me emen akpatan̄.

⁶Karake nkijijen̄e ikana melek otutuuk ebi Ijeren, ìre îkaan̄ ogwu ibot otoko ge me etete ebi ngobobe ibe ekekpọ chieen̄ me lek ebi n̄a, ebi Ijeren, ogwu ntumube inyi ibe, ‘Keke orọ enyi kpesa uti olik inama uwu inyi emi?’

⁷“Mgbọ yi, tumu nyi Debit ogwu ikwaan̄ n̄a, ibe ke emi Okumugwem Ogwukaan̄ Inyọn̄ mè Ijọn̄ m̀be ikeyi, ‘Emi m̀mọnọ owu me ijọn̄ urie anam, me ere okikpukpo arọọn̄ mè ebot, ibe owu ònokana ogwu òbokikpulu ebi n̄a Ijeren.

⁸Ǹkukup melek kwun̄ me otutuuk jen̄ejen̄e ojijen̄ebe ikana, mè ijijaka otutuuk ebi ochicha kwun̄ isan̄a me isi kwun̄. Mgbọ keyi, mânirọ inyi erieen̄ kwun̄ imin, mè itaan̄ etip kubọk erieen̄ ebi ilile me linyọn̄.

⁹Mâgobo ere isun̄ inyi ebi n̄a Ijeren, mè isun̄ ema me ere ya, inyi inire ere ema ekiluk, mè ene geege ikayaka ìsisaak ema. Ebi ijo ife kpebeyaka ikitutuku ema kubọk erọbe me adasi mgbọ,

¹⁰mè ikirọ si karake mgbọ ntobe ebi oyerebet ibe ekekpulu ebi n̄a Ijeren. Emi mâjijaka ebi ochicha kwun̄ isan̄a kpai. “ ‘Emi Okumugwem ǹkitumu inyi owu ibe ke mârọ ibe uwu kwun̄ isibi.

¹¹Owu osikan ikem, mè ikwu ifo igọọk ebi nte nte kwun̄, mâmọnọ ene ge me lek bọn ìnan̄a me owot kwun̄, isa irọ ubọọn̄ me irek kwun̄, mè irọ inyi mkpulu kan̄ ikeke inye.

¹²Îre gwun̄ kwun̄ ya oboninama uwu inyi emi. Mârọ inyi ogboon̄ ubọọn̄ mkpulu kan̄ ikeke inye ire mgbọ geelek.

¹³Emi mâre ute isa inyi ọmọ, ọmọ môre gwun̄ isa inyi emi. M̀kpasan̄a imumechieen̄ n̄a me lek kan̄ mgbọ geege, kubọk nsan̄abe me lek ogwu òdadasi ikikpulu me isi kwun̄.

¹⁴Mâben ọmọ ito, inyi ikikpulu uwu n̄a mè mkpulu n̄a isi ire mgbọ geelek. Mârọ si inyi ogboon̄ ubọọn̄ kan̄ ikeke inye isi ire mgbọ geelek.’ ”

¹⁵Netan obeben otutuuk ikọ cha Okumugwem otumube melek otutuuk inu cha îchilibe ijeen̄ ọmọ inikpa inyi Debit.

¹⁶Ogwu ubọọn̄ Debit onenisi inin̄ emen atanga ere okop inyan̄a-ibot ya okupbe, mè isiki ikweek irek me isi Okumugwem, mè itumu ibe: “Jei Okumugwem Awaji, ìre ekene ene ke emi nre, sà ìre kpasi ife ke ebi ototun̄ ukan̄ n̄a ere, eyi owu okpukpobe emi mege inire mgbọ keyi?

¹⁷Ire, otutuuk kechi ìyaka inikup kubọk sọntiik inu gaalek me chieen̄ kwun̄, jei Awaji. Owu okpọkpọk initumu si ikọ ofolek ònu-me-isi ebi uwu ogwu usun̄ kwun̄ igbaalek! Jei Okumugwem Awaji, owu òyaka inimọnọ emi kubọk ogwu òbebene ichit me etete ebilene.

¹⁸“Ìre keke ke emi Debit mbayaka itumu inyi owu me lek umin keyi eyi owu onyibe emi ogwu usun̄ kwun̄? Mije, owu oriọọn̄ emi ogwu usun̄ kwun̄ Debit isan̄a.

¹⁹Jei Okumugwem, owu òrọ ikpele inu yi bak me lek ogwu ikwaan̄ kwun̄, igọọk me ike nkeek kwun̄ otọbe, mè iniben otutuuk use chi ikpọk mbum ijeen̄ emi.

²⁰“Jei Okumugwem, kpunu ogwu òbet lek kwun̄, kpukpunu si ofifi Awaji ilọ me lek kwun̄, igọọk me lek inu eji esabe utọn̄ kiji inọ.

²¹Ìre kpasi ido obet lek ebi kwun̄ Ijeren, òrere ido ge gaalek me otutuuk linyọn̄ keyi, eyi Awaji onan̄abe isibi inu inifaka isibi inyi lek kan̄, inyi enekana ebi kan̄, mè isa me ikeya ikaan̄ erieen̄ òtataan̄ etip? Owu orọ ikpele uyeke uyeke inu mije ebi kwun̄ me mgbọ orieen̄be ebi ofifi ido isan̄a me isi ebi kwun̄, ebi owu ofakabe isibi me Ijipiti inyi lek kwun̄.

²²Owu ogobo ebi kwun̄, ebi Ijeren, inyi ema enere ebi kwun̄ ire mgbọ geelek. Owu Okumugwem onenikana Awaji kiban̄.

²³“Eya orọ, mgbọ keyi, Okumugwem, ikọ cha otumube òfo me lek ogwu usun̄ kwun̄ melek ebi uwu kan̄, tele ibe irọ iso mege ire mgbọ geelek. Rọ so ike owu otumube,

²⁴inyi ikeke inye, mè erieen̄ kwun̄ imin, mè itaan̄ etip ire mgbọ geelek. Mgbọ ya, ebi ene mênenikitumu ibe, ‘Okumugwem Ogwukaan̄ Inyọn̄ mè Ijọn̄, ogwu òrere Awaji ebi Ijeren, ọmọ ore Awaji òkikpulu me Ijeren!’ Mgbọ ya, uwu kè Debit ogwu usun̄ kwun̄ mônenikeke inye me isi kwun̄.

²⁵“Owu Awaji n̄a ochili ijeen̄ emi ogwu ikwaan̄ kwun̄ ibe ke owu môrọ inyi uwu n̄a isibi. Eya otap emi ogwu usun̄ kwun̄ efuuk me emen, inyi ǹkọt ǹriaak uriaak keyi ǹnyi owu.

²⁶Okumugwem, me atikọ, owu ore Awaji! Îre owu ochieek use irọrọ ata inu kechi geelek inyi ogwu usun̄ kwun̄.

²⁷Mgbọ keyi, îneme owu igbagbana uwu ogwu usun̄ kwun̄, inyi owot iman kan̄ ikup me isi kwun̄ ire mgbọ geelek. Mije owu Okumugwem ogbanabe uwu ya, uwu ya môkaan̄ ugbana isi ire mgbọ geelek.”