Read obolo I Mfuf 18 Bible Online

I Mfuf 18 - obolo bible

I Mfuf 18

¹Me ike mgbọ ge, Debit onenisi itim akọn̄ me lek ebi Filisia, mè itim ikpan̄ ema, mè ibọkọ ama Gat melek asabọn ama òkukup ikana isan̄a ema me ubọk.

²Debit onenisi itim si akọn̄ me lek ebi Mowabu, mè itim ikpan̄ ema, ema enenikana usun̄ inyi Debit, mè ikikpe otitip mkpulu inyi Debit.

³Debit onenitim akọn̄ me lek kè Adadeja ogwu ubọọn̄ Soba me Amat me mgbọ Adadeja obosi ibọkọ agba okwaan̄ Yuferetis ikikpulu.

⁴Debit otitim ikpan̄ ọmọ, mè ibọkọ obop uji akọn̄, mè ebi akọn̄ ìkikọp uji akọn̄, obop ene jaaba, mè ibọkọ si ebi akọn̄ ukot ukot, akọp obop ene iba. Ifafaan̄ ukot otutuuk inyinya kiban̄ isik efit inyinya uji akọn̄ gaalek.

⁵Ebi Aram ìnan̄a me Damasikọs enunu ibenitap ubọk inyi Adadeja ogwu ubọọn̄ Soba, Debit okpakpan̄ akọp obop ebi akọn̄ iba mè obop iba me lek kiban̄.

⁶Debit oneninama okwukwek akọn̄ me agan̄ Damasikọs me ido Aram. Ebi Aram enenikana usun̄ inyi Debit, mè ikikpe otitip mkpulu inyi ọmọ. Okumugwem okekinyi Debit ntim-mkpan̄ me ere geelek îsibe.

⁷Debit obọbọkọ otutuuk agbọ alata araran̄ ebi ibot akọn̄ kè Adadeja esabe itim akọn̄ isa ika inu Jeruselem inisun̄.

⁸Ogwu ubọọn̄ Debit ìninin̄ Teba[33] mè Kun, ama ile cha òkup me irak mkpulu kè Adadeja, mè ikpulu ekwe òwawa enenen. Ekwe chi ke Solomọn osa irom Okwaan̄ ekwe, mè atà, mè owuwa nroon̄ ikwaan̄ esabe ekwe irom.

⁹Towu ogwu ubọọn̄ ido Amat, oneninọ ibe ke Debit îtim ikpan̄ otutuuk urum akọn̄ kè Adadeja ogwu ubọọn̄ Soba,

¹⁰mè iniria ogwu gwun̄ Adoram ibe isi itọp ogwu ubọọn̄ Debit amọn, mè itọn̄ ọmọ me lek akọn̄ îtimbe ikpan̄ Adadeja. Adadeja îtim akọn̄ me lek kè Towu owuwa mgbọ. Adoram osasa owuwa inu alata okuket mè echi alata araran̄ mè echi ekwe ikaan̄ me ubọk ijet Debit.

¹¹Ogwu ubọọn̄ Debit obọbọkọ otutuuk inu cha, mè ifaka itap me ubọk Okumugwem, ike îrọbe me lek otutuuk alata okuket mè alata araran̄ mè ekwe geelek îbọkọbe me ubọk ebi ido geelek îtimbe ikpan̄: me ido Edọm, mè ido Mowabu, mè ido Amọn, mè ido Filisia, mè ido Amalek.

¹²Me emen akọn̄ etimbe me lek ebi Edọm me iteke Uchi, Abisai, ogwu ogwu uga orebe Seruya, okpakpan̄ akọp mè obop ene jeeta ọmọ gaalek.

¹³Debit oneninama okwukwek akọn̄ me otutuuk Edọm. Otutuuk ebi Edọm ekakana usun̄ inyi ọmọ. Okumugwem okekinyi Debit ntim-mkpan̄ me ere geelek îsibe.

¹⁴Debit okekikpulu otutuuk Ijeren, mè ikirọ inu ònenen, mè itat me lek otutuuk ebi kan̄.

¹⁵Jowabu, ogwu ogwu uga orebe Seruya, ore ogwu ibot ebi akọn̄ kè Debit, sà Jiosefat gwun̄ kè Ayiludu ore ogwu òkige mfufuk;

¹⁶Jadọk, gwun̄ kè Ayitubu, mè Ayimelek,[34] gwun̄ kè Abiata ere ebi ngwugwa; Sabisa ore ogwu uti ikpa;

¹⁷Benaya, gwun̄ kè Jeyoyada, ore ogwu ibot inyi ebi Keret mè ebi Pelet ebi ìkibem Debit, sà bọn ebirieen̄ kè Debit ere ebi ibot mkpulu ìkisi ikwaan̄ me agba lek kè Debit.