Read obolo I Mfuf 19 Bible Online

I Mfuf 19 - obolo bible

I Mfuf 19

¹Sọnja mgbọ iraraka, Nayas, ogwu ubọọn̄ Amọn okwukwu. Ogwu gwun̄ onenikana ubọọn̄ me irek kan̄.

²Debit onenitumu ibe, “Mâkaan̄ ata ejit me lek kè Anun gwun̄ kè Nayas, kubọk ogwu ute okaan̄be ata ejit me lek n̄a.” Debit oneniria ebi ikwaan̄ kan̄ ibe esi ekat Anun ejit mije mkpa ogwu ute. Mgbọ ebi ikwaan̄ kè Debit enube inire lek kè Anun me ido Amọn ibenito ọmọ nsan,

³ebi ibot mkpulu ido Amọn enenitumu inyi Anun ibe, “Eyi Debit oriabe ebi ene inu ibe enekat owu ejit, ìre òkikeek ibe ke ìboninyi nte kwun̄ umin? Òkafat ìriọọn̄ ibe ke ìria ebi ikwaan̄ kan̄ inu kubọk ebi enun̄unun̄, ibe enekpọ ubọk ama yi okupbe, inyi ema mênitim akọn̄ ikpan̄ ama yi?”

⁴Mije keya, Anun otetet ebi ikwaan̄ kè Debit cha, mè ikwọkọ ema ifet me otu, mè ikọọk ofọnti isan̄a ema me agan̄ ibot edim, mè iria ema ifon ikeya.

⁵Enenikpa inu ofolek ife cha inyi Debit, iraria ebi ene ibe eje ekweek ife cha me oniin̄, mije, inu ya îtap ife cha esip me isi enenen. Itutumu inyi ife cha ibe ebia me Jeriko mege ire mgbọ ifet otu kiban̄ môtibibe, sabum ema eka.

⁶Mgbọ ebi Amọn eriọọn̄be ibe ke inu ya ema erọbe îrọ ibe ema ekana ebi ochicha kè Debit, ogwu ubọọn̄ Anun melek ebi Amọn enenikpe akọp obop kilo alata okuket ita, mè obop ini isa ibọkọ uji akọn̄ melek ebi ìkikọkọp me ubọk ebi Aram Nayarayim,[35] mè ubọk ebi Aram Maaka mè ebi Soba.

⁷Ema ebọkọ akọp obop uji akọn̄ ita mè obop iba, melek ebi ìkikọkọp, me ọkọ, mè igwen si ogwu ubọọn̄ Maaka melek urum ebi akọn̄ kan̄. Ogwu ubọọn̄ ya melek ebi akọn̄ kan̄ enenirieen̄ akọn̄ me agba lek ama Medeba, ebi Amọn ebebem lek me ama kiban̄ ge ge, mè inan̄a isibi inu akọn̄ ya.

⁸Debit onọnọ otitọt ya, mè iria Jowabu melek otutuuk ebi akọn̄ isibi isi ikweek ema.

⁹Ebi akọn̄ Amọn enenijibi akọn̄ isibi isi irieen̄ me otunchit ama kiban̄, sà ebi ubọọn̄ kechilọ ìsisibi inu melek ebi akọn̄ kiban̄ ekup me lek kiban̄ me emen nsisaan̄ oron cha.

¹⁰Mgbọ Jowabu omun̄be ibe ke ebi ochicha mîrieen̄ akọn̄ ikana ema me isi mè udun̄, igogobo ebi ìrọriọọn̄ ukot akọn̄ ichit me Ijeren, mè iria isibi isi ikweek ebi Aram.

¹¹Ebi akọn̄ Ijeren kechilọ ke îkana itap me ubọk kè Abisai ogwu ngwan̄, ibe ekeke eda ebi Amọn.

¹²Jowabu onenitumu inyi Abisai ibe, “Ire ebi Aram inye lek igak emi, owu na na tap ubọk nyi emi. Ire, ire ebi Amọn inye lek igak owu, emi mânu initap ubọk inyi owu.

¹³Nye lek! Eji etet lek enye etim akọn̄ yi me ibot ebi kiji, mè ibot owuwa ama ile Awaji kiji. Okumugwem môrọ inu geelek ònwọnwọn me chieen̄ kan̄.”

¹⁴Jowabu mè ebi akọn̄ kan̄ enenijibi akọn̄ inin̄ lek ebi Aram, ebi Aram elilim, kpekọt ikeke ida Jowabu.

¹⁵Mgbọ ebi Amọn emun̄be ibe ke ebi Aram mîlim, ema si elililiin̄ ichieen̄ me emen ama ile kiban̄, kpekọt ikeke ida Abisai. Jowabu onenigwu ikom ika inu Jeruselem.

¹⁶Mgbọ ebi Aram emun̄be ibe ke ebi Ijeren mîtim ikpan̄ ema, ema eneniria etip igwen ebi Aram ebi ìkup me usaba okwaan̄ Yuferetis, ema melek Sofak, ogwu ibot akọn̄ kè Adadeja.

¹⁷Mgbọ Debit onọbe inu yi, itititiin̄ otutuuk ebi Ijeren, mè isa isaba okwaan̄ Jodan, mè inije ikweek ebi ife cha, mè inirieen̄ akọn̄ kan̄ ikibene isi ikweek ema. Debit orerieen̄ akọn̄ ikweek ebi Aram, ebi Aram ebebene akọn̄ me lek kan̄.

¹⁸Ire, ebi Aram elilim, kpekọt ikeke ida ebi Ijeren. Debit okpakpan̄ efit ebi akọn̄ jaaba ìkikọp uji akọn̄, mè ikpan̄ si akọp obop ebi akọn̄ ini ìkilibi me inyọn̄ inyinya, mè ikpan̄ si Sofak, ogwu ibot akọn̄ kiban̄.

¹⁹Mgbọ otutuuk ebi ubọọn̄ ìkisiki ibot inyi Adadeja emun̄be ibe ke ebi Ijeren mîtim ikpan̄ otutuuk kiban̄, ema esisi irọ esuuk melek ebi Ijeren, mè ikana ebi ebi Ijeren ekikpulu. Mije keya, ebi Aram kpeyaka ichieek itatap ubọk inyi ebi Amọn ofifi.