Read obolo I Mfuf 23 Bible Online

I Mfuf 23 - obolo bible

I Mfuf 23

¹Debit îkan ijaan̄ lek, mè irie ugwem kan̄ ijot, mè inirọ Solomọn gwun̄ kan̄ ubọọn̄ ebi Ijeren.

²Inenititiin̄ otutuuk ebi ibot mkpulu Ijeren mè ebi ngwugwa mè ebi otoko kè Libai.

³Enenifuk ebi otoko kè Libai, bene me lek ebi akọp acha ita fo inyọn̄, otu ifuk ebirieen̄ kiban̄ onenisibi akọp obop ita mè obop jeeta.

⁴Me otu ifuk yi, Debit onenibe ke akọp obop ene iba mè obop ini ebekikpọ chieen̄ me lek ikwaan̄ Uwu Mbuban Okumugwem, sà obop ene gweregwen ebere ebi ibot mè ebi oyerebet.

⁵Obop ene ini ebekibem otunchit Uwu Mbuban, sà obop ene ini ebekikwak nkwukwak echi ọmọ onyibe cha isa ikitọn̄ Okumugwem.

⁶Debit onenidọmọ ebi otoko kè Libai me owot iman me owot iman: owot iman kè Gasiọn, mè owot iman kè Koyat, mè owot iman kè Merari.

⁷Ebi owot iman kè Gasiọn: Ladan, mè Simei.

⁸Bọn ebirieen̄ kè Ladan: Jeyen ogwu adasi, mè Jetam, mè Juwen, ema ìre ene ita.

⁹Bọn ebirieen̄ kè Simei: Selomot, mè Ajien, mè Aran, ema ìre ene ita. Ebibi ere ebi ibot ototun̄ ukan̄ geelek me owot iman kè Ladan.

¹⁰Bọn ebirieen̄ kè Simei: Jayat, mè Jija,[39] mè Jewus, mè Beria. Ebibi ere bọn ebirieen̄ kè Simei, ema ene ini.

¹¹Jayat ore ogwu adasi, Jija ogwu òso iba. Ire, Jewus mè Beria kpekaan̄ bọn iwa. Eya orọ, efuk ema kubọk ototun̄ ukan̄ ge, mè igbaan̄ inyi ema ikwaan̄ ge.

¹²Bọn ebirieen̄ kè Koyat: Amiram, mè Ijiyari, mè Eburọn, mè Ujiyen, ema ene ini.

¹³Bọn ebirieen̄ kè Amiram: Erọn, mè Mosis. Enenisan̄a Erọn mè otutuuk ebi owot iman kan̄ isun̄ esese ibe ekegwọk lek inu òkup mbuban ichit, mè ekegwa ngwugwa enyi Okumugwem, mè ekerọ esese chieen̄ ikwaan̄ me isi kan̄, mè ekegbana ebi ene me erieen̄ kan̄ isi ire mgbọ geelek.

¹⁴Efuk bọn kè Mosis ogwu ikwaan̄ Awaji kubọk ebi otoko kè Libai.

¹⁵Bọn ebirieen̄ kè Mosis: Gesiọm, mè Elieja.

¹⁶Bọn kè Gesiọm Sebuyen ore adasi.

¹⁷Bọn owot iman kè Elieja: Reyabia ore adasi. Elieja ìkakaan̄ ofifi gwun̄ enerieen̄, ire, bọn kè Reyabia mîwa enenen.

¹⁸Bọn ebirieen̄ kè Ijiyari: Selomit ore adasi.

¹⁹Bọn ebirieen̄ kè Eburọn: Jeriya ogwu adasi, Amariya ogwu òso iba, Jayajien ogwu òso ita, Jekameyam ogwu òso ini.

²⁰Bọn ebirieen̄ kè Ujiyen: Maika ogwu adasi, Isiya ogwu òso iba.

²¹Bọn ebirieen̄ kè Merari: Mali, mè Musi. Bọn ebirieen̄ kè Mali: Elieja, mè Kis.

²²Elieja ìkabon gwun̄ enerieen̄ geege, ìbon bọn ebibaan̄ gaalek. Bọn kè Kis ngwan̄ nte kiban̄ edo ema me lek nwa.

²³Bọn ebirieen̄ kè Musi: Mali, mè Ederi mè Jeremot, ema ene ita.

²⁴Ebibi ere ebi otoko kè Libai me owot iman me owot iman, ema ere ebi ibot me owot iman kiban̄ ge ge. Efufuk ema, mè ige erieen̄ kiban̄ me ene me ene itap me ikpa. Otutuuk ebi ìkisi ikwaan̄ me Uwu Mbuban Okumugwem, bene me lek ebi akọp acha iba fo inyọn̄, ke ege erieen̄.

²⁵Mije, Debit ìtumu ibe: “Eyi Okumugwem, Awaji ebi Ijeren, onyibe ebi kan̄ esuuk, mè inu iniluk me Jeruselem isi ire mgbọ geelek,

²⁶ìkayaka ìkup me uyọt ibe ebi otoko kè Libai ekeben Akpatan̄ Mbuban ya mè otutuuk nroon̄ ikwaan̄ kan̄ ekesa ejijen̄e ekana.”

²⁷Igọọk me lek mgburudun̄ nteme kè Debit, efuk ebi otoko kè Libai, bene me lek ebi akọp acha iba fo inyọn̄ gaalek.

²⁸Ikwaan̄ ebi otoko kè Libai ìre itatap ubọk inyi ebi owot iman kè Erọn me lek ikwaan̄ Uwu Mbuban Okumugwem. Îre ema ekikpọ chieen̄ me lek emen oyet egep, mè otutuuk emen agwut Uwu Mbuban, mè ikigbama lek nroon̄ ikwaan̄ òkup mbuban, mè ikisi ofifi chieen̄ ikwaan̄ geelek me Uwu Mbuban Awaji.

²⁹Îre ema ekikpọ chieen̄ me lek fituru mbuban ekitoon̄ me inyọn̄ ikasi isi Okumugwem, mè akpa ekọkbe eyi ekisa igwa ngwugwa akpa, mè nchicha ekatapge olat me lek. Îre ema ekidọmọ ike ekitem otutuuk fituru cha mè nchicha cha geelek, mè ike ekiwọlọ akpa ekọkọk cha, mè ike ekitọ, mè ìkeke inu geelek etọtọ melek ulobo inu geelek ekisa igwa ngwugwa.

³⁰Îre ema ekibe Okumugwem onirọ, mè ikikọt okwa itọn̄ ọmọ, me ewelegwe mè ikakwun̄, usen geelek,

³¹mè ikirọ si ikeya mgbọ geelek ekigwa ngwugwa ewọwọp iriọk inyi Okumugwem me Usen Mbuban, mè mgbọ ijọk Aya Onyan̄ geelek, mè ofifi esese chieen̄ ijọk geelek. Îre ema ebekisi ikwaan̄ me isi Okumugwem igọọk me otu ifuk ene edọmọbe, mè ubọk edọmọbe inyi ema.

³²Ikeyi ke ebi otoko kè Libai ekisi ikwaan̄ kiban̄ me emen Atanga Chinichini, mè Ere Òkup Mbuban, me irak ebi ngwan̄ kiban̄, bọn owot iman ke Erọn, me lek ikwaan̄ geelek ekisi me emen Uwu Mbuban Okumugwem.