Read obolo I Mfuf 29 Bible Online

I Mfuf 29 - obolo bible

I Mfuf 29

¹Debit ogwu ubọọn̄ onenitumu inyi otutuuk ebi ene cha ìtititiin̄ me ere ya ibe: “Solomọn gwun̄ n̄a, ogwu Awaji ogobobe, ìre sọntiik gwun̄, ìkariọọn̄ inu geege. Ikwaan̄ inanama uwu yi îmin enenen, mije, ikpele ikpele uwu yi ìkakup ìnyi ogwu ebilene, ìkup inyi Okumugwem Awaji.

²Nsa me otutuuk efuuk n̄a ititen̄e inu geelek ebesa inama Uwu Mbuban Awaji n̄a. Ntitiin̄ alata araran̄ isun̄ inyi ikwaan̄ alata araran̄, mè ititiin̄ alata okuket isun̄ inyi ikwaan̄ alata okuket, mè ititiin̄ ekwe isun̄ inyi ikwaan̄ ekwe, mè ititiin̄ okwukwut isun̄ inyi ikwaan̄ okwukwut, mè ititiin̄ kpa chieen̄ uti isun̄ inyi ikwaan̄ uti, mè ititiin̄ ewuuk unye otu ewe onikisi isun̄ inyi ikwaan̄ ugọbọ geelek, mè ititiin̄ si owuwa chieen̄ ewuuk unye otu ewe, mè ogbogbo ewuuk urọt lek.

³Isan̄a me lek kecha, mije nsabe otutuuk ejit n̄a inyi me lek ikwaan̄ Uwu Mbuban Awaji n̄a, mâsa owuwa alata araran̄ mè alata okuket echi emi me lek n̄a nkaan̄be inyi ibe esa egbaalek enama Uwu Mbuban Awaji n̄a, esọkọ me lek inu geelek mwuukbe lek inyi iraka.

⁴Mânyi efit obop kilo alata araran̄ ònan̄a me Ofiri, mè efit obop kilo atalek alata okuket iba mè akọp obop kilo ini, inyi mêsabe ichọkọ ichit otutuuk akpalek uwu cha,

⁵mè isa si irọ ikwaan̄ alata araran̄ mè alata okuket geelek, mè otutuuk ikwaan̄ geelek ebi ikwaan̄ ubọk mêrọbe. Mgbọ keyi, ìre ekene me etete kinyi oweek inyinyi inu mêsabe igbaalek isi ikwaan̄ uwu yi, mè ifaka si lek itap me ubọk Okumugwem cherekeyi?”

⁶Ebi ibot owot iman, mè ebi ibot otoko ebi Ijeren, mè ebi ibot akọn̄ ìkikpulu obop obop ene, mè ebi ìkikpulu efit efit ene, mè ebi ibot ikwaan̄ ogwu ubọọn̄ ebebene ikinyi inyinyi, me ekatetge ene geege me unye ubọk.

⁷Inu enyibe ibe esa enama Uwu Mbuban Awaji îwa enenen: alata araran̄, efit obop kilo, mè akọp obop kilo jaaba; alata okuket, îraka efit obop kilo ita mè akọp obop kilo ini; mè ekwe, efit obop kilo gweregwen mè akọp obop kilo iba; mè okwukwut, îraka efie kilo ita mè efit obop kilo ini.

⁸Ogwu geelek òkakaan̄ ewuuk unye otu ewe osasa inu ininyi Jeyen ogwu owot iman kè Gasiọn ogwu òkikpọ chieen̄ me lek ere isun̄-inu me emen Uwu Mbuban Okumugwem.

⁹Ebi ene ebebele ejit enenen mije ebi ibot kiban̄ esabe me ata ejit inyi inyinyi, kpetet ema me unye ubọk. Ema esa me otutuuk ejit kiban̄ iche inu inyi Okumugwem, me ubelejit. Debit me lek kan̄ si obebele ejit enenen.

¹⁰Debit onenikup me isi otutuuk ene cha itọn̄ Okumugwem ibe ikeyi, “Itọn̄ ikup inyi owu, Okumugwem, Awaji kè Ijeren, nte nte kiji ukot ikaan̄, bene me mgbọ geelek si re mgbọ geelek.

¹¹Okumugwem, irek umin mè unye ìre eyi kwun̄, mè ujamgbugbo, mè umin ubọọn̄, mè òrirọ eyi unye mkpulu, mije inu geelek òkup me emen inyọn̄ mè linyọn̄ ìre echi kwun̄. Okumugwem, ijọn̄ ubọọn̄ ìre eyi kwun̄; owu obene ichit, mè ire si ogwu ibot inyi otutuuk inu geelek.

¹²Ibọbọọn̄ ubọọn̄ mè umin ìkinan̄a me ubọk kwun̄; owu okikpulu otutuuk inu. Efuuk mè unye ìkup owu me ubọk, isasa ijibi ene geelek ibene, mè inyi ene geelek unye.

¹³Mgbọ keyi, Awaji kiji, eji ekibe owu onirọ, mè ikitọn̄ erieen̄ kwun̄ òkup mgbugbo.

¹⁴“Ire, ekene ene ke emi nre, sà ìre kpasi ife ke ebi kwun̄ chi ere, eyi eji ekọtbe ichili ejit inyi inyinyi me otutuuk ejit ikeyi? Mije, otutuuk inu chi ìnan̄a owu me ubọk, îre inu ònan̄a owu me ubọk ke eji eyaka isa inyi owu.

¹⁵Me chieen̄ kwun̄, eji ìre ebi ije mè ebi ichen kubọk otutuuk ebi nte nte kiji erebe. Usen ugwem kiji me linyọn̄ keyi ìbet lek ogugo ikike, eji kpekaan̄ ikpọchieen̄ geege.

¹⁶Okumugwem Awaji kiji, otutuuk ogbogbo nroon̄ ikwaan̄ chi eji esabe inu ibe esa enama Uwu Mbuban enyi Erieen̄ Mbuban kwun̄ ìnan̄a me ubọk kwun̄, otutuuk chi ìkup inyi owu.

¹⁷Awaji n̄a, emi nriọọn̄ ibe ke owu okiroon̄ ejit ene ikpọ, mè ikibele ejit me lek ogwu òkirọ atikọ. Eyi n̄a, ǹsa ata ijọn̄ ijọn̄ ejit n̄a mè otutuuk atikọ inyi owu otutuuk inu chi nnyibe. Mbele ejit si imumun̄ ike ebi kwun̄ ebi ìkup me ere yi esabe me ijọn̄ ijọn̄ ejit kiban̄ inyi owu otutuuk inu chi ema enyibe.

¹⁸Jei Okumugwem Awaji ebi nte nte kiji Ebereyam, mè Ajiki, mè Ijeren, rọ inyi ebi kwun̄ ekekaan̄ ulọk inyinyi inyinyi mege ire mgbọ geelek, mè rọ inyi ejit kiban̄ ikup me lek kwun̄ mgbọ geelek.

¹⁹Rọ si inyi Solomọn gwun̄ n̄a ikaan̄ ulọk isasa otutuuk ejit kan̄ isun̄ otutuuk ikan kwun̄, mè ikọt ikirọ inu owu okiweek, mè orọmijọn̄ kwun̄, mè irọ inu geelek òkukup me uyọt, mè inama ikpele Uwu Mbuban yi, eyi ntitiin̄be otutuuk nroon̄ ikwaan̄ isun̄ inyi.”

²⁰Debit onenitumu inyi ebi ama ibe, “Ìtọn̄ Okumugwem Awaji kinyi!” Otutuuk ene ekekitọn̄ Okumugwem, Awaji ebi nte nte kiban̄, mè igele igwook me ijọn̄, mè itọbọ ebum inyi Okumugwem, mè itọbọ ibot si inyi ogwu ubọọn̄.

²¹Me ofit iwele kan̄, ebi Ijeren egwagwa owuwa ngwugwa inyi Okumugwem, mè igwa owuwa ngwugwa ewọwọp iriọk. Ema egwu obop orie eriembuuk, mè obop orie arọọn̄, mè obop bọn orie arọọn̄, mè igwa si ngwugwa miin̄ òje me lek, mè owuwa esese chieen̄ ngwugwa me ibot otutuuk ebi Ijeren.

²²Usen ya, ema ererie inorie mè inwọ miin̄, mè ibele ejit enenen me isi Okumugwem. Ema enenibọkọ Solomọn gwun̄ kè Debit itap òso mgbọ iba kubọk ubọọn̄, mè itọkọ ọmọ aran̄ me ibot me isi Okumugwem, inyi inikpulu kubọk ogwu ubọọn̄, mè ito si Jadọk, inyi inire ogwu ngwugwa.

²³Solomọn onenisiki ikweek me inyọn̄ ogboon̄ ubọọn̄ Okumugwem ikikpulu kubọk ogwu ubọọn̄ me irek kè Debit ogwu ute. Inu okekije ijaan̄ me lek kè Solomọn, otutuuk Ijeren esisiki ibot inyi ọmọ.

²⁴Otutuuk ebi ibot ikwaan̄, mè otutuuk ebi akọn̄, mè otutuuk bọn ebirieen̄ kè Debit kechilọ echechieek ibe ke ema mêsiki ibot inyi ogwu ubọọn̄ Solomọn.

²⁵Okumugwem onenijibi Solomọn ibene me chieen̄ otutuuk ebi Ijeren, mè ininyi si ọmọ umin mè òrirọ eyi irek ubọọn̄, ire lek, kpunu ubọọn̄ Ijeren geege òrarak imin ikup ikeya sabum ukot keya.

²⁶Debit gwun̄ kè Jesi îre ogwu ubọọn̄ otutuuk Ijeren,

²⁷mè ikpulu Ijeren akọp acha ini. Ìkup me Eburọn ikpulu acha jaaba, mè inikup me Jeruselem ikpulu akọp acha ita mè ita.

²⁸Me ògat ugwem kan̄, Debit îbọọn̄ ubọọn̄ enenen, mè ikaan̄ ulibi. Debit onenikan ijaan̄ lek, mè irie ugwem kan̄ ijot, mè inikwu. Solomọn ogwu gwun̄ onenikana ogwu ubọọn̄ me irek kan̄.

²⁹Otutuuk inu òrọrọ me ukot mkpulu kè Debit ogwu ubọọn̄, bene me ibebene si re itata kan̄, mîge otutuuk itap me emen ikpa mfufuk kè Samien ogwu òmọọn̄ inu, mè emen ikpa mfufuk kè Netan ogwu nriran, mè emen ikpa mfufuk kè Gadi ogwu òmọọn̄ inu.

³⁰Mîge si inu geelek ofolek mkpulu kan̄, mè unye kan̄, mè inu geelek òrọrọn̄ inyi ọmọ, mè echi òrọrọn̄ ikeme otutuuk Ijeren, mè echi òrọrọ me otutuuk ofifi ido geelek.