Read obolo I Mfuf 4 Bible Online

I Mfuf 4 - obolo bible

I Mfuf 4

¹Ofifi bọn ebirieen̄ kè Juda: Pereji, mè ebi Ejirọn, mè ebi Kami, mè ebi Uru, mè ebi Soban.

²Reyaya gwun̄ kè Soban onenire nte kè Jayat, Jayat onenire nte kè Ayumai mè Layadi. Ebibi ere ebi owot iman ebi Sora.

³Uru ore nte kè Etam, mè Penuwen,[14] mè Ejeri. Etam onenire nte kè Jesereli, mè Isima, mè Idibas. Erieen̄ gwun̄ kan̄ enenwaan̄ ìre Ajeleliponi. Penuwen ore nte kè Gedoru, sà Eseri ore nte kè Usa. Uru ore adasi gwun̄ enerieen̄ Efarata omanbe inyi Kelep. Uru ore nte nte ebi ama Beteleyem.

⁵Asiyuru nte kè Tekowa ìkaan̄ nwa iba, Elia mè Nayara.

⁶Nayara oneniman Ayujam, mè Eferi, mè Temeni, mè Ayasitari inyi Asiyuru. Ebiba ere bọn kè Nayara.

⁷Bọn ebirieen̄ kè Elia: Seret, mè Sowari, mè Etinan,

⁸mè Kos ogwu ònire nte kè Anubu mè Ajobeba, melek ebi owot iman kè Ayaren gwun̄ kè Arum.

⁹Îkaan̄ ogwu enerieen̄ ge ekigwen Jabeji, ogwu òkakaan̄ umin igak ebi ngwan̄. Ogwu uga ìnyi ọmọ erieen̄ ya Jabeji, mije, unaan̄[15] îmun̄be mgbọ îmanbe gwun̄ yi.

¹⁰Usen ge, Jabeji onenito ito igwen Awaji ebi Ijeren ibe, “Soso gbana emi, mè rọ inyi oke ijọn̄ n̄a iwele! Keke nyi emi, mè chit emi san̄a me ubọk ijo inu, inyi unan ikare emi lek.” Awaji orọrọ otutuuk inu îbeekbe inyi.

¹¹Kelup, ngwan̄ kè Suya ore nte kè Meyiri, Meyiri onenire nte kè Esiton.

¹²Esiton onenire nte kè Bet Rafa, mè Paseya, mè Teyina ogwu ònenire nte ebi ama Iri Nayas. Ebibi ere ebi ìluk me Reka.

¹³Bọn ebirieen̄ kè Kenaji: Otinien mè Seraya. Bọn ebirieen̄ kè Otinien: Atat mè Meyonotayi.

¹⁴Meyonotayi ore nte kè Ofera. Seraya onenire nte kè Jowabu, Jowabu onenire nte ebi ìluk me Gei Arasim,[16] mije, ebi ìluk me ere ya ìre ebi ikwaan̄ ubọk.

¹⁵Bọn ebirieen̄ kè Kelep gwun̄ kè Jefune: Iru, mè Ela, mè Nayam. Gwun̄ enerieen̄ kè Ela: Kenaji.

¹⁶Bọn ebirieen̄ kè Jeyalelen: Jifu, mè Jifa, mè Tiriya, mè Asareli.

¹⁷Bọn ebirieen̄ kè Ejira: Jeteri, mè Meredi, mè Eferi, mè Jalon. Bitiya gwun̄ enenwaan̄ ogwu Fero ogwu Meredi odobe me lek nwa oman Miriam, mè Samayi, mè Isiba ogwu ònenire nte kè Esitemowa. Nwa kè Meredi ogwu ònan̄a me Judia oneniman Jeredi ogwu ònenire nte kè Gedoru, mè Eberi ogwu ònenire nte kè Soko, mè Jekutien ogwu ònenire nte kè Janowa.

¹⁹Bọn ebirieen̄ kè Odiya, ebi îbonbe me owot ngwan̄ kè Nayam: nte ebi ama Keyila eyi ebi Garam, mè nte ebi ama Esitemowa eyi ebi Maaka.

²⁰Bọn ebirieen̄ kè Simọn: Aminọn, mè Rina, mè Ben-Yanan, mè Tilọn. Bọn ebirieen̄ kè Isiyi: Joyet mè Ben-Joyet.

²¹Bọn ebirieen̄ kè Siela gwun̄ kè Juda: Eri nte kè Leka, mè Layada nte kè Maresa, mè owot iman ebi ìkilọk ekwut lilin̄ me Bet Asibeya,

²²mè Jokim, mè ebi Kojeba, mè Jowas mè Sarafu ebi ìrere ebi ibot me Mowabu mè Jasubi Leyem. (Inu chi ìre inu òrọ karake ukot ikaan̄.)

²³Ebibi ere ebi ìbot ugọn̄ ìkiluk me Netayim mè Gedera, mè ikisi ikwaan̄ inyi ogwu ubọọn̄.

²⁴Bọn ebirieen̄ kè Simiọn: Nemuwen, mè Jamin, mè Jaribu, mè Jera, mè Sawulu.

²⁵Salum ore gwun̄ kè Sawulu, Salum onenibon Mibisam, Mibisam onenibon Misima.

²⁶Owot iman kè Misima: Misima obon Amuwen, Amuwen onenibon Jakuru, Jakuru onenibon Simei.

²⁷Simei ìkaan̄ akọp mè bọn ebirieen̄ gweregwen mè bọn ebibaan̄ gweregwen. Ire, ebi ngwan̄ kpekaan̄ bọn iwa. Eyi orọ ebi owot iman kiban̄ kpewa me otu ifuk kubọk ebi Juda.

²⁸Îre ebi owot iman keyi eluk me Bieseba, mè Molada, mè Asari Suwali,

²⁹mè Biliya, mè Esem, mè Toladi,

³⁰mè Betuwen, mè Oruma, mè Sikilagi,

³¹mè Bet Marakabot, mè Asari Susim, mè Bet Biri, mè Seyarayim. Îre ema eluk me ama kechi mege inire ukot mkpulu kè Debit.

³²Erieen̄ asabọn ama go òkup ikana ema ìre Etam, mè Ayin, mè Rimọn, mè Token mè Asan,

³³melek otutuuk asabọn ama kiban̄ òkukup ikana ama chi mege isi igwook me Bayalat. Ama kechi ke ebi owot iman kè Simiọn eluk. Ema mîsun̄ òjot òjot ikpa mfufuk owot iman kiban̄. Erieen̄ ebi ibot owot iman kiban̄ kubọk egebe me emen ikpa mfufuk cha ìre:

³⁴Mesobabu, mè Jamilek, mè Josa gwun̄ kè Amajiya,

³⁵mè Juwen, mè Jewu gwun̄ kè Josibiya, gwun̄ kè Seraya gwun̄ kè Asiyen,

³⁶mè Elioyenai, mè Jayakoba, mè Jesoyaya, mè Ajaya, mè Adien, mè Jesimien, mè Benaya,

³⁷mè Jija gwun̄ kè Sifi, gwun̄ kè Alọn, gwun̄ kè Jedaya, gwun̄ kè Simiri, gwun̄ kè Semaya.

³⁸Ebirieen̄ chi ebi egobe erieen̄ kiban̄ ere ebi ibot me owot iman kiban̄. Ema mîmumana enenen me owot iman kiban̄.

³⁹Ema mîjijen̄e mege isi igwook me otubọk ijọn̄ ama Gedoru isi ikiweek ijọn̄ urie inyi anam kiban̄.

⁴⁰Ema enenimun̄ ata ijọn̄ urie anam ònwọnwọn, mè iwele isaak, mè ikup me esuuk mè utelelek. Usini ebi owot iman kè Am edasi iluk agan̄ ya.

⁴¹Ebirieen̄ chi egobe erieen̄ kiban̄ enu inire agan̄ ya me ukot mkpulu kè Ejikaya ogwu ubọọn̄ Juda, mè inijibi akọn̄ isi itim me lek ebi Am melek ebi Meyun, me uwu me uwu, mè ijijaka ema isan̄a kpai kubọk inu oniin̄ akọn̄, ene geege ìkasik mege inire chereyi. Ema enenibọkọ inyọn̄ ijọn̄ ya iluk, mije, ere ya ìre ata ijọn̄ urie inyi anam kiban̄.

⁴²Pelatiya, mè Neyariya, mè Refaya, mè Ujiyen, bọn ebirieen̄ kè Isiyi, enenititiin̄ efit ebirieen̄ go ebi owot iman kè Simiọn, mè inijibi akọn̄ isi itim me lek ebi ìluk me inyọn̄ ogoon̄ Seya,

⁴³mè ikpan̄ si ebi Amalek ìkwakwaan̄ isik, mè inikana iluk me ere ya mege inire chereyi.