Read obolo I Mfuf 9 Bible Online

I Mfuf 9 - obolo bible

I Mfuf 9

¹Mîge erieen̄ otutuuk ebi Ijeren, me owot iman me owot iman, itap me ikpa ebi ubọọn̄ Ijeren. Mîkpulu ebi Juda me usun̄ akọn̄ isa ifo ido Babilọn, mije ema ekpakabe ibot inyi Awaji.

²Ebi ìdadasi ika, mè iniluk me ijọn̄ kiban̄, mè ama kiban̄ ìre usini ebi Ijeren, ebi ngwugwa, mè ebi otoko kè Libai, mè bọn ikwaan̄ Uwu Mbuban.

³Ebi otoko kè Juda, mè ebi otoko kè Benjamin, mè ebi otoko kè Iferem, mè ebi otoko kè Manasi ebi ìluk me Jeruselem ìre:

⁴Utai gwun̄ kè Amiyudu, gwun̄ kè Omiri, gwun̄ kè Imiri, gwun̄ kè Bani, ogwu owot iman kè Pereji gwun̄ kè Juda.

⁵Ebi owot iman kè Silon: Ajaya, adasi gwun̄, melek ebi bọn ebirieen̄.

⁶Ebi owot iman kè Jera: Jewen. Otu ifuk ebi otoko kè Juda ìre efit gweregwen mè akọp onaan̄ge.

⁷Ebi otoko kè Benjamin: Salu gwun̄ kè Mesulam, gwun̄ kè Odabia, gwun̄ kè Asenuwa;

⁸mè Ibineya gwun̄ kè Jeroyam; mè Ela gwun̄ kè Uji, gwun̄ kè Mikiri; mè Mesulam gwun̄ kè Sefatiya, gwun̄ kè Rewen, gwun̄ kè Ibinija.

⁹Ebi otoko kè Benjamin, ike egebe me emen ikpa mfufuk owot iman kiban̄, ìre efit onaan̄ge mè akọp go mè gweregwen. Ema otutuuk ere ibot me owot iman kiban̄ ge ge.

¹⁰Ebi owot iman ebi ngwugwa: Jedaya, mè Jioyaribu, mè Jakin,

¹¹mè Ajariya gwun̄ kè Ilikiya, gwun̄ kè Mesulam, gwun̄ kè Jadọk, gwun̄ kè Merayot, gwun̄ kè Ayitubu ogwu ibot ikwaan̄ me Uwu Mbuban Awaji,

¹²mè Adaya gwun̄ kè Jeroyam, gwun̄ kè Pasuru, gwun̄ kè Malikija; mè Masai gwun̄ kè Adien, gwun̄ kè Jajera, gwun̄ kè Mesulam, gwun̄ kè Mesilemit, gwun̄ kè Imeri.

¹³Ebi ngwugwa ebi ìrere ebi ibot owot kiban̄ ge ge ìre obop ene mè efit jaaba mè akọp gweregwen. Ema ìre ebi ìkakaan̄ efuuk, mè iriọọn̄ ikwaan̄ Uwu Mbuban Awaji.

¹⁴Ebi otoko kè Libai: Semaya gwun̄ kè Asubu, gwun̄ kè Ajirikam, gwun̄ kè Asabiya, ogwu owot iman kè Merari;

¹⁵mè Bakibakari, mè Eres, mè Galan, mè Mataniya gwun̄ kè Mika, gwun̄ kè Jikiri, gwun̄ kè Asafu;

¹⁶mè Obidaya gwun̄ kè Semaya, gwun̄ kè Galan, gwun̄ kè Jedutun; mè Berekaya gwun̄ kè Asa, gwun̄ kè Elikana ogwu òluk me asabọn ama ebi Netofa.

¹⁷Ebi ìkibem otunchit: Salum, mè Akubu, mè Talimon, mè Ayiman, mè ogwu ngwan̄ kiban̄ Salum òre ogwu ibot kiban̄,

¹⁸ogwu etobe ibe ikibem otunchit Ogwu Ubọọn̄ eyi òkup me agan̄ mbum-ura mege inire ukot keyi. Ebibi ere ebi ìkibem otunchit ebi ìkup me ọgbọn̄ ebi otoko kè Libai.

¹⁹Salum gwun̄ kè Kore, gwun̄ kè Ebiyasafu, gwun̄ kè Kora, mè ebi melek kan̄ ekibem otunchit ìrere ebi owot iman kè Kora, ema ekibem otunchit Uwu Mbuban, kubọk ebi nte nte kiban̄ ewuukbe lek ikibem otunchit Atanga Chichini.

²⁰Mgbọ òraraka, îre Fineyas gwun̄ kè Elieja ore ogwu ibot inyi ebi ìkibem otunchit, Okumugwem okukup melek kan̄.

²¹Jekaraya gwun̄ kè Meselemaya ore ogwu òkibem otunchit Atanga Chichini.

²²Otu ifuk otutuuk ebi egobobe ibe enere ebi ìkibem otunchit Uwu Mbuban ìre efit ene iba mè akọp mè iba. Ege erieen̄ kiban̄ me ama me ama itap me ikpa mfufuk owot iman. Debit mè Samien ogwu òmọọn̄ inu egobo ebi ìkibem otunchit chi ito me irek ikwaan̄ kiban̄, mije ema egbebe utoon̄-ejit.

²³Îre ema mè ebi owot iman kiban̄ ke ikwaan̄ ibebem otunchit Uwu Mbuban Okumugwem, òrere si Atanga Chinichini, okup me ubọk.

²⁴Ebi ìkibem otunchit chi ekikukup iso me agan̄ ini eyi Uwu Mbuban Okumugwem ya, me agan̄ mbum-ura, mè agan̄ ichep-ura, mè agan̄ inyọn̄, mè agan̄ osiki.

²⁵Me mgbọ me mgbọ, ebi ngwan̄ kiban̄ mîkinan̄a me asabọn ama kiban̄ inu initap ubọk inyi ema me irek ikwaan̄. Ema isinu, ekikup usen jaaba.

²⁶Îre achubọk ebi ibot ini chi, ebi ìkibem otunchit, ìrere ebi otoko kè Libai, ekikpọ chieen̄ me lek otutuuk agwut geelek mè ere isun̄-inu geelek òkup me Uwu Mbuban Awaji.

²⁷Ema ekitoto lek kiban̄ ikana Uwu Mbuban Awaji otutuuk eririeen̄ geelek, mije, îre ema ke ikwaan̄ ibebem ere ya okup me ubọk. Îre ema ekisun̄ atafi otunchit cha, ema si ekigwuku otunchit cha ewelegwe geelek.

²⁸Usini ebi otoko kè Libai si ekikpọ chieen̄ me lek nroon̄ ikwaan̄ me Uwu Mbuban. Ekifufuk nroon̄ ikwaan̄ mgbọ ekisan̄a isibi, mè ifuk si mgbọ ekikpulu isi isun̄.

²⁹Usini kiban̄ si ke egobo ibe ekekpọkpọ chieen̄ me lek inu geelek ekisa ibala emen Uwu Mbuban Awaji, mè nroon̄ ikwaan̄ òkup me ere òkup mbuban, mè akpa ekọkọk, mè miin̄, mè aran̄, mè nsensi, mè inu geelek òkidun̄u utop olu.

³⁰Ire, ikwaan̄ igbagbaan̄ inu utop olu cha igwa, ìkup me ubọk usini ebi ngwugwa.

³¹Îre ogwu otoko kè Libai ge ekigwen Matitiya, adasi gwun̄ kè Salum ogwu owot iman eyi kè Kora, ke etap ikwaan̄ irọrọ fituru ekisa igwa ngwugwa me ubọk.

³²Usini ebi ngwan̄ kiban̄, ebi owot iman kè Koyat, ke enyi ibe ekerọ Fituru Isi Awaji eyi ekitoon̄ me inyọn̄ ikasi me Usen Mbuban geelek.

³³Ebi ibot me otoko kè Libai ebi etapbe ikwaan̄ ikọt okwa mè ikwakwak nkwukwak me ubọk, ekiluk me emen usini agwut òkup me Uwu Mbuban Awaji, kpenyi ema ofifi ikwaan̄, mije, ema ekisi ikwaan̄ kiban̄ eririeen̄ mè ikarek.

³⁴Ebiba ere ebi ibot otoko kè Libai, me owot iman me owot man, kubọk egebe erieen̄ kiban̄ me mfufuk owot iman kiban̄. Ema eluk me Jeruselem.

³⁵Jeyien ore ogwu otọtọbọ ọdọ ijọn̄ ama Gibiọn, mè iluk si me Gibiọn. Erieen̄ ogwu nwa ìre Maaka.

³⁶Abidọn ore adasi gwun̄ enerieen̄ kan̄, ebi ìgọgọọk ìre Juru, mè Kis, mè Baali, mè Neri, mè Nadabu,

³⁷mè Gedoru, mè Ayio, mè Jekaraya, mè Mikilot.

³⁸Mikilot onenire nte kè Simeyam. Ema eluk melek ebi owot iman kiban̄ me Jeruselem.

³⁹Neri onenibon Kis, Kis onenibon Sọọlu, Sọọlu onenibon Jonatan, mè Malikisuwa, mè Abinadap, mè Esibaali.[26]

⁴⁰Gwun̄ enerieen̄ kè Jonatan: Merip-Baali,[27] ogwu òbobon Maika.

⁴¹Bọn ebirieen̄ kè Maika: Piton, mè Melek, mè Tareya mè Ayaji.

⁴²Ayaji onenibon Jara, Jara onenibon Alemet, mè Ajimabet, mè Jimiri. Jimiri onenibon Moja.

⁴³Moja onenibon Bineya, Bineya onenibon Refaya, Refaya onenibon Eliasa, Eliasa onenibon Asen.

⁴⁴Asen ìbon bọn ebirieen̄ gweregwen: Ajirikam, mè Bokeru, mè Isimen, mè Seyariya, mè Obidaya, mè Yanan. Ebibi ere bọn ebirieen̄ kè Asen.