Read obolo II Mfuf 1 Bible Online

II Mfuf 1 - obolo bible

II Mfuf 1

¹Solomọn gwun̄ kè Debit onenitet mkpulu ido Ijeren ikaan̄ inye, Okumugwem Awaji kan̄ okukup melek kan̄, mè irọ inyi ọmọ imin enenen.

²Solomọn onenigween̄ otutuuk ebi Ijeren ititiin̄, ebi ibot akọn̄ ìkikpulu obop obop ene, mè ebi ìkikpulu efit efit ene, mè ebi ibot oyerebet, mè otutuuk ebi ibot me Ijeren, mè otutuuk ebi ibot owot iman, mè initumu ikọ melek kiban̄.

³Solomọn melek otutuuk kiban̄ enenije isi ere mbuban òkup me Gibiọn, mije, Atanga Chinichini eyi Awaji, eyi Mosis ogwu ikwaan̄ Okumugwem orọbe me emen èwê, ìkup me ere keya.

⁴Ire, me ike mgbọ ya, Debit îwuuk lek iben okop inyan̄a-ibot Awaji inan̄a me Kiriat Jiarim isa inisun̄ me emen uwu ọfọ îgwuun̄be inyi me Jeruselem.

⁵Ire, ntook ekwe eyi Bejalen gwun̄ kè Uri, gwun̄ gwun̄ kè Uru orọbe, òwa si okupbe me Gibiọn me isi Akpatan̄ Mbuban Okumugwem. Solomọn mè otutuuk ebi ama enenisi ere ya isi ido ida Okumugwem.

⁶Solomọn onenisi igwa ngwugwa ewọwọp iriọk me inyọn̄ ntook ekwe ya me isi Okumugwem me emen Atanga Chinichini.

⁷Me eririeen̄ usen ya, Awaji okakana isibi me isi kè Solomọn, mè itumu inyi ibe, “Beek inu geelek oweekbe ibe emi ǹrọ ǹnyi owu.”

⁸Solomọn ofọfọọk Awaji ibe, “Owu okaan̄ ikpele ata ejit me lek kè Debit nte n̄a, mè isa emi irọ ubọọn̄ me irek kan̄.

⁹Mgbọ keyi, Okumugwem Awaji, soso rọ otutuuk use cha geelek ochieekbe nte n̄a Debit so, mije, îre owu orọ emi ubọọn̄, ibe emi ǹnemkpulu ife ìwawa ikechi kubọk achiaan̄ ijọn̄.

¹⁰Eya orọ, nyi emi iriọọn̄-inu mè ngobo-ntet eyi mâkọtbe isa ikikpulu ife chi, mije, ìre ekene ene obokọt ikikpulu ikpele ido ebi kwun̄ ìwawa ijot ere ikeyi?”

¹¹Awaji onenibe Solomọn, “Mije inu keyi orebe ulọk òkup owu me ejit, òkabeek inu ubọọn̄, mè ìre ibọbọọn̄ ubọọn̄, mè ìre umin, òkabeek ibe ebi ochicha kwun̄ ekwaan̄, òkabebeek si ibe owu òluk ujọn̄ọ ugwem, owu onenibeek iriọọn̄-inu mè ngobo-ntet eyi owu môkọtbe isa ikikpulu ebi n̄a ebi emi nrọbe owu ubọọn̄ ibe owu òkokpulu,

¹²eya orọ, iriọọn̄-inu mè ngobo-ntet, mânyi owu. Ire, mânyi owu si inu ubọọn̄, mè ibọbọọn̄ ubọọn̄, mè umin eyi kpunube ojelek kan̄ me etete ebi ubọọn̄ ìrarak ikup me isi kwun̄, ojelek kan̄ si ìkpokukup me mgbọ ukot kwun̄ isiraka.”

¹³Solomọn oneninan̄a me isi Atanga Chinichini me ere mbuban ya òkup me Gibiọn igwu ikom ifo Jeruselem, mè ikikpulu otutuuk Ijeren.

¹⁴Solomọn onenititiin̄ uji akọn̄ mè ebi akọn̄ inyọn̄ inyinya ijot ere. Solomọn ìkaan̄ obop mè efit uji akọn̄ ini, mè ikaan̄ akọp mè obop inyinya akọn̄ iba, mè isun̄ usini me ama ere ekisun̄ uji akọn̄, mè isa usini inisun̄ me agba lek kan̄ me Jeruselem.

¹⁵Ogwu ubọọn̄ Solomọn îrọ inyi alata araran̄ mè alata okuket iwa ijot Jeruselem kubọk ewuuk ikike, uti olik owawa ijot ere kubọk uti sikamọ ikike ògwogwook ichit lek orioon̄ isi ogoon̄.

¹⁶Solomọn ìlep ebi kè inyinya kan̄ inan̄a me Ijipiti mè Silisia.[1] Îre ebi mbit ogwu ubọọn̄ ekisi ilep inyinya chi me Silisia.

¹⁷Ema ekilep uji akọn̄ ge me Ijipiti efit ikpoko alata okuket gweregwen, mè èlep inyinya ge efit ikpoko alata okuket mè akọp go. Ema mîra ikisa si isi inyam inyi ebi ubọọn̄ Et mè ebi ubọọn̄ Aram.