Read obolo II Mfuf 10 Bible Online

II Mfuf 10 - obolo bible

II Mfuf 10

¹Reyobuwam onenisi Sekem, mije, otutuuk ebi Ijeren mînu me ere ya ibenirọ ọmọ ubọọn̄.

²Me ike mgbọ ya, Jerobuwam gwun̄ kè Nebat ìkup me Ijipiti ere îlibibe isi itap ibot, inyi ọmọ inwọnọ me ubọk ogwu ubọọn̄ Solomọn. Mgbọ înọbe inu chi òkimọnọ irek me Ijeren, inanan̄a ika.

³Eneniria ikwaan̄ igwen Jerobuwam. Ọmọ melek otutuuk ebi Ijeren enenisi itumu inyi Reyobuwam ibe:

⁴“Nte kwun̄ îsa ikpele unye ikwaan̄ ebi usun̄ ikeme eji. Mgbọ keyi, ire ofeme usini me lek ulobo akpan nte kwun̄ osabe ikeme eji isan̄a, mè irọ inyi ugwem kiji ifet, eji mêsiki ibot isi ikwaan̄ inyi owu.”

⁵Reyobuwam onenifọọk ema ibe, “Ìje, mè ìgwu ìkom ìna me òso usen ita.” Ema efofon.

⁶Ogwu ubọọn̄ Reyobuwam onenisi ido nteme me ubọk ebi ugane ebi mgbọ ìkinyi Solomọn ogwu ute nteme mgbọ îkupbe me ugwem, mè inido ema ibe, “Ìre keke ke enyi eteme emi ibe emi m̀fọọk ebi ife chi?”

⁷Ebi ugane cha efọfọọk ọmọ ibe, “Ire okaan̄ ata ejit me lek ife chi, mè ifọọk ema ata otu, ema mêkana ebi ikwaan̄ inyi owu mgbọ geelek.”

⁸Ire, Reyobuwam otetele nteme ebi ugane cha enyibe ọmọ, mè isi ido nteme me otu nsabọn irieen̄ ogbo kan̄, ebi melek kan̄ emiin̄be isibi, ebi ìkisi ikwaan̄ me irak kan̄,

⁹mè ido ema ibe, “Ìre keke ke enyi ebe emi m̀fọọk ife chi ìnunu inibe emi ǹrọ inyi akpan nte n̄a osabe ikeme ema ifet? Keke ore nkeek kinyi?”

¹⁰Nsabọn irieen̄ ebi otu ogbo kan̄ cha efọfọọk ọmọ ibe, “Ife chi, ebi ìnitumu inyi owu ibe, ‘Nte kwun̄ îsa ulobo akpan ikeme eji, ire, owu rọ inyi akpan kiji ifet’, inu owu obotumu inyi ema ire ikeyi: ‘Sọntiik otubọk n̄a îlobo lek igak ebon kè nte n̄a.

¹¹Nte n̄a îsa ulobo akpan ikeme enyi, ire, emi m̀basọsọkọ inu me lek akpan nte n̄a osabe ikeme enyi. Nte n̄a ìsa njijan̄ ikike ikisulu enyi osusut, ire, emi m̀bakisa eferen̄ isulu enyi osusut.’ ”

¹²Mgbọ usen ita ya osobe, Jerobuwam melek otutuuk ebi ama enenigwu ikom inu me lek kè Reyobuwam ogwu ubọọn̄, ike înyibe ema ida ibe egwu ekom enu enemun̄ ọmọ me òso usen ita.

¹³Ogwu ubọọn̄ ofọfọọk ema ikọ ya ujat ujat. Îtele nteme ebi ugane cha enyibe ọmọ,

¹⁴mè inisa nteme nsabọn irieen̄ ogbo kan̄ cha enyibe ọmọ ifọọk ebi ama ibe, “Nte n̄a îsa ulobo akpan ikeme enyi, ire, emi m̀basọsọkọ inu me lek akpan nte n̄a osabe ikeme enyi. Nte n̄a ìsa njijan̄ ikike ikisulu enyi osusut, ire, emi m̀bakisa eferen̄ isulu enyi osusut.”

¹⁵Ogwu ubọọn̄ ìkagban̄ utọn̄ me lek inu ebi ama edobe, mije, îre Okumugwem orọ ibe inu ya irọ ikeya, inyi ikọ Okumugwem otumube inyi Jerobuwam gwun̄ kè Nebat, inan̄a me otu ogwu nriran Ayija ogwu Silo, irọ iso.

¹⁶Mgbọ otutuuk ebi Ijeren emun̄be ibe ke ogwu ubọọn̄ ìkagban̄ utọn̄ ìnyi ema, ema efọfọọk ọmọ ibe: “Kpasi mgbaan̄-nrọ ke eji ekaan̄ melek kè Debit? Ìre keke ke eji ekaan̄ melek gwun̄ kè Jesi? Ebi Ijeren, ogwu ikaan̄ uwu kan̄, ifo! Debit, kpọ uwu kwun̄ ire eya, owu ire eya!” Otutuuk ebi Ijeren ekpọkpọk iyat, mè ifon uwu kiban̄.

¹⁷Ire, Reyobuwam okekikpulu ebi Ijeren ìluk me ama echi òkup me Juda.

¹⁸Ogwu ubọọn̄ Reyobuwam oneniria Adoniram ogwu ibot ogwu òkikpọ chieen̄ me lek ikwaan̄ òbọp, ibe isi itumu ikọ melek ebi Ijeren. Ire, ebi Ijeren eteteen̄ ewuuk isa itọbọ Adoniram ikpan̄. Ogwu ubọọn̄ Reyobuwam ogwagwat lek iwulu inin̄ uji akọn̄ kan̄, mè ilibi ifo Jeruselem.

¹⁹Îre mije keya ke ebi Ijeren agan̄ inyọn̄ efieek inan̄a me lek uwu kè Debit mege inire chereyi.