Read obolo II Mfuf 11 Bible Online

II Mfuf 11 - obolo bible

II Mfuf 11

¹Mgbọ Reyobuwam onube inire Jeruselem, itititiin̄ otutuuk ebi ìriọọn̄ ukot akọn̄ me otoko kè Juda mè otoko kè Benjamin, efit mè akọp obop ene jeeta, isasa isi itim akọn̄ me lek ebi Ijeren, inyi ọmọ isa me ikeya iyaka ikpọk ikaan̄ otutuuk ebi Ijeren agan̄ inyọn̄ me irak mkpulu kan̄.

²Ire, Okumugwem otutumu inyi Semaya ogwu ikwaan̄ Awaji ibe ikeyi:

³“Tumu nyi Reyobuwam gwun̄ kè Solomọn ogwu ubọọn̄ Juda, mè tumu si nyi otutuuk ebi Ijeren ìkup me agan̄ ebi otoko kè Juda mè ebi ìluk me agan̄ ebi otoko kè Benjamin ibe:

⁴‘Okumugwem ìtumu ibe ikeyi: Ikalululuk ìsi ìtim akọn̄ me lek ebi ngwan̄ kinyi, ebi Ijeren. Ìgwu ìkom! Ogwu ikaan̄ uwu kan̄, ifo! Mije, otutuuk inu chi òkimọnọ irek ìnan̄a me ubọk n̄a.’ ” Ema egbagban̄ utọn̄ me lek ikọ Okumugwem, mè igwu ikom ifon, kpeyaka ijibi akọn̄ isi itim me lek kè Jerobuwam.

⁵Reyobuwam ìluk me Jeruselem, mè inama owuwa ama mgban akọn̄ kechi me Juda:

⁶Beteleyem, mè Etam, mè Tekowa,

⁷mè Bet Suru, mè Soko, mè Adulam,

⁸mè Gat, mè Maresa, mè Jifu,

⁹mè Adorayim, mè Lakis, mè Ajeka,

¹⁰mè Sora, mè Ajalọn, mè Eburọn. Ama kechi ore ama mgban akọn̄ me Juda mè Benjamin.

¹¹Ìkpọkpọk ama cha inama inyi inye, mè ito ebi ibot akọn̄ me ama cha geelek, mè ikinyi ebi ama cha inorie mè aran̄ mè miin̄,

¹²mè itaak si ebi kè agbọ mè ebi kè otunwa me otutuuk ama cha, inyi ama cha ikeke inye me akọn̄ enenen. Ikeyi ke îtet Juda mè Benjamin ikaan̄ me irak mkpulu kan̄.

¹³Ebi ngwugwa mè ebi otoko kè Libai ebi ìkup me otutuuk ido Ijeren agan̄ inyọn̄ ekekeke inyi Reyobuwam.

¹⁴Ebi otoko kè Libai eyayaak itele ijọn̄ urie anam kiban̄ mè ijọn̄ ìrot kiban̄ me agan̄ ya, mè ika inu Juda melek Jeruselem, mije, Jerobuwam mè ebi bọn kpebọkọ ema itap kubọk ebi ngwugwa Okumugwem.

¹⁵Jerobuwam ogogobo ebi ngwugwa kan̄ ito ibe ekesi ikwaan̄ me isi-ijọn̄ kan̄ cha, mè ekefaka mfaka enyi mkpọmfaka echi ebot melek echi bọn eriembuuk cha îrọbe igwook.

¹⁶Mije keya, ogwu otoko ebi Ijeren geelek òbeben me ejit ibe ke ọmọ ìbotọbọ ebum inyi Okumugwem, Awaji ebi Ijeren, îra igọọk ebi otoko kè Libai ika inu Jeruselem, inyi ọmọ inigọọk ikigwa ngwugwa inyi Okumugwem Awaji ebi nte nte kiban̄.

¹⁷Ife chi enenirọ mkpulu ido Juda ikeke inye acha ita, mè ikitap Reyobuwam gwun̄ kè Solomọn efuuk me emen, mè ikiluk ugwem ike ema elukbe me ukot kè Debit mè Solomọn.

¹⁸Reyobuwam onenido Mayalat gwun̄ enenwaan̄ kè Jerimot gwun̄ kè Debit. Nga ke Mayalat ìre Abiyali gwun̄ enenwaan̄ kè Eliabu gwun̄ kè Jesi.

¹⁹Mayalat oneniman bọn ebirieen̄ inyi Reyobuwam. Erieen̄ kiban̄ ìre: Jewus, mè Semariya mè Jayam.

²⁰Reyobuwam onenido si Maaka gwun̄ enenwaan̄ kè Abusolọm, mè ibon Abija, mè Atai, mè Jija mè Selomit me owot kè Maaka.

²¹Reyobuwam onenima Maaka gwun̄ kè Abusolọm igak otutuuk ebi nwa kan̄ kechilọ mè ebi ugan. Reyobuwam ìkaan̄ akọp mè nwa jeeta, mè akọp ebi ugan gweregwen, mè ibon akọp ibot bọn ebirieen̄ iba mè jeeta, mè akọp ibot bọn ebibaan̄ gweregwen.

²²Reyobuwam onenigobo gwun̄ kan̄, Abija, gwun̄ kè Maaka, ibe ire ogwu ibot me etete ebi ngwan̄, inyi môkanabe ogwu ubọọn̄ me irek kan̄.

²³Reyobuwam onenisa me iriọọn̄-inu iria usini nsabọn kan̄ ikana itaak me otutuuk agan̄ geelek me Juda mè Benjamin, mè otutuuk ama mgban̄ akọn̄ cha kubọk ebi ibot. Înyi ema ogbogbo inu, inyi ema mêkọtbe isa iluk ugwem, mè iweek si nwa ogbogbo inyi ema otutuuk.