Read obolo II Mfuf 12 Bible Online

II Mfuf 12 - obolo bible

II Mfuf 12

¹Mgbọ Reyobuwam omun̄be ibe ke ọmọ îra itet irek ubọọn̄ kan̄ inye, mè ikana si ogwu ònyenye lek, ijijit Ikan Okumugwem itele, ọmọ mè otutuuk ebi Ijeren.[8]

²Me òso acha go me lek mkpulu ogwu ubọọn̄ Reyobuwam, Sisak, ogwu ubọọn̄ Ijipiti, ojijibi akọn̄ initim me lek ama Jeruselem. Îre mije ema kpeyaka ikisiki ibot inyi Okumugwem ke inu ya orọ.

³Ogwu ubọọn̄ Ijipiti osasa obop mè efit uji ijọn̄ iba, mè obop ene gweregwen, ebi ìkikọp inyinya akọn̄, melek ogbogbo ebi akọn̄ ebi Libiya, mè ebi Suka, mè ebi Etiopia kperiọọn̄ otu ifuk, igbaalek inan̄a me Ijipiti inu.

⁴Ema ebọbọkọ ama mgban akọn̄ cha òkup me Juda, mè itim akọn̄ mege inire Jeruselem.

⁵Semaya ogwu nriran onunu me lek kè Reyobuwam mè ebi ibot mkpulu Juda me Jeruselem, ere ema etitiin̄be mije ukpook kè Sisak, mè itumu inyi ema ibe, “Okumugwem ìtumu ibe ikeyi: ‘Mije enyi ejitbe emi, emi si nra ijit enyi itele me ubọk kè Sisak.’ ”

⁶Ebi ibot mkpulu Ijeren cha melek ogwu ubọọn̄ enenisiki lek kiban̄, mè itumu ibe, “Inu Okumugwem orọbe îtat.”

⁷Mgbọ Okumugwem omun̄be ibe ke ema mîsiki lek, Okumugwem onenitumu inyi Semaya ibe: “Mije ema esikibe lek, m̀kpajijaka ema. Sọnja mgbọ isiraka, mânyan̄a ema isibi. M̀kpasa me ubọk kè Sisak ida unaan̄-ejit n̄a igwook me Jeruselem.

⁸Ire, mârọ inyi ema ekana usun̄ me irak kè Sisak, inyi ema esa me ikeya eriọọn̄ esese òkup me lek isisi ikwaan̄ inyi emi melek isisi ikwaan̄ inyi ebi ubọọn̄ ofifi ido.”

⁹Sisak, ogwu ubọọn̄ Ijipiti, otitim akọn̄ me Jeruselem, mè ikpulu otutuuk inu òkup me uwu isun̄-inu me Uwu Mbuban Okumugwem, mè emen uwu isun̄-inu me uwu ogwu ubọọn̄. Ìchachiaan̄ otutuuk inu isa ifo, igbaalek otutuuk agbọ alata araran̄ cha Solomọn orọbe.

¹⁰Reyobuwam oneniyaka irọ agbọ echi ekwe isun̄ me useen̄ echi alata araran̄ cha, mè isa ikana itap me ubọk ebi ibot ikwaan̄ ebi ìkibem otunchit uwu ogwu ubọọn̄ ibe ekesa esi ikwaan̄.

¹¹Mgbọ geelek ogwu ubọọn̄ obosi Uwu Mbuban Okumugwem, ebi mbem cha mîra iben agbọ ekwe cha isa igọọk ọmọ ije, ọmọ isiyaka ifo, ema mîra iyaka agbọ cha isi isun̄ me emen agwut ebi mbem.

¹²Mije Reyobuwam osikibe lek, Okumugwem obeben unaan̄-ejit kan̄ isan̄a ọmọ me lek, ìkajijaka ọmọ ìsan̄a isi ge. Me ido Juda si, inu obebene ikije ijaan̄.

¹³Reyobuwam onenitet lek inye ikikpulu me Jeruselem kubọk ogwu ubọọn̄. Reyobuwam ìre akọp acha ini mè ge mgbọ îkanabe ogwu ubọọn̄. Inenikpulu akọp mè acha jaaba me Jeruselem, ama Okumugwem ogobobe isibi me otutuuk otoko ebi Ijeren ibe ìre ere ebekimin Erieen̄ kan̄. Erieen̄ ogwu uga ìre Nayama, ogwu Amọn.

¹⁴Reyobuwam orọrọ ijo inu, mije, ìkasa otutuuk ejit kan̄ ìweek Okumugwem.

¹⁵Otutuuk inu òrọrọ me ukot mkpulu kè Reyobuwam, bene me ibebene si re itata kan̄, mîge otutuuk itap me emen ikpa mfufuk kè Semaya ogwu nriran, mè eyi kè Ido ogwu òmọọn̄ inu kubọk mfufuk owot iman. Reyobuwam mè Jerobuwam ekititim akọn̄ mgbọ geelek, utelelek ìkakikup me etete kiban̄.

¹⁶Reyobuwam onenikwu ifo igọọk ebi nte nte kan̄, ebeben ifuun̄ me ama kè Debit. Abija ogwu gwun̄ onenikana ubọọn̄ me irek kan̄.