Read obolo II Mfuf 14 Bible Online

II Mfuf 14 - obolo bible

II Mfuf 14

¹Abija onenikwu ifo igọọk ebi nte nte kan̄, ebeben ifuun̄ me ama kè Debit. Asa ogwu gwun̄ onenikana ubọọn̄ me irek kan̄. Me ukot mkpulu kè Asa, otutuuk ido Juda okukup me esuuk akọp acha.

²Asa îrọ inu ònwọnwọn mè itat me chieen̄ Okumugwem Awaji kan̄.

³Îgbugbọ otutuuk ntook ngwugwa mè isi-ijọn̄ enamabe inyi ofifi awaji cha igwook, mè igbugbọ si ewuuk mfaka cha geelek, mè ichon si uti yọk Asera cha igwook.

⁴Înyi ebi Juda ida ibe eweek Okumugwem Awaji ebi nte nte kiban̄, mè ekesun̄ ikan kan̄ mè ekerọ otutuuk inu geelek îtọbe ibe ekerọ.

⁵Îgwak si otutuuk isi-ijọn̄ geelek, mè otutuuk ntook nsensi geelek me otutuuk ama ile geelek me Juda. Otutuuk ido Juda okukup me esuuk me ukot kan̄.

⁶Asa onenikpọk inama ama mgban akọn̄ cha òkup me Juda, mije otutuuk ido okupbe me esuuk. Kpunu ido geege òtitim akọn̄ me lek kan̄ me otutuuk acha cha me ukot mkpulu kan̄, mije, Okumugwem înyi ọmọ utelelek.

⁷Asa onenitumu inyi ebi Juda ibe, “Eji enekpọk enama ama ile chi, mè ewak mgban ekana ema ge ge, mè enama si uwu-oket me emen kiban̄, mè etaak otunchit melek olọkọrọ me lek otunchit cha. Lek ijọn̄ yi ìkup si eji me ubọk, mije eji ekitọbọ ebum inyi Okumugwem Awaji kiji. Eji mîtọbọ ebum inyi ọmọ, inyinyi eji utelelek me agan̄ geelek.” Ema enanama ido kiban̄, inu okpọkpọ ikije ijaan̄ ema me lek.

⁸Asa îkaan̄ ikpele urum akọn̄: efit obop ebi akọn̄ ita ìkiben ikpele agbọ melek otunwa enan̄a me Juda, sà efit obop ebi akọn̄ iba mè akọp jeeta ìkiben asabọn agbọ mè ogbaan̄ enan̄a me Benjamin. Otutuuk ife chi ìre ebi usọ akọn̄ ìrọriọọn̄ ukot akọn̄.

⁹Jera ogwu Etiopia onenijibi akọn̄ inu me lek ebi Juda, melek urum akọn̄ òwawa iso efie ene, mè efit uji akọn̄, mè ije inire ama Maresa.

¹⁰Asa onenijibi akọn̄ isibi isi ikweek ọmọ, mè irieen̄ akọn̄ kan̄ me iteke Jefata me agba lek ama Maresa.

¹¹Asa oneniriaak uriaak igwen Okumugwem Awaji kan̄ ibe ikeyi, “Jei Okumugwem, ilọ me lek kwun̄, kpunu ogwu òkitap ubọk inyi ogwu ikakaan̄ge unye, inyi ikọt itim akọn̄ me lek ogwu ònyenye lek. Jei Okumugwem Awaji kiji, tap ubọk nyi eji, mije, îre owu ke eji esa itoon̄ ejit, me erieen̄ kwun̄ si ke eji esibi inu ibenitim akọn̄ me lek ikpele urum akọn̄ yi. Owu ore Okumugwem Awaji kiji, kachieek ibe ebilene egak owu.”

¹²Okumugwem otitim akọn̄ me lek ebi akọn̄ Etiopia me isi kè Asa mè ebi Juda. Ebi Etiopia elililiin̄.

¹³Asa mè ebi akọn̄ kan̄ elililaba ema mege isi igwook me Gera, mè ikpan̄ ema iwa enenen ire lek kpeyaka ikọt ibene isi. Mije, Okumugwem mè urum ebi akọn̄ kan̄ ekpukpukpuku ema igwook. Ebi akọn̄ Juda efufum inu iwa enenen me akọn̄ ya isa ika.

¹⁴Ebi Juda ejijijaka otutuuk asabọn ama òkup ikana Gera igwook, mije, uga ukpook Okumugwem îkeme ebi ama cha enenen. Ebi Juda efufum asabọn ama cha irak, mije, inu mfum ojotbe emen ama cha.

¹⁵Ebi Juda mîjijaka si ebi kè uwu ọfọ ebi òkpukpo arọọn̄ igbaalek, mè ikpulu owuwa arọọn̄, mè ebot mè aligọ. Ema enenigwu ikom ika inu Jeruselem.