Read obolo II Mfuf 19 Bible Online

II Mfuf 19 - obolo bible

II Mfuf 19

¹Jiosefat ogwu ubọọn̄ Juda onenika inire uwu ubọọn̄ kan̄ me Jeruselem me utelelek.

²Jewu ogwu nriran, gwun̄ kè Anani, onanan̄a isi ichichini ogwu ubọọn̄ Jiosefat, mè initumu inyi ọmọ ibe, “Ìre îtat ibe ene itap ubọk inyi ogwu ikpak, mè igọọk ogwu òchacha Okumugwem itet unene? Mije inu yi owu orọbe, unaan̄-ejit Okumugwem îkeme owu.

³Ubọk geelek, îkaan̄ ata inu òkup me ugwem kwun̄. Owu ojijaka uti yọk Asera isan̄a me otutuuk ido, mè isa otutuuk ejit kwun̄ iweek Awaji.”

⁴Jiosefat ìluk me Jeruselem, mè ikinan̄a ije isi ichichini melek ebi ene bene me Bieseba me osiki isi ire inyọn̄ ijọn̄ ogoon̄ ogoon̄ ebi otoko kè Iferem me agan̄ inyọn̄, mè isa me ikeya irọ inyi ema egwu ekom enegọọk Okumugwem Awaji ebi nte nte kiban̄.

⁵Jiosefat ototo ebi oyerebet iso ikana me ama me ama me otutuuk ama mgban akọn̄ òkup me ido Juda,

⁶mè itumu inyi ema ibe, “Ìgbala chieen̄ me lek ikwaan̄ kinyi, mije, ìkare bak me lek ebilene ke enyi ekisibi oyerebet, îre bak me lek Okumugwem. Okumugwem ọmọ òwa melek kinyi mgbọ geelek enyi ekifieek oyerebet.

⁷Eya orọ, ìkaan̄ ukpook Okumugwem me emen kinyi. Ìgbala chieen̄ me lek oyerebet geelek enyi ekisibi, mije, me lek Okumugwem Awaji kiji, kpunu mfeen̄, kpunu ulibi chieen̄, kpunu si ngan.”

⁸Me Jeruselem, Jiosefat îto si usini ebi otoko kè Libai, mè usini ebi ngwugwa, mè ebi ibot owot iman ebi Ijeren, ibe ekegọọk esibi oyerebet me inu ofolek Ikan Okumugwem, mè ekegọọk enen̄e gọlọgọlọ geelek òkup me etete ebi ene esun̄. Ife chi ekaka iniluk me Jeruselem.

⁹Înyi ema ida ibe: “Ìkirọ ikwaan̄ kinyi me ukpook Okumugwem, mè atikọ, mè otutuuk ejit kinyi.

¹⁰Ire ebi ngwan̄ kinyi ìluk me ama kiban̄ isa oyerebet inu me isi kinyi ofolek ififiin̄ eje ene, mè ìre oyerebet ofolek Ikan Awaji, mè ikọ îtọbe, mè orọmijọn̄ kan̄, mè ida înyibe, enyi ìtaba ema ubọk me utọn̄, inyi ema ekarọ ibe awọ itet ema me isi Okumugwem, inyi unaan̄-ejit Okumugwem ikakeme enyi mè ebi ngwan̄ kinyi. Ikeyi ke enyi ebekirọ, inyi awọ ikatet enyi.

¹¹“Amariya ogwu ibot ngwugwa obore ogwu ibot inyi enyi me inu geelek òfo me lek Okumugwem. Jebadiya gwun̄ kè Isimen, ogwu ibot otoko kè Juda obore ogwu ibot me inu geelek òfo me lek ogwu ubọọn̄. Ebi otoko kè Libai ebere ebi ibot ikan inyi enyi. Ìtet lek ìnye ìkirọ ikwaan̄ kinyi ike îgbebe. Kè Okumugwem ikup melek ebi geelek ìrọrọ ijaan̄.”