Read obolo II Mfuf 2 Bible Online

II Mfuf 2 - obolo bible

II Mfuf 2

¹Solomọn oneninyi ida ibe enama Uwu Mbuban enyi Erieen̄ Okumugwem, mè enama si uwu ubọọn̄ eyi kan̄.

²Solomọn onenigobo akọp obop ebirieen̄ jaaba ebi ìbekibeme nroon̄ ikwaan̄, mè obop ebirieen̄ jeeta ebi ìbekifieek ewuuk me inyọn̄ ogoon̄, mè igobo obop ene ita mè efit ene gweregwen ebi ìbekikpọ chieen̄ me lek otutuuk ebi ikwaan̄ cha.

³Solomọn oneniria etip ijet Iram ogwu ubọọn̄ Taya ibe ikeyi: “Ria uti olik jet emi kubọk oriabe ijet Debit nte n̄a, eyi îsabe inama uwu ubọọn̄ inyi lek kan̄, mè inin̄ emen iluk.

⁴Mâninama Uwu Mbuban inyi Erieen̄ Okumugwem Awaji n̄a, mè ifaka itap me ubọk Okumugwem. Îre me emen kan̄ ke ebekiwọp nsensi utop olu inyi ọmọ, mè ikitoon̄ fituru mbuban me inyọn̄ ikasi me isi kan̄ mgbọ geelek, mè ikigwa ngwugwa ewọwọp ewelegwe mè ikakwun̄, mè Usen Mbuban geelek, mè Aya Onyan̄ geelek, mè mgbọ ijọk Okumugwem Awaji kiji echi ekirie me ibot mgbọ geelek. Eyi ìre ikan òkup inyi otutuuk Ijeren isusun̄ mege ire mgbọ geelek.

⁵“Uwu Mbuban mbanama inyi Awaji kiji ìre ikpele Uwu Mbuban, mije, Awaji kiji îmin igak otutuuk ofifi awaji geelek.

⁶Me atikọ, kpunu ogwu òbokọt inama Uwu Mbuban eyi òbota ọmọ lek, mije, emen inyọn̄ ìkata ọmọ lek, ikerere emen inyọn̄ eyi òbebene ichit. Emi ìre ekene ene, eyi nkiweek inanama Uwu Mbuban inyi ọmọ? Îre gaalek ere ebekiwọp ngwugwa inyi ọmọ ke mbanama.

⁷“Eya orọ, ria ogwu ikwaan̄ ge jet emi, ogwu usọ ikwaan̄ ubọk òrọriọọn̄ ikwaan̄ alata araran̄, mè alata okuket, mè ekwe, mè okwukwut, mè iriọọn̄ si ikwaan̄ ilọlọk ekwut irio irio, mè echi eje eje, mè echi oluku oluku, mè iriọọn̄ ubọk ekirọkọ uti mè ewuuk. Ene ya mônigọọk ebi usọ ikwaan̄ ubọk nkaan̄be me Juda mè Jeruselem, ebi nte n̄a Debit ogobobe isun̄, igbaan̄ isi ikwaan̄.

⁸“Ria si owuwa uti olik, mè uti siperes, mè uti junipa ònan̄a me Lebanọn jet emi. Nriọọn̄ ibe ke ebi kwun̄ ìre ebi usọ me lek ikwaan̄ ichocho uti ile. Ebi n̄a melek ebi kwun̄ mêgbaan̄ irọ ikwaan̄,

⁹inyi ǹkọt ǹkaan̄ uti òwawa enenen, mije, Uwu Mbuban mbanama mômin, mè ikaan̄ òrirọ.

¹⁰Mânyi ebi ìkicho uti mè ebi ìkibabak efie kilo akpa wit iba, mè efie kilo akpa balì iba, mè efit obop iko miin̄ ini, mè efit obop iko aran̄ olifu ini.”

¹¹Iram ogwu ubọọn̄ Taya onenige ikpa ifọọk Solomọn otu ibe, “Mije Okumugwem omabe ebi kan̄ ke îsa owu irọ ogwu ubọọn̄ kiban̄.”

¹²Îge si igbaalek ibe, “Itọn̄ ikup inyi Okumugwem, Awaji ebi Ijeren, ogwu òrorom inyọn̄ mè ijọn̄, ogwu ònyinyi ogwu ubọọn̄ Debit gwun̄ enerieen̄ òriọọn̄ inu, ogwu òkakaan̄ ifuk-ibot, mè ngobo-ntet, ogwu òboninama Uwu Mbuban inyi Okumugwem, mè inama si uwu ubọọn̄ inyi lek kan̄.

¹³“Emi m̀baria Uram-Abi, ogwu usọ ikwaan̄ òkaan̄ iriọọn̄-inu ijet owu.

¹⁴Ogwu uga ìre ogwu otoko kè Dan, sà ogwu ute ore ogwu Taya. Îriọọn̄ ikwaan̄ alata araran̄, mè alata okuket, mè ekwe, mè okwukwut, mè ewuuk, mè uti, mè iriọọn̄ si ikwaan̄ ilọlọk ekwuk irio irio, mè echi oluku oluku, mè echi eje eje, mè ikwaan̄ lilin̄. Îriọọn̄ si ikwaan̄ irọrọkọ inu me lek uti mè ewuuk mè lek inu geelek. Môkọt irọ inu geelek enyibe ibe irọ. Môkọt igọọk si ebi ikwaan̄ ubọk kwun̄ mè ebi ikwaan̄ ubọk kè nte kwun̄, ogwu ubọọn̄ Debit, igbaan̄ isi ikwaan̄.

¹⁵“Eya orọ, mgbọ keyi, ria akpa wit cha, mè akpa balì, mè aran̄ olifu, mè miin̄ otumube cha jet eji,

¹⁶inyi eji enin̄ oron Lebanọn esi echon otutuuk uti cha ike oweekbe, mè ekpukpọt egwook me okwaan̄, mè ebọp esa ete me inyọn̄ isi mun̄ enu Jọpa. Owu mônenikpulu me Jọpa isa isi Jeruselem.”

¹⁷Solomọn onenifuk otu ifuk otutuuk ebi ichen ìkup me Ijeren, kubọk ogwu ute Debit ofukbe. Otu ifuk kiban̄ orere efit obop mè akọp obop go mè obop ita, mè efit ene gweregwen.

¹⁸Solomọn onenisa akọp obop ene jaaba irọ ebi ìbekibeme inu, mè isa akọp obop ene jeeta irọ ebi ìbekifieek ewuuk me inyọn̄ ogoon̄, mè inigobo obop ene ita mè efit ene gweregwen ebi ìbekikpọ chieen̄ me lek otutuuk ebi ikwaan̄ cha.