Read obolo II Mfuf 25 Bible Online

II Mfuf 25 - obolo bible

II Mfuf 25

¹Amajiya ìre akọp acha iba mè go mgbọ îkanabe ogwu ubọọn̄, mè ikup me Jeruselem ikpulu akọp acha iba mè onaan̄ge. Erieen̄ ogwu uga ìre Jeyowadin ogwu Jeruselem.

²Amajiya îrọ inu òtatat me chieen̄ Okumugwem, ire, ìkarọ me otutuuk ejit kan̄.

³Mgbọ îmun̄be ibe ke mkpulu kan̄ îkeke inye, ikpakpan̄ ebi ibot ikwaan̄ kan̄ cha ebi ìkpakpan̄ nte kan̄ ogwu ubọọn̄.

⁴Ire, ìkakpan̄ bọn ebirieen̄ ebi ife cha. Ìrọ ikeya igọọk me inu egebe me emen Ikpa Ikan, me emen ikpa kè Mosis, ere Okumugwem onyibe ida ibe, “Kpebekpan̄ ebi ute mije nrọ-nlọ ebi bọn, kpebekpan̄ si nsabọn mije nrọ-nlọ ebi nte kiban̄; ene geelek ìbokwu mkpa mije ijo inu kan̄.”

⁵Amajiya onenigwen ebi otoko kè Juda mè ebi otoko kè Benjamin ititiin̄, mè inidọmọ ema otutuuk me owot iman me owot iman itaak me irak ebi ibot akọn̄ ebi ìkikpulu obop obop ene mè ebi ìkikpulu efit efit ene. Inenifuk ebi ìsoso akọp acha iba mè iraka, ema erere efit obop nsabọn irieen̄ ita ebi mêkọtbe iben otunwa mè agbọ isibi isi akọn̄.

⁶Amajiya îbọkọ si efit obop ebi akọn̄ Ijeren me ọkọ igbaalek, mè ikpe obop kilo alata okuket ita, mè efit kilo ini inyi ema.

⁷Ire, ogwu ikwaan̄ Awaji ge onunu initumu inyi Amajiya ibe, “Ogwu ubọọn̄, kasa ebi akọn̄ Ijeren ìgbaalek ìsi akọn̄, mije, Okumugwem ìkakup melek ebi Ijeren, ìkakukup si melek ebi otoko kè Iferem.

⁸Mije, ikerere owu òsisi, mè inye lek itim akọn̄ ijaan̄, Awaji môrọ inyi ebi ochicha kwun̄ etim ekpan̄ owu. Mije, Awaji îkaan̄ unye isasa itap ubọk inyi ene, mè ikaan̄ si unye isasa irọ inyi etim ekpan̄ ene.”

⁹Amajiya onenido ogwu ikwaan̄ Awaji ya ibe, “Sà obop kilo alata okuket ita, mè efit kilo ini cha eyi mkpebe inyi ebi ọkọ akọn̄ Ijeren cha ye?” Ogwu ikwaan̄ Awaji ya ofọfọọk ibe, “Okumugwem môkọt inyi owu eyi òwawa igak ikeya.”

¹⁰Amajiya oneninyi ida ibe ebi akọn̄ ìnan̄a me otoko kè Iferem efon, ema efofon. Ire, ema enanaan̄ ejit enenen me lek ebi Juda, mè isa me unaan̄-ejit inan̄a ifon.

¹¹Amajiya onenitet lek inye, mè isa ebi akọn̄ kan̄ isi akọn̄ me iteke Uchi, mè ikpan̄ akọp obop ebi akọn̄ Seya.

¹²Ebi akọn̄ Juda etetet si akọp obop ebi Edọm me agam, mè isa isi inyọn̄ ubene orioon̄ ge, mè ikup me inyọn̄ ibot orioon̄ ya itọọn̄ ema igwook me ijọn̄, ema erururọn̄ọ ikpọk isan me lek ewuuk me ijọn̄.

¹³Me ike mgbọ ya, ebi ọkọ akọn̄ Ijeren cha ebi Amajiya obe egwu ekom efon, mè ekagọọk ema ìsi akọn̄, esisi enun̄unun̄ me owuwa ama ile òkup me Juda, ibene me Sameria isi ire Bet Oron, mè ikpan̄ obop ene ita, mè ifum ogbogbo inu isa ifon.

¹⁴Mgbọ Amajiya otimbe ikpan̄ ebi Edọm, mè ikika, isasa owuwa mkpọmfaka ebi Edọm igbaalek ika, mè ininama isi-ijọn̄ itap isa irọ awaji kan̄, mè ikitọbọ ebum inyi, mè ikiwọp ngwugwa inyi.

¹⁵Okumugwem onanaan̄ ejit enenen inyi Amajiya, mè iniria ogwu nriran ge isi lek kan̄. Ogwu nriran ya onenisi ido ọmọ ibe, “Keke orọ owu okitọbọ ebum inyi awaji ebi ofifi ido, echi kpekọt inyan̄a ebi kiban̄ isibi me ubọk kwun̄?”

¹⁶Ikọ ya me otu ogwu nriran, Amajiya otutumu inyi ọmọ ibe, “Ìre eji eria owu ibe owu ònoteme ogwu ubọọn̄ nteme? Chit otu. Ìre òkiweek ibe ekpan̄ owu?” Ogwu nriran ochichit otu, mè initumu ibe, “Nriọọn̄ ibe ke Awaji îra itumu ifieek ijijijaka owu, mije owu orọbe inu yi, mè ijit igbagban̄ utọn̄ me lek nteme n̄a.”

¹⁷Amajiya ogwu ubọọn̄ Juda onenibọkọ nteme me otu ebi nteme kan̄, mè iniria etip ijet Jeyowas gwun̄ kè Jeyowayaji, gwun̄ kè Jewu ogwu ubọọn̄ Ijeren ikiriak ìre inyi ibe: “Sibi na, inyi eji echichini isi mè isi me oyet akọn̄.”

¹⁸Ire, Jeyowas ogwu ubọọn̄ Ijeren onenisa urọk ifọọk Amajiya ogwu ubọọn̄ Juda otu ibe: “Kpọ, ukpak ge me oron Lebanọn ìria etip isi lek ilip me oron Lebanọn yaage ibe, ‘Sa gwun̄ kwun̄ enenwaan̄ che olom nyi gwun̄ n̄a enerieen̄.’ Me ekakpọge chieen̄, anam ge me oron Lebanọn onenije iraka, mè ijak ukpak ya ikpukpuku.

¹⁹Owu òkitumu me ejit kwun̄ ibe ke owu otim akọn̄ ikpan̄ Edọm, mè isa me ikeya ikibene lek, mè ikigugo lek. Ire, siki kweek irek me uwu kwun̄. Òjeje ikiweek itatap lek kwun̄ me ùrioon̄, mè itap si ebi Juda igbaalek?”

²⁰Ire, Amajiya ìkagban̄, mije îre Awaji orọ ibe ikup ikeya, inyi ọmọ isa me ikeya ikana ema itap me ubọk kè Jeyowas, bak me lek ema ekitọbọ ebum inyi awaji ebi Edọm cha.

²¹Jeyowas ogwu ubọọn̄ Ijeren onenijibi akọn̄ isi ichichini Amajiya ogwu ubọọn̄ Juda isi mè isi me Bet Semes me Juda.

²²Ebi Ijeren etitim ikpan̄ ebi Juda me akọn̄ ya, ebi Juda elilim ifon uwu kiban̄.

²³Jeyowas ogwu ubọọn̄ Ijeren otetet Amajiya ogwu ubọọn̄ Juda, gwun̄ kè Jowas, gwun̄ kè Jeyowayaji[16], me agam me Bet Semes. Jeyowas osasa Amajiya igbaalek isi Jeruselem, mè igbugbọ mgban ama Jeruselem ibene me otunchit Iferem isi ire otunchit Mfufọ. Ere îgbugbọbe îjọn̄ọ iso efit ejit ge.

²⁴Jeyowas onenikpulu otutuuk alata araran̄ mè alata okuket mè otutuuk nroon̄ ikwaan̄ emun̄be me Uwu Mbuban Okumugwem echi Obedi-Edọm okikpọ chieen̄ me lek, mè ikpulu si otutuuk inu ubọọn̄ geelek òkup me ere isun̄-inu me uwu ogwu ubọọn̄, mè itet si owuwa ebi ene agam agam me isi akọn̄ isa igbaalek igwu ikom ifo Sameria.

²⁵Mgbọ Jeyowas gwun̄ kè Jeyowayaji ogwu ubọọn̄ Ijeren okwube iraka, Amajiya gwun̄ kè Jowas ogwu ubọọn̄ Juda îluk ugwem akọp mè acha go itoon̄ me inyọn̄.

²⁶Otutuuk ofifi inu òrọrọ me ukot mkpulu kè Amajiya, bene me ibebene si re òta, mîge otutuuk itap me emen ikpa mfufuk ebi ubọọn̄ Juda mè ebi ubọọn̄ Ijeren.

²⁷Bene me mgbọ Amajiya otelebe igọgọọk Okumugwem, ebi ene me Jeruselem ebebene ikitọt ikpakpan̄ ọmọ. Ililibi ifo Lakis. Eraria ebi ene igọọk ọmọ me Lakis, ife cha ekpakpan̄ ọmọ me ere ya.

²⁸Ebeben nkwukwu kan̄ me inyọn̄ inyinya isa ika inu inifuun̄ me ama kè Debit,[17] me ere efuun̄be ebi nte nte kan̄.