Read obolo II Mfuf 26 Bible Online

II Mfuf 26 - obolo bible

II Mfuf 26

¹Otutuuk ebi Juda enenisa Ujaya,[18] gwun̄ kè Amajiya, òrere gwun̄ akọp mè acha gweregwen, irọ ubọọn̄ me irek ogwu ute.

²Mgbọ Amajiya okwube iraka, îre Ujaya okpọk ibọkọ ama Elat isa inyi ebi Juda, mè ikpọk ama ya si inama.

³Ujaya ìre akọp mè acha gweregwen mgbọ îkanabe ogwu ubọọn̄, mè ikup me Jeruselem ikpulu akọp acha go mè iba. Erieen̄ ogwu uga ìre Jekolia, ogwu Jeruselem.

⁴Ujaya îrọ inu òtatat me chieen̄ Okumugwem, kubọk Amajiya ogwu ute orọbe.

⁵Ujaya îweek Awaji me otutuuk mgbọ Jekaraya, ogwu òkiteme ọmọ nteme me ukpook Awaji, okupbe me ugwem. Otutuuk mgbọ îkiweek Okumugwem, Awaji okekirọ ibe inu ije ijaan̄ me lek kan̄.

⁶Ujaya onenisi itim akọn̄ me lek ebi Filisia, mè igbugbọ mgban ama Gat, mè eyi ama Jabine, mè eyi ama Asidọdu si igwook, mè ikpọk inama ama echi òkup me agba lek Asidọdu, mè owuwa ama òkup me ofifi agan̄ me ido Filisia.

⁷Awaji onenitap ubọk inyi Ujaya, ititim akọn̄ ikpan̄ ebi Filisia, mè ebi Arabu ebi ìluk me Guru-Baali mè ebi Meyun.

⁸Ebi Amọn ekekinikpe otitip mkpulu inyi Ujaya. Etip kan̄ otataan̄ mege isi igwook me otubọk ijọn̄ ido Ijipiti, mije ọmọ okanabe ogwu ònyenye lek enenen.

⁹Ujaya înama owuwa uwu-oket me Jeruselem me otunchit Mfufọ, mè otunchit Iteke, mè inama si ge me agba lek mfufọ òkup me lek mgban ama, mè irọ uwu-oket cha ikeke inye.

¹⁰Înama si owuwa uwu-oket me emen èwê, mè irọkọ si owuwa udọn̄ mudim, mije îkaan̄be anam iwa enenen me lek orioon̄ ebon ogoon̄ mè lek iteke ijọn̄. Îkaan̄ si ebi ikwaan̄ uko, mè ebi ikwaan̄ uko gerep me inyọn̄ ogoon̄ mè otutuuk ijọn̄ ere geelek òkisibi mfut, mije, ọmọ îma ikwaan̄ uko enenen.

¹¹Ujaya îkaan̄ ebi akọn̄ ìrọriọọn̄ ukot akọn̄ ijaan̄, ebi ìbebem lek isisibi isi akọn̄ mgbọ geelek me urum me urum, ike Jeyien ogwu uti ikpa mè Maseya ogwu ibot ikwaan̄ edọmọbe. Ife chi ene iba ekisi ikwaan̄ me irak kè Ananiya, ene ge me lek ebi ibot ikwaan̄ ogwu ubọọn̄.

¹²Otu ifuk ebi ibot owot iman ìkikpọ chieen̄ me lek ebi akọn̄ chi ìre obop ene iba mè efit gweregwen.

¹³Ebi ibot owot iman chi ekikpọ chieen̄ me lek efit obop ebi akọn̄ ita mè obop jaaba, mè efit go, ebi ìriọọn̄ ukot akọn̄, ebi ìkaan̄ ikpele unye ikọkọt itap ubọk igọọk ogwu ubọọn̄ itim akọn̄ me lek ebi ochicha kan̄.

¹⁴Ujaya înyi otutuuk ebi akọn̄ kan̄ ebi kè agbọ, mè otunwa, mè okpibot akọn̄, mè ofọnti akọn̄ echi okwukwut, mè ogbaan̄, mè ewuuk ekitap me emen olik mgbọlọ.

¹⁵Îrọ si inyi ebi usọ ikwaan̄ kan̄ erom okwukwut akọn̄ ge me Jeruselem, eyi ekitoon̄ me inyọn̄ uwu-oket melek inyọn̄ mfufọ mgban ama ya, ikisa isook oraan̄, mè ikisa itọọn̄ ikpele ewuuk me mgbọ akọn̄. Etip kè Ujaya otataan̄ ijọn̄ọ ere, mije, Awaji otapbe ubọk inyi ọmọ enenen, mè irọ inyi ọmọ ikana ogwu ònyenye lek enenen.

¹⁶Ire, mgbọ Ujaya okanabe ogwu ònyenye lek, ugumulek oneninin̄ ọmọ me emen, mè irọ inyi inan̄a irọn̄. Ìkayaka ìkirọ atikọ melek Okumugwem Awaji kan̄. Usen ge, ininin̄ emen Uwu Mbuban Okumugwem isi iwọp nsensi me inyọn̄ ntook nsensi.

¹⁷Ajariya ogwu ngwugwa melek akọp ene jeeta, ebi ngwugwa Okumugwem ebi kpekitet ukpook, eninin̄ igọọk ọmọ,

¹⁸mè itumu inyi ọmọ ibe, “Ìkare owu, Ujaya, obokiwọp nsensi inyi Okumugwem. Eya ìre ikwaan̄ ebi ngwugwa ebi owot iman kè Erọn, ebi egwọkbe lek ibe ekewọp nsensi. Sibi nan̄a me ere mbuban yi, mije, owu òkayaka ìgbe utoon̄-ejit! Okumugwem Awaji ìkpoyaka inyi owu umin.”

¹⁹Ujaya onanaan̄ ejit me ere ya, melek ngigọ nsensi me ubọk ibowọp nsensi. Mgbọ îkinaan̄ ejit inyi ebi ngwugwa cha, me isi otutuuk ebi ngwugwa cha, inyakpa obabaan̄ ichit inyọn̄ okwut isi kan̄ me isi ntook nsensi ya me emen Uwu Mbuban Okumugwem.

²⁰Ajariya ogwu ibot ebi ngwugwa mè otutuuk ebi ngwugwa kechilọ enenikpọ, mè imun̄ ibe ke inyakpa îgwook ichit ọmọ okwut isi, ema egwagwat lek itaba ọmọ isibi me ere ya mgbọ yaage. Ọmọ me lek kan̄ si ìweweek inanan̄a me ere ya isibi, mije, îmun̄ ibe ke Okumugwem îbene ikisulu ọmọ osusut.

²¹Ogwu ubọọn̄ Ujaya ofafiak orukan̄ inyakpa mege ire usen îkwube. Ìkiluk me ofifi uwu, melek inyakpa me lek. Mîbọkọ otutuuk ikwaan̄ isan̄a ọmọ me ubọk, mè igban si ọmọ ibe ikayaka ìnin̄ Uwu Mbuban Okumugwem. Jotam ogwu gwun̄ okekikpọ chieen̄ me lek uwu ubọọn̄ kan̄, mè ikikpulu otutuuk ido.

²²Otutuuk ofifi inu òrọrọ me ukot mkpulu kè Ujaya, bene me ibebene si re òta, egege otutuuk iso me emen ikpa mfufuk ogwu nriran Asaya gwun̄ kè Amọs.

²³Ujaya onenikwu ifo igọọk ebi nte nte kan̄, ebeben ifuun̄ me agba lek ijọn̄ ere ekifuun̄ ebi ubọọn̄, ìkare me emen ere ya me lek kan̄, mije, ekitumu ibe ke ìsa orukan̄ inyakpa me lek ikwu. Jotam ogwu gwun̄ onenikana ubọọn̄ me irek kan̄.