Read obolo II Mfuf 30 Bible Online

II Mfuf 30 - obolo bible

II Mfuf 30

¹Ejikaya oneniria etip ikana otutuuk Ijeren mè otutuuk Juda, mè ige si ikpa ijet ebi otoko kè Iferem, mè ebi otoko kè Manasi, igween̄ ema ibe enu me Uwu Mbuban Okumugwem me Jeruselem, enerie ijọk Iraraka enyi Okumugwem, Awaji ebi Ijeren.

²Ogwu ubọọn̄ mè ebi ibot ikwaan̄ kan̄ mè otutuuk ebi ido enenitumu ifieek me Jeruselem ibe ke eberie ijọk Iraraka ya me òso onyan̄ iba me acha.

³Ema kpekọt irọ orirọ ya me ibot mgbọ kan̄, mije, owuwa ebi ngwugwa kpegwọk-nu lek, melek si, ebi ene kpekọt ititiin̄-nu me Jeruselem.

⁴Otitọt ya onenitat me lek ogwu ubọọn̄, mè itat si me lek otutuuk ebi ido.

⁵Ema enenitumu ifieek ibe mè eria etip ekana otutuuk Ijeren, bene me Bieseba si re Dan, ibe ebi ene esibi enu me Jeruselem enerie ijọk Iraraka enyi Okumugwem, Awaji ebi Ijeren. Mije, ìkawa mgbọ ebi Ijeren ekirie ijọk ya igọọk ike egebe ibe ekerọ.

⁶Ogwu ubọọn̄ mè ebi ibot ikwaan̄ kan̄ enenige ikpa etip ichon ikana. Ogwu ubọọn̄ ìnyinyi ida, ebi ìkilook etip esasa ikpa cha ilibi ikana otutuuk Ijeren mè Juda isi ichon ikana. Etip egebe me emen ikpa cha ìre ikeyi: “Ebi Ijeren, ìgwu ìkom ìna me lek Okumugwem Awaji kè Ebereyam, mè Ajiki, mè Ijeren, inyi ọmọ si igwu ikom inu me lek kinyi ebi ìkwakwaan̄ isik, ebi ìnwọnwọnọ me ubọk ebi ubọọn̄ Asiria.

⁷Ikakup kubọk ebi nte nte kinyi mè ebi ngwan̄ kinyi ebi kpesiki ibot inyi Okumugwem Awaji ebi nte nte kiban̄, eyi Okumugwem obakbe me lek ijijaka ema isan̄a, kubọk enyi emun̄be.

⁸Ikanye ejit kubọk ebi nte nte kinyi erọbe, ìsiki ibot ìnyi Okumugwem mgbọ keyi. Ìsibi ìna me Uwu Mbuban kan̄ ere îsun̄be mbuban ire mgbọ geelek, mè ìnisi ikwaan̄ ìnyi Okumugwem Awaji kinyi, inyi iben uga unaan̄-ejit kan̄ isan̄a enyi me lek.

⁹Ire enyi igwu ikom inu me lek Okumugwem, ebi ife cha ìkpukpulu ebi kinyi mè bọn kinyi me usun̄ akọn̄ mêkaan̄ ejit nsan me lek ebi kinyi mè bọn kinyi, mè itele ibe ema eka enu ido kiban̄ yi. Mije, Okumugwem Awaji kinyi ìre ogwu ata ejit, mè ire si ogwu ejit njijin, ìkpoda isi kan̄ isan̄a me lek kinyi, ire enyi igwu ikom inu me lek kan̄.”

¹⁰Ebi ìkilook etip cha enenisa ikpa cha ikikana ikiche me ama me ama me agan̄ ebi otoko kè Iferem mè agan̄ ebi otoko kè Manasi, mè isi igwook me agan̄ ebi otoko kè Jebulọn. Ire, ebi ene ekekichak ema, mè ikinyi ema unyechieen̄.

¹¹Ire, usini ebi otoko kè Ase, mè usini ebi otoko kè Manasi, mè usini ebi otoko kè Jebulọn mîgele lek isiki, mè isibi inu Jeruselem.

¹²Awaji onenisulu ubọk me ejit ebi Juda, mè irọ inyi ema ekaan̄ ejit ge irọrọ inu ogwu ubọọn̄ mè ebi ibot ikwaan̄ kan̄ etọbe, igọọk me ida Okumugwem onyibe.

¹³Owuwa ene enunu inititiin̄ me Jeruselem ibenirie ijọk Fituru Kpunu Olat me òso onyan̄ iba me acha. Ebi ene mîwa enenen enenen.

¹⁴Ema enenigwak ntook esese awaji cha òkup me Jeruselem, mè igwak si ntook nsensi cha geelek, mè ikpulu isi ifiin̄ me iteke Kidọrọn.

¹⁵Enenikpan̄ arọọn̄ ijọk Iraraka me akọp mè usen ini me òso onyan̄ iba me acha. Esip otetet ebi ngwugwa mè ebi otoko kè Libai ebi kpegwọk lek. Ema enenigwọk lek, mè inigọọk ikigwa ngwugwa ewọwọp iriọk cha me Uwu Mbuban Okumugwem.

¹⁶Ema enenikeke me irek ikwaan̄ òkup inyi ema ike egebe me Ikan kè Mosis ogwu ikwaan̄ Awaji. Ebi otoko kè Libai isisa eje anam geelek egwube inu, ebi ngwugwa mîra ibọkọ inyan me lek ntook.

¹⁷Mije owuwa ebi ene kpegwọk lek, ema kpekọt igwu anam ijọk Iraraka eyi kiban̄. Mije keya, ebi otoko kè Libai ebọbọkọ arọọn̄ ijọk Iraraka ife cha igwu inyi ema, mè ifaka arọọn̄ ebi ife cha itap me ubọk Okumugwem.

¹⁸Owuwa ebi ene ebi ìrerie inorie ijọk Iraraka ya kpegwọk lek, kubọk egebe me Ikan. Owuwa me lek ife chi ìre ebi otoko kè Iferem, mè ebi otoko kè Manasi, mè ebi otoko kè Isaka, mè ebi otoko kè Jebulọn. Ire, Ejikaya orariaak uriaak me ibot kiban̄ ibe ikeyi: “Jei Okumugwem, owu ogwu òrere ata Awaji, soso tele nyi ene geelek,

¹⁹ogwu òsasa me otutuuk ejit kan̄ iweek owu Awaji, òrere Okumugwem Awaji ebi nte nte kan̄, ikerere ibe ke ene ya ìkagwọk lek, kubọk ikan òkikpulu Uwu Mbuban odobe.”

²⁰Okumugwem onọnọ uriaak kè Ejikaya, mè itele inyi ife cha, ìkasulu ema osusut.

²¹Otutuuk ebi Ijeren ebi ìnunu Jeruselem ererie ijọk Fituru Kpunu Olat ya usen jaaba me ikpele unwọọn̄. Me otutuuk usen cha geelek, ebi otoko kè Libai mè ebi ngwugwa ekekikọt okwa, mè ikikwak nkwukwak ubene ida, isa ikitọn̄ Okumugwem.

²²Ejikaya onenitumu ikọ isa itap otutuuk ebi otoko kè Libai efuuk me emen, mije, ema mîkaan̄ ata ngobo-ntet ofolek ikwaan̄ Okumugwem. Me otutuuk usen jaaba cha, ema erie gaalek inorie edọmọbe inyi ema, mè ikigwa ngwugwa esuuk, mè ikikọt okwa itọn̄ Okumugwem Awaji ebi nte nte kiban̄.

²³Otutuuk ebi ene enenitumu ifieek ibe ke mêrie ijọk ya usen jaaba isọkọ me lek. Ikeya si ke erie ijọk ya me unwọọn̄ ofifi usen jaaba igbaalek.

²⁴Ejikaya ogwu ubọọn̄ Juda ìnyi ebi ene cha obop eriembuuk, mè obop arọọn̄ mè ebot jaaba ibe esa erie ijọk ya. Ebi ibot ikwaan̄ kan̄ enyinyi obop eriembuuk, mè akọp obop arọọn̄ mè ebot ibe esa egbaalek erie ijọk ya. Owuwa ebi ngwugwa egwọgwọk lek kiban̄.

²⁵Otutuuk ebi ido Juda mè ebi ngwugwa mè ebi otoko kè Libai mè otutuuk ebi ìnan̄a me Ijeren inu ijọk ya, mè ebi ichen geelek ìnan̄a me Ijeren mè ebi ichen ìluk me Juda ebebele ejit, mè inwọọn̄ unwọọn̄.

²⁶Uga unwọọn̄ ojojot Jeruselem me ijọk ya, mije, karake ukot kè Solomọn gwun̄ kè Debit ogwu ubọọn̄, otutuuk Ijeren mege inire ukot keyi, mbet inu òkup ikeyi ìkamọnọ irek me Jeruselem.

²⁷Ebi ngwugwa mè ebi otoko kè Libai enanan̄a ikeke me ukot kiban̄, mè igbana ebi ene, Awaji onọnọ uriaak kiban̄, mije, uriaak kiban̄ îre emen inyọn̄, òrere ere nluk kan̄ òkup mbuban.