Read obolo II Mfuf 32 Bible Online

II Mfuf 32 - obolo bible

II Mfuf 32

¹Mgbọ Ejikaya orọbe otutuuk inu chi òkijeen̄ ibe ke ọmọ îgbe utoon̄-ejit isan̄a, Senakerip ogwu ubọọn̄ Asiria onenijibi akọn̄ inu me Juda, mè inikpa mbin akọn̄ ikana ama mgban akọn̄ cha, mè iweek ibọbọkọ ama cha inyi lek kan̄.

²Mgbọ Ejikaya omun̄be ibe ke Senakerip îjibi akọn̄ inu ibonitim akọn̄ me lek Jeruselem,

³inenigọọk ebi ibot ikwaan̄ kan̄ mè ebi ibot akọn̄ kan̄ igbaan̄ itọt ibe echit mun̄ òkinan̄a me emen ama ya ilibi isibi oyet. Ife cha echechieek, mè itap ubọk inyi.

⁴Enenititiin̄ owuwa ebi ene, mè isi ichit otutuuk ogbuuruk mun̄ cha, melek okolo òkilibi isibi igwook me otutuuk lek ijọn̄ ya. Ema kpeweek ibe ebi ubọọn̄ Asiria enu, mè enemun̄ owuwa mudim.

⁵Ogwu ubọọn̄ otetet lek inye ikpọk inama otutuuk ere ògbugbugbọ me lek mgban ama ya, mè inama si owuwa uwu-oket me inyọn̄ mgban ama ya. Înama si ofifi mgban me udun̄ mgban ama ya, mè itọm ijọn̄ agan̄ mbum-ura ama kè Debit ibene. Îrom si owuwa nroon̄ akọn̄ melek owuwa agbọ igbaalek.

⁶Îsan̄a si ebi ibot akọn̄ ito ibe ekekpọ chieen̄ me lek ebi ene, mè inigwen otutuuk ebi akọn̄ ititiin̄ me otunchit oyet ama, mè initumu ikọ itap ema efuuk me emen. Ìtumu inyi ema ibe ikeyi:

⁷“Ìtet lek ìnye, mè ìkat ejit. Ikatet ukpook, ikasisik ejit mije ogwu ubọọn̄ Asiria melek otutuuk ogbogbo ebi akọn̄ melek kan̄ cha. Mije, ebi ìkup melek kiji mîwa igak ebi ìkup melek kan̄.

⁸Unye ebilene gaalek okup melek kan̄. Ire, Okumugwem Awaji kiji me lek kan̄ okup melek kiji. Ọmọ obotap ubọk inyi eji, mè itim otutuuk akọn̄ kiji.” Ikọ cha Ejikaya ogwu ubọọn̄ Juda otumube otatap otutuuk ebi ene efuuk me emen.

⁹Sọnja mgbọ iraraka, mgbọ Senakerip ogwu ubọọn̄ Asiria melek ebi ibot mkpulu kan̄ ekikpa mbin akọn̄ ikana ama Lakis, Senakerip oneniria ebi ibot akọn̄ kan̄ isi Jeruselem ibe esi elook Ejikaya ogwu ubọọn̄ Juda melek otutuuk ebi Juda ìkup me Jeruselem ibe ikeyi:

¹⁰“Senakerip ogwu ubọọn̄ Asiria ìtumu ibe ikeyi: Ìre keke ke enyi etoon̄ ejit me lek, mè ibia me Jeruselem me emen mbin akọn̄ ekpabe ikana enyi?

¹¹Eyi Ejikaya okitumu inyi enyi ibe, ‘Okumugwem Awaji kiji mônyan̄a eji isibi me ubọk ogwu ubọọn̄ Asiria,’ ìre enyi kperiọọn̄ ibe ke ìkifafiaan̄ enyi, inyi enyi ekwaan̄ eta mije uraafiọọn̄ melek urak-ebek mudim?

¹²Ìre ìkafat ìre Ejikaya ogbugbọ otutuuk isi-ijọn̄ Okumugwem melek otutuuk ntook ngwugwa kan̄ cha, mè ikitumu inyi enyi ebi Juda mè ebi Jeruselem ibe, ‘Îre me isi ntook ge gaalek ke enyi ebekitọbọ ebum, mè ikiwọp si ngwugwa’?

¹³“Ìre enyi kperiọọn̄ inu emi mè ebi nte nte n̄a erọbe otutuuk ebi ofifi ido? Ìre awaji ebi ido cha mîkọt inyan̄a ebi kiban̄ isibi me ubọk n̄a ni?

¹⁴Ìre îkaan̄ awaji ebi ido ge me lek otutuuk awaji ebi ido cha echi ebi nte nte n̄a ejijakabe òkọkọt inyan̄a ebi kan̄ isibi me ubọk n̄a ni? Ire ikeya, ìre Awaji kinyi ìbojeje ikọt inyan̄a enyi isibi me ubọk n̄a?

¹⁵Mgbọ keyi, ikachieek ibe Ejikaya ifiaan̄ enyi, mè isa me ikeyi ileke enyi ifiin̄. Ikachieek inu geelek îkitumu inyi enyi. Mije, kpunu awaji ebi ido geege, mè ìre eyi mkpulu geege òkọkọt inyan̄a ebi kan̄ isibi me ubọk n̄a mè ìre ubọk ebi nte nte n̄a. Ikerere awaji kinyi ya, ìkpokọt inyan̄a enyi isibi me ubọk n̄a!”

¹⁶Ebi ibot akọn̄ Asiria cha me lek kiban̄ mîtumu si owuwa ikọ ikeme Okumugwem Awaji, mè itumu si ikeme Ejikaya ogwu ikwaan̄ kan̄.

¹⁷Ogwu ubọọn̄ Senakerip îge si ikpa isa inye chieen̄ inyi Okumugwem, Awaji ebi Ijeren, mè itumu ibe, “Ike otutuuk awaji ebi ofifi ido cha kpekọt inyan̄a ebi kiban̄ isibi me ubọk n̄a, ikeya si, awaji kè Ejikaya ya ìkpokọt inyan̄a ebi kan̄ isibi me ubọk n̄a.”

¹⁸Ebi ibot akọn̄ kè Senakerip cha mîtaan̄ ukpo itumu ikọ cha si me usem Iburu, inyi ebi Jeruselem cha ìkup me inyọn̄ mgban ama enọ, mè efieek owot, mè etet ukpook, inyi ema mêkọt ibọkọ ama ya.

¹⁹Ema ekitumu ikọ ibak Awaji ebi Jeruselem kubọk ke ekitumu ibak awaji ebi ido geelek cha, òrere inu ubọk ebilene orọbe.

²⁰Ogwu ubọọn̄ Ejikaya mè Asaya ogwu nriran, gwun̄ kè Amọs, enenitaan̄ ukpo igwen Awaji ogwu òkup me emen inyọn̄.

²¹Okumugwem oneniria ogwu osat ge isibi, ogwu osat ya okpakpan̄ otutuuk ebi usọ akọn̄, mè ebi isi akọn̄, mè ebi ibot akọn̄ isan̄a kpai me emen orieen̄ akọn̄ ebi Asiria. Senakerip ogwugwu ikom ifo ido kan̄ melek ikpele esip. Mgbọ înin̄be emen uwu awaji kan̄, usini bọn kan̄ gaalek esasa oge akọn̄ ikpan̄ ọmọ ifiin̄.

²²Okumugwem onenisa me ikeyi inyan̄a Ejikaya mè otutuuk ebi Jeruselem isibi me ubọk kè Senakerip ogwu ubọọn̄ Asiria, mè inyan̄a ema si isibi me ubọk otutuuk ebi ofifi ido, mè itap ubọk inyi ema me agan̄ geelek.

²³Owuwa ene enenikisa inyinyi ijet Okumugwem me Jeruselem, mè ikiche si owuwa inu unye otu ewe inyi Ejikaya ogwu ubọọn̄ Juda. Bene me mgbọ ya, Ejikaya onenimin enenen me chieen̄ ebi owuwa ido.

²⁴Me emen mgbọ ya, Ejikaya onenifiak orukan̄, mè igbet mkpa. Ineniriaak uriaak igwen Okumugwem. Okumugwem onọnọ, mè ininyi ọmọ inu ijejeen̄.

²⁵Ire, ugumulek oninin̄ me emen ejit kè Ejikaya, ìkayaka ìkọt ìjeen̄ ubelejit me lek otutuuk ata inu cha Okumugwem orọbe inyi ọmọ. Eya orọ, Okumugwem onanaan̄ ejit inyi ọmọ, mè inaan̄ si inyi ebi Juda melek ebi Jeruselem.

²⁶Ejikaya onenigwu ikom me emen ugumulek kan̄, mè inisiki lek, ebi Jeruselem si egọgọọk igwu ikom. Mije keya, unaan̄-ejit Okumugwem ìkanu me lek kiban̄ me ukot kè Ejikaya.

²⁷Ejikaya îbọọn̄ ubọọn̄ enenen, mè ikaan̄ si umin enenen. Înama si owuwa ere isun̄-inu isa ikitap ogbogbo alata okuket mè alata araran̄ mè ewuuk unye otu ewe, mè aran̄ utop olu, mè owuwa agbọ, mè owuwa inu unye otu ewe.

²⁸Înama si owuwa ere isun̄-inorie isa ikitap ogbogbo akpa, mè aya miin̄, mè aran̄, mè inama si owuwa uwu anam isa ikitap owuwa chieen̄ eriembuuk, mè ikaan̄ si ere îkisun̄ arọọn̄ mè ebot kan̄.

²⁹Înama owuwa ama, mè ikaan̄ arọọn̄ mè ebot mè eriembuuk iwa enenen, mije, Awaji îrọ inyi ọmọ ibọọn̄ ubọọn̄ enenen enenen.

³⁰Îre Ejikaya ochit okolo eyi mun̄ ogbuuruk Giyọn okisa ilibi ifo agan̄ inyọn̄, mè ininama ǹkororok ge isa itaba mun̄ ya ikwala isiki itap me agan̄ osiki ama kè Debit. Inu geelek îrọbe, ìkijeje ijaan̄.

³¹Mgbọ ebi ibot mkpulu Babilọn eriabe ikwaan̄ ibe enu eneweek eriọọn̄-nu inu ofolek inu ijejeen̄ ya eyi òmọmọnọ irek me ido Juda sọnja mgbọ òraraka, Awaji odada lek ibọkọ me lek kè Ejikaya, isa iroon̄ Ejikaya ikpọ, inyi ọmọ iriọọn̄ inu òkup Ejikaya me ejit.

³²Otutuuk ofifi inu òrọrọ me ukot mkpulu kè Ejikaya, mè igbegbe utoon̄-ejit kan̄, mîge itap me emen mfufuk nriran eyi ogwu nriran Asaya gwun̄ kè Amọs ogebe me emen ikpa mfufuk echi ebi ubọọn̄ Juda mè ebi ubọọn̄ Ijeren.

³³Ejikaya onenikwu ifo igọọk ebi nte nte kan̄, ebeben ifuun̄ me inyọn̄ orioon̄ ere ekifuun̄ bọn owot iman kè Debit. Me mkpa kan̄, otutuuk ebi Juda mè ebi Jeruselem enyinyi ọmọ umin ògbegbe. Manasi ogwu gwun̄ onenikana ubọọn̄ me irek kan̄.