Read obolo II Mfuf 35 Bible Online

II Mfuf 35 - obolo bible

II Mfuf 35

¹Josaya onenirie ijọk Iraraka inyi Okumugwem me Jeruselem, mè ikpan̄ arọọn̄ ijọk Iraraka me òso akọp mè usen ini me adasi onyan̄ me acha ya.

²Inenigobo ebi ngwugwa ito me irek ikwaan̄ kiban̄, mè itap ema efuuk me owot me lek ikwaan̄ Uwu Mbuban Okumugwem.

³Inenitumu inyi ebi otoko kè Libai, ebi ìkijeen̄ otutuuk ebi Ijeren Ikan Awaji, ebi ìfafaka lek kiban̄ itap me ubọk Okumugwem, ibe, “Ìben okop inyan̄a-ibot ìsi ìyik me emen Uwu Mbuban eyi Solomọn gwun̄ kè Debit onamabe. Ikayaka ìkiben me oguga kinyi ìkana ere. Ìkisi ikwaan̄ ìnyi Okumugwem Awaji kinyi, mè ìkisi ikwaan̄ si ìnyi ebi Ijeren ebi kan̄.

⁴Ìnen̄e lek ìsun̄ me owot iman me owot iman, mè ọgbọn̄ ikwaan̄ kinyi ge ge, kubọk Debit ogwu ubọọn̄ Ijeren ogebe, mè ike Solomọn ogwu gwun̄ ogebe si.

⁵“Ìdọmọ lek kinyi ìkeke me ere mbuban, inyi ebi owot iman geelek me ido kinyi ekekaan̄ ọgbọn̄ ebi otoko kè Libai ebi ema ebesa inu ngwugwa kiban̄ isi lek.

⁶Ìgwọk lek kinyi, mè ìbọkọ arọọn̄ ijọk Iraraka cha ìgwu, mè ìbak ìnyi ebi ngwan̄ kinyi, mè ìsa me ikeya ìrọ otutuuk inu kubọk Okumugwem onyibe ida inan̄a me otu kè Mosis.”

⁷Josaya oneninyi otutuuk ebi ìkup me ere ya akọp obop arọọn̄ mè ebot ita eyi ijọk Iraraka, mè inyi si obop eriembuuk ita. Otutuuk anam cha ìnan̄a me lek anam ogwu ubọọn̄.

⁸Ebi ibot ikwaan̄ kan̄ si esasa me ata ejit iche anam inyi ebi ene, melek ebi ngwugwa, mè ebi otoko kè Libai. Ilikiya, mè Jekaraya mè Jeyen, ebi ìkikpọ chieen̄ me lek Uwu Mbuban Awaji, enyi ebi ngwugwa akọp obop anam ijọk Iraraka iba mè obop gweregwen, melek efit eriembuuk ita.

⁹Konaniya mè Semaya melek Netanen, ebi ngwan̄, mè Asabiya, mè Jeyien, mè Josabadi, ebi ibot me otoko kè Libai echeche obop arọọn̄ mè ebot go melek efit eriembuuk go inyi ebi otoko kè Libai me lek ijọk Iraraka ya.

¹⁰Enenidọmọ otutuuk ikwaan̄ ijọk Iraraka isan̄a. Ebi ngwugwa ekekeke me irek kiban̄, ebi otoko kè Libai si emọmọnọ irek ikwaan̄ kiban̄ kubọk ogwu ubọọn̄ odọmọbe.

¹¹Enenikigwu anam ijọk Iraraka cha. Ebi ngwugwa ekekibọkọ eje anam cha inyan igwook me lek ntook ngwugwa. Ebi otoko kè Libai ekekinyiaan̄ ikpa isan̄a me lek anam cha.

¹²Enenikisan̄a anam ngwugwa ewọwọp iriọk cha isun̄ esese, inyi esa enyi ọgbọn̄ ebi owot iman cha, mè esa egwa ngwugwa enyi Okumugwem, kubọk egebe me emen Ikpa Ikan kè Mosis. Ubọk yaage si ke erọ me lek otutuuk eriembuuk cha.

¹³Ebi otoko kè Libai eneniwọp otutuuk anam ijọk Iraraka cha me lek ukan̄, kubọk ikan odobe, mè item okpọkọ echi òkup mbuban me emen bọn otin̄, mè otin̄ ile, mè otin̄ akpakpa, mè iche ugwat ugwat ikana iso otutuuk ebi ene.

¹⁴Mgbọ erọbe isan̄a, ebi otoko kè Libai enenirọ inorie inyi lek kiban̄, mè irọ si inyi ebi ngwugwa, mije, ebi ngwugwa, òrere ebi owot iman kè Erọn, ekup me lek igwagwa ngwugwa ewọwọp, mè iwọwọp okpọn̄ anam cha mege ire eririeen̄. Mije keya ke ebi otoko kè Libai erọrọ inorie inyi lek kiban̄, mè irọ si inyi ebi ngwugwa, ebi owot iman kè Erọn.

¹⁵Ebi nkwukwak, ebi owot iman kè Asafu, ekukup me irek kiban̄, ere Debit mè Asafu mè Eyiman mè Jedutun ogwu òkiben nriran inyi ogwu ubọọn̄ edọmọbe isun̄ inyi ema. Ikeya si, ebi ìkibem otunchit Uwu Mbuban geelek ebabia me irek ikwaan̄ kiban̄, kpenan̄a itele, mije ebi ngwan̄ kiban̄, ebi otoko kè Libai ekirọ si inorie inyi ema.

¹⁶Me usen ya, mîfaka otutuuk mfaka Okumugwem isan̄a, mè igwa ngwugwa ijọk Iraraka ya, mè igwa ngwugwa ewọwọp iriọk me inyọn̄ ntook Okumugwem, ike Josaya ogwu ubọọn̄ onyibe ida.

¹⁷Otutuuk ebi Ijeren ebi ìkup me ere ya ererie ijọk Iraraka me mgbọ ya, mè irie si ijọk Fituru Kpunu Olat usen jaaba.

¹⁸Kperarak irie ojelek ijọk Iraraka òkup ikeyi me Ijeren, karake ukot kè Samien ogwu nriran. Me etete otutuuk ebi ubọọn̄ Ijeren, kpunu geege òrarak ito ojelek ijọk Iraraka òkup ikeyi, kubọk Josaya otobe, melek ebi ngwugwa, mè ebi otoko kè Libai, mè otutuuk ebi Juda, mè otutuuk ebi Ijeren ìsisibi inu, mè otutuuk ebi Jeruselem.

¹⁹Erie ijọk Iraraka yi me emen òso akọp mè acha jeeta me lek mkpulu kè Josaya.

²⁰Mgbọ Josaya orọbe otutuuk ikwaan̄ me lek Uwu Mbuban isan̄a, Neko ogwu ubọọn̄ Ijipiti onenijibi akọn̄ isi itim me ama Karekemis me agba okwaan̄ Yuferetis. Josaya osasa ebi akọn̄ kan̄ ije isibi isi ikweek ọmọ.

²¹Ire, ogwu ubọọn̄ Neko oraria etip ijet Josaya ibe, “Ogwu ubọọn̄ Juda, emi melek kwun̄ kpebaak ibaak geege. Ìkare lek kwun̄ ke nnu akọn̄ me chereyi. Îre lek ama ubọọn̄ òkitim akọn̄ me lek n̄a ke nnu akọn̄ me lek. Awaji si ìbe emi ǹgwagwat lek. Eya orọ, kayaka ìje ìkeme Awaji ogwu òkup melek n̄a, inyi Awaji ikajijaka owu.”

²²Ire, Josaya ìkachieek itetele Neko. Ìkachieek igbagban̄ ikọ Awaji otumube inan̄a me otu kè Neko. Kpan̄asi ikeya, isisi inwene lek, inyi ekariọọn̄ ọmọ, mè isi itim Neko akọn̄ me lek me iteke Megido.

²³Ogwu òsook oraan̄ ge ososook oraan̄ itet ogwu ubọọn̄ Josaya. Josaya otutumu inyi ebi ikwaan̄ kan̄ ibe, “Ìsan̄a emi ìsibi, ke ikpele unan îsak emi me lek.”

²⁴Ebi ikwaan̄ kan̄ ebeben ọmọ isan̄a me uji akọn̄ keya itap me ofifi uji akọn̄ kan̄, mè isa ọmọ ikọp ika inu Jeruselem. Ikwukwu. Ebeben ifuun̄ me ere efuun̄be ebi nte nte kan̄. Otutuuk ebi Juda mè ebi Jeruselem efefieek ejit, mè inin̄ uwu ito inyi.

²⁵Jerimaya ogwu nriran onenige okwa ito ge inyi Josaya. Ebi ìkikọt okwa ito, ebirieen̄ mè ebibaan̄, ekikọkọt si okwa ibak Josaya mege inire cherekeyi. Inenikana orọmijọn̄ me Ijeren, egege itap me ikpa Okwa Ito.

²⁶Otutuuk ofifi inu òrọrọ me ukot mkpulu kè Josaya, mè otutuuk inu îrọbe igọọk ike egebe me Ikpa Ikan Okumugwem, echi òkijeen̄ ibe ke ọmọ îgbe utoon̄-ejit,

²⁷mè otuuk inu geelek îrọbe, bene me ibebene si re òta, mîge otutuuk itap me emen ikpa mfufuk ebi ubọọn̄ Ijeren mè ebi ubọọn̄ Juda.