Read obolo II Mfuf 5 Bible Online

II Mfuf 5 - obolo bible

II Mfuf 5

¹Mgbọ Solomọn orọbe otutuuk ikwaan̄ geelek isan̄a me lek Uwu Mbuban Okumugwem, inenikpulu otutuuk inu cha echi Debit ogwu ute ofakabe itap me ubọk Okumugwem, òrere alata okuket, mè alata araran̄, mè otutuuk nroon̄ ikwaan̄ geelek, isa initaak me emen ere isun̄-inu cha me Uwu Mbuban Awaji.

²Ogwu ubọọn̄ Solomọn onenigwen otutuuk ebi ugane Ijeren, mè otutuuk ebi ibot otoko, mè ebi ibot owot iman geelek me Ijeren, ititiin̄ me Jeruselem ibe enesi eben okop inyan̄a-ibot Okumugwem me ama kè Debit, òrere Sayọn, esa enetap me Uwu Mbuban.

³Otutuuk ebirieen̄ Ijeren enenititiin̄ me isi ogwu ubọọn̄ Solomọn me ibot mgbọ ijọk Uwu Nlak, me òso onyan̄ jaaba me acha ya.

⁴Mgbọ otutuuk ebi ugane Ijeren enube iso, ebi otoko kè Libai eneniben okop inyan̄a-ibot ya.

⁵Ebi ngwugwa, ìrere ebi otoko kè Libai, eben okop inyan̄a-ibot Okumugwem, melek Atanga Chinichini, melek otutuuk nroon̄ ikwaan̄ òkup mbuban ekisa irọ ikwaan̄ me emen Atanga Chinichini ya isa ikije.

⁶Ogwu ubọọn̄ Solomọn mè otutuuk ebi Ijeren ìtititiin̄ melek kan̄ ekekije me isi okop inyan̄a-ibot ya, mè ikigwu owuwa arọọn̄ mè eriembuuk echi kpekọt iriọọn̄ otu ifuk, kpebekọkọt si ifuk otu ifuk, isa ikigwa ngwugwa.

⁷Ebi ngwugwa cha eneniben okop inyan̄a-ibot Okumugwem ya isa iniyik me irek kan̄ me Uwu Mbuban, me irak uwop ebi mbem emen inyọn̄ cha, me emen ere mbuban eyi emen emen ya, òrere Ere Òkup Mbuban Ichit.

⁸Uwop ebi mbem emen inyọn̄ iba cha ìyayat iwele ichit ere okop inyan̄a-ibot ya okupbe, mè ikana ichit okop ya melek ogbugboon̄ ekisa iben.

⁹Ogbugboon̄ chi îjọn̄ọ enenen ire lek ekikup me Ere Mbuban imun̄ ibot kiban̄ me isi ere mbuban eyi emen emen ya. Ire, kpekikup me ofifi ere imun̄ ibot ogbugboon̄ cha, ilọ me Ere Mbuban. Ogbugboon̄ cha òwa me ere ya mege inire chereyi.

¹⁰Kpunu inu geege òkup me emen okop inyan̄a-ibot ya, ilọ me lek okpọkọ ewuuk iba echi Mosis osun̄be me emen me lek ogoon̄ Orebu, ere Okumugwem onyan̄abe ibot melek ebi Ijeren mgbọ ema enan̄abe me Ijipiti isibi.

¹¹Otutuuk ebi ngwugwa cha eneninan̄a me Ere Mbuban ya isibi. Otutuuk ebi ngwugwa ìgọgọọk inin̄ ere ya edadasi igwọk lek kiban̄, ikerere ebi kpekup me ikwaan̄ mgbọ ya.

¹²Otutuuk ebi otoko kè Libai ìrere ebi okwa mè ebi nkwukwak, Asafu, mè Eyiman, mè Jedutun, mè ebi bọn melek ebi uwu kiban̄, esa atalek ekwut lilin̄ ibala lek, mè ikeke me agan̄ mbum-ura ntook ngwugwa ikikwak mkpamkpa, mè uneen̄ ile, mè uneen̄ ija. Efit mè akọp ebi ngwugwa iba ekekiwut otita itap me lek nkwukwak ya.

¹³Ebi ìwut otita mè ebi ìkọt okwa egbagbaan̄ ikikọt okwa ya, ida kiban̄ okekitaan̄ kubọk ìyaka ire ida ene ge gaalek, mgbọ ema ekikọt okwa ikitọn̄ Okumugwem, mè ikibe ọmọ onirọ. Ekekiwut otita, mè ikikwak mkpamkpa, melek ofifi chieen̄ nkwukwak kechilọ igọọk, mè ikibene ida ikọt okwa itọn̄ Okumugwem ikibe: “Okumugwem înwọn; imumechieen̄ kan̄ ìkikukup ire mgbọ geelek.” Oduku oduduku ichit otutuuk emen Uwu Mbuban Okumugwem.

¹⁴Ebi ngwugwa kpeyaka ikọt ikeke irọ ikwaan̄ kiban̄ mije oduku ya, bak me lek, ujamgbugbo Okumugwem îjot emen Uwu Mbuban Awaji ya.