Read obolo II Mfuf 6 Bible Online

II Mfuf 6 - obolo bible

II Mfuf 6

¹Solomọn onenibe, “Okumugwem, owu otumu ibe ke owu òboluk me emen uga udun.

²Mgbọ keyi, nra inama ikpele Uwu Mbuban òjajaan̄ inyi owu, ere owu oboluk isi ire mgbọ geelek.”

³Ike otutuuk ebi Ijeren ekekebe me ere ya, ogwu ubọọn̄ onenikana isi ikpọ ema, mè igbana ema.

⁴Inenitumu ibe, “Itọn̄ ikup inyi Okumugwem, Awaji ebi Ijeren, ogwu òsasa ubọk kan̄ gaalek irọ inu îsabe otu kan̄ ichieek use inyi nte n̄a Debit iso. Mije îre ọmọ otumu ibe,

⁵‘Karake nsan̄abe ebi n̄a isibi me Ijipiti, ǹkagobo ama geege me otutuuk otoko ebi Ijeren ere ebenama Uwu Mbuban inyi Erieen̄ n̄a, ǹkagogobo si ene geege ibe inire ogwu òbokikpulu ebi n̄a Ijeren.

⁶Ire, mgbọ keyi, nra igobo Jeruselem ibe inire ere Erieen̄ n̄a obokup, mè igobo si Debit ibe inikpulu ebi n̄a, ebi Ijeren.’

⁷“Nte n̄a Debit îben me ejit inanama Uwu Mbuban ere ebekimin Erieen̄ Okumugwem, Awaji ebi Ijeren.

⁸Ire, Okumugwem otutumu inyi nte n̄a Debit ibe, ‘Eyi owu obenbe me ejit inanama Uwu Mbuban ere ebekimin Erieen̄ n̄a, owu orọ ijaan̄, mije, òbeben inu ya me ejit kwun̄.

⁹Ubọk geelek si, ìkare owu obonama Uwu Mbuban ya. Gwun̄ kwun̄, ogwu ònan̄a me akpalek kwun̄ isibi, îre ọmọ oboninama Uwu Mbuban ere ebekimin Erieen̄ n̄a.’

¹⁰“Okumugwem îrọ otu use kan̄ iso. Emi nnibọkọ irek ubọọn̄ kè Debit nte n̄a, mè isiki ikweek me inyọn̄ ogboon̄ ubọọn̄ Ijeren, ike Okumugwem otumube. Nra inama Uwu Mbuban ere ebekimin Erieen̄ Okumugwem, Awaji ebi Ijeren.

¹¹Nra isun̄ okop ya, eyi inyan̄a-ibot Okumugwem okupbe me emen, eyi òrere inyan̄a-ibot înyan̄abe melek ebi Ijeren.”

¹²Solomọn onenikeke me isi ntook ngwugwa Okumugwem, mè isi otutuuk ebi Ijeren ìtititiin̄ me ere ya, mè ibene ubọk iba kan̄ ifo inyọn̄.

¹³Sabum mgbọ ya, Solomọn îsa ekwe inama obubot ge, eyi ujọn̄ọ kan̄ orebe ejit ge mè agbagba otubọk iba, uwele kan̄ orere si ejit ge mè agbagba otubọk iba, sà ubene kan̄ ore agbagba otubọk gweregwen, mè iben iyik me eden̄ oyet egep ilile. Solomọn oneninene inyọn̄ obubot ya, mè itọbọ ekpe me isi otutuuk ido Ijeren, mè ibene ubọk iba kan̄ iwele ifo inyọn̄,

¹⁴mè initumu ibe: “Jei Okumugwem, Awaji ebi Ijeren, me emen inyọn̄ mè ìre me linyọn̄, kpunu awaji òbet lek kwun̄, owu ogwu òkirọ inyan̄a-ibot kwun̄ iso, mè ikikaan̄ imumechieen̄ mgbọ geelek me lek ebi ikwaan̄ kwun̄ ebi ìkije me oniin̄ kwun̄ me otutuuk ejit kiban̄.

¹⁵Owu orọ otu use kwun̄ ochieekbe ogwu usun̄ kwun̄ Debit nte n̄a iso. Owu òsasa otu kwun̄ gaalek ichieek use ya, mè inisa ubọk kwun̄ gaalek irọ si iso, ike îkupbe me cherekeyi.

¹⁶“Mgbọ yi, Okumugwem, Awaji ebi Ijeren, rọ use eyi ochieekbe ogwu usun̄ kwun̄ Debit nte n̄a so, kubọk otumube inyi ọmọ ibe, ‘Owu òkponan ene ogwu òbosiki ikweek me inyọn̄ ogboon̄ ubọọn̄ ikikpulu Ijeren me isi n̄a, ire gaalek bọn kwun̄ ebirieen̄ mêgbala chieen̄ ikiluk ata ugwem me isi n̄a, ikpọ me lek ikan n̄a, kubọk owu orọbe.’

¹⁷Eya orọ, jei Okumugwem, Awaji ebi Ijeren, soso rọ ibe otu ikọ kwun̄, eyi otumube inyi ogwu usun̄ kwun̄ Debit nte n̄a irọ iso.

¹⁸“Ìre Awaji môniluk me linyọn̄ melek ebilene ni? Ikerere emen inyọn̄ ere òbebene ichit, ìkpokọt ita owu. Ire ikeya, ìre Uwu Mbuban keyi nnamabe ìbojeje ita owu?

¹⁹Ubọk geelek si, nye lek gban̄ utọn̄ me lek uriaak mè mbeek emi ogwu usun̄ kwun̄ nkibeek, jei Okumugwem Awaji n̄a. Nye lek nọ ito ogwu usun̄ kwun̄ mè nọ si uriaak kan̄ îkupbe me isi kwun̄ ikiriaak.

²⁰Tele mè chieen̄ kwun̄ ikup, eririeen̄ mè ikarek, me lek Uwu Mbuban yi eyi owu otumube ibe ke Erieen̄ kwun̄ môkup me ere ya. Nye lek kinọ uriaak geelek emi ogwu usun̄ kwun̄ mâkiriaak iyaka isi ikikpọ ere keyi.

²¹Nọ uriaak geelek emi ogwu usun̄ kwun̄, mè ìre ebi kwun̄ ebi Ijeren, ebekiriaak iyaka isi ikikpọ ere keyi. Nye lek kup me emen inyọn̄ ere okiluk nọ, mè tele nyi eji.

²²“Ikaan̄ ogwu irọ ogwu ngwan̄ ilọ, etetet ibe inyan̄a ibot, ire ene ya inu ininyan̄a ibot me isi ntook ngwugwa kwun̄, me Uwu Mbuban yi,

²³kup me emen inyọn̄ nọ, mè sibi oyerebet nyi ebi usun̄ kwun̄. Ogwu oyerebet otipbe, tip oyerebet, mè kana mkpukpe ijo ubọk ikwaan̄ kan̄ chit ọmọ me ibot. Ogwu ubọk otanabe, nwọn oyerebet, mè rọ inyi inu ije ijaan̄ me lek, mije ata irọrọ kan̄.

²⁴“Ire ebi ochicha itim ikpan̄ ebi kwun̄ ebi Ijeren mije ema erọbe owu ilọ, ema enenigwu ikom inu me lek kwun̄, mè igwen erieen̄ kwun̄, mè iriaak uriaak, mè ibeek mbeek me emen Uwu Mbuban yi,

²⁵nye lek kup me emen inyọn̄ nọ ema ida, mè tele nrọ-nlọ ebi kwun̄ Ijeren nyi ema, mè yaka sa ema ka na me inyọn̄ ijọn̄ ya eyi owu onyibe ema mè ebi nte nte kiban̄.

²⁶“Ire akpa isinyọn̄ igon ichit, ibot ìkayaka ìrep, mije ebi kwun̄ erọbe owu ilọ, ema isibene isi ikpọ ere keyi, mè igwen erieen̄ kwun̄, mè igwu ikom me emen nrọ-nlọ kiban̄, mije osusut owu osulube ema,

²⁷soso kup me emen inyọn̄ nọ ema ida, mè tele nrọ-nlọ ebi usun̄ kwun̄ ebi Ijeren nyi ema. Jeen̄ ema ata oniin̄ ema ebeluk ugwem, mè yaka ria ibot gwook me lek ijọn̄ kwun̄ eyi owu onyibe ebi kwun̄ me ìrot.

²⁸“Mgbọ geelek akan̄ isinin̄ me lek ijọn̄ yi, mè ìre ùrioon̄, mè ìre esese chieen̄ orukan̄ mfut uko, mè ìre akaka ituuk, mè ìre akaka ikike ojijaka inu me uko, mè ìyaka ire ebi ochicha ejibi akọn̄ inikpa mbin ikana ama kiban̄ geelek, mè ìyaka ire chieen̄ ùrioon̄ geelek, mè ìre orukan̄ onu me lek kiban̄,

²⁹ire ene geelek me etete ebi kwun̄ Ijeren, ogwu òrọriọọn̄ inu òkisisaak ọmọ me ejit, iriaak uriaak, mè ibeek mbeek, mè ibene ubọk iba kan̄ ifo inyọn̄ inyi agan̄ Uwu Mbuban keyi,

³⁰nye lek kup me emen inyọn̄ ere owu okiluk nọ, mè tele nyi ema, mè rọ inu me lek ene geelek kpọ me lek irọrọ kan̄, mije, owu oriọọn̄ ejit kan̄. Owu gaalek oriọọn̄ ejit otutuuk ebilene.

³¹Rọ inu yi, inyi ema esa me ikeyi eketet owu ukpook me lek me otutuuk ugwem kiban̄ me inyọn̄ ijọn̄ yi eyi owu onyibe ebi nte nte kiji.

³²“Ire ogwu ichen, ogwu ikarege ene ge me lek ebi kwun̄ ebi Ijeren, inan̄a me ujọn̄ọ ere inu mije ikpele erieen̄ kwun̄, mè ikpele unye kwun̄ melek ikpele unye ubọk kwun̄; ire ogwu ichen òkup ikeya inu iniriaak uriaak ikikpọ Uwu Mbuban yi,

³³soso kup me emen inyọn̄ ere owu okiluk nọ uriaak kan̄, mè rọ inu geelek îbeekbe owu, inyi otutuuk ebi linyọn̄ esa me ikeya eriọọn̄ erieen̄ kwun̄, mè eketet ukpook kwun̄, kubọk ebi kwun̄ Ijeren ekitet ukpook kwun̄. Ene ya mônenisa me ikeya iriọọn̄ si ibe ke uwu yi nnamabe ìkichieek Erieen̄ kwun̄.

³⁴“Ire ebi kwun̄ isibi isi itim akọn̄ me lek ebi ochicha kiban̄ ubọk owu oriabe ema, mè ikiriaak uriaak igwen owu, Okumugwem, ibene isi ikikpọ ama yi eyi owu ogobobe, melek Uwu Mbuban yi nnamabe inyi Erieen̄ kwun̄,

³⁵nye lek kup me emen inyọn̄ nọ uriaak kiban̄ mè mbeek kiban̄, mè rọ inu ema eweekbe nyi ema.

³⁶“Ire ema irọ owu ilọ, (mije, kpunu ogwu ìkakirọ ìlọ), owu onanaan̄ ejit me lek kiban̄, mè ikana ema itap me ubọk ebi ochicha, ebi ochicha enenikpulu ema me usun̄ akọn̄ isa ifo ido kiban̄, mè ìre ere ujọn̄ọ ere, mè ìre mgbet mgbet ere,

³⁷ema enenikup me ido ya ekpulube ema isi igwook inwene ejit, mè inigwu ikom, mè ikup me ido ya ibeek owu mbeek ibe, ‘Eji mîrọ owu ijo inu, eji mîje owu ilọ, mè irọ owu inu ikpak;’

³⁸mè inikup me ido ebi ochicha kiban̄, ebi ìkpukpulu ema me akọn̄ ifo, mè inigwu ikom inu me lek kwun̄ me otutuuk ejit kiban̄ mè efuuk kiban̄, mè iniriaak uriaak ikikpọ agan̄ ido kiban̄ eyi owu onyibe ebi nte nte kiban̄, melek ama ya eyi owu ogobobe inyi lek kwun̄, mè Uwu Mbuban yi eyi nnamabe inyi Erieen̄ kwun̄;

³⁹soso kup me emen inyọn̄ ere owu okiluk nọ uriaak kiban̄ mè mbeek kiban̄, mè rọ inu ema eweekbe nyi ema. Tele ijo inu ebi kwun̄ erọbe owu nyi ema.

⁴⁰“Jei Awaji n̄a, mgbọ keyi, soso chili chieen̄ kwun̄, mè chili si utọn̄ kwun̄ kigban̄ uriaak geelek ebi kwun̄ ekinu iniriaak me ere keyi.

⁴¹“Okumugwem Awaji, mgbọ keyi, nan̄a na nin̄ ere isiki-efuuk kwun̄, owu melek okop inyan̄a-ibot eyi òkijeen̄ unye kwun̄. Okumugwem Awaji, tele ibe ebi ngwugwa kwun̄ ekaan̄ unyan̄a kwun̄, tele si inyi ebi mbuban kwun̄ enwọọn̄ unwọọn̄ mije nnwọn eyi owu onwọnbe melek kiban̄.

⁴²Okumugwem Awaji, soso kawuuk ogwu ubọọn̄ ogwu owu ogobobe ito inyi lek kwun̄. Keek ata inu cha echi Debit ogwu usun̄ kwun̄ orọbe.[5]”