Read obolo II Mfuf 7 Bible Online

II Mfuf 7 - obolo bible

II Mfuf 7

¹Mgbọ yaage Solomọn oriaakbe uriaak ya isan̄a, ukan̄ onanan̄a me emen inyọn̄ inu, mè initaka ngwugwa ewọwọp iriọk cha, melek otutuuk esese chieen̄ ngwugwa kechilọ cha. Ujamgbugbo Okumugwem ojojot emen Uwu Mbuban ya.

²Ebi ngwugwa kpekọt inin̄ emen Uwu Mbuban Okumugwem, mije ujamgbugbo Okumugwem ojotbe emen Uwu Mbuban ya.

³Mgbọ otutuuk ebi Ijeren emun̄be ukan̄ onan̄abe me inyọn̄ inu, mè imun̄ si ike ujamgbugbo Okumugwem okekebe me inyọn̄ Uwu Mbuban ya, ema egegele igwook me ijọn̄, mè ikana isi ichit, mè itọbọ ebum inyi Okumugwem, mè ikikọt okwa itọn̄ ọmọ ibe ikeyi, “Okumugwem înwọn; imumechieen̄ kan̄ ìkikukup ire mgbọ geelek.”

⁴Ogwu ubọọn̄ melek otutuuk ebi Ijeren enenikigwa owuwa ngwugwa me isi Okumugwem.

⁵Ogwu ubọọn̄ Solomọn ìgwu akọp obop eriembuuk iba mè iba, mè igwu si arọọn̄ mè ebot, efit mè akọp obop iba, isa igwa ngwugwa inyi Okumugwem. Ikeyi ke ogwu ubọọn̄ melek otutuuk ebi Ijeren esa igbana Uwu Mbuban Awaji ya.

⁶Ebi ngwugwa enenimọnọ irek ikwaan̄ kiban̄, ebi otoko kè Libai si eteteen̄ nkwukwak ekisa itọn̄ Okumugwem, echi Debit ogwu ubọọn̄ osun̄be inyi isasa itọn̄ Okumugwem, ikaan̄ me ubọk ikikwak, mè ikikọt okwa ibe, “Mije, imumechieen̄ kan̄ ìkikukup ire mgbọ geelek.” Ebi ngwugwa ekekeke me usaba agan̄ iyaka isi ida ebi otoko kè Libai, mè ikiwut otita kiban̄, otutuuk ebi Ijeren ekekeke me ukot.

⁷Solomọn onenigbama lek agan̄ eden̄ eden̄ me emen oyet egep òkup me agan̄ isi Uwu Mbuban Okumugwem, mè inikup me ere ya igwa ngwugwa echi ewọwọp, mè echi okpọn̄ ngwugwa esuuk, mije, ntook ngwugwa ekwe eyi ọmọ onamabe ya îsip enenen, ìkakọt ìben otutuuk ngwugwa ewọwọp, mè echi akpa, mè echi okpọn̄ ngwugwa esuuk cha.

⁸Solomọn melek otutuuk ebi Ijeren enenirie ijọk Uwu Nlak me mgbọ ya, egwe jaaba. Ema mîwa enenen. Ema enan̄a me otutuuk ere, ibene me Lebo Amat me agan̄ inyọn̄ isi igwook me lek oka okolo Ijipiti me agan̄ osiki.

⁹Ema erie ijọk eyi igbagbana ntook ngwugwa usen jaaba, mè inirie ijọk Uwu Nlak ofifi usen jaaba. Me òso usen jeeta, ema eneninin̄ ntitiin̄ òkup mbuban.

¹⁰Me òso akọp usen iba mè ita me òso onyan̄ jaaba me acha ya, Solomọn oneniria otutuuk ebi ene ifon uwu kiban̄ melek uga ubelejit mè uga unwọọn̄ mije otutuuk ata inu Okumugwem orọbe inyi Debit mè Solomọn mè ebi kan̄ ebi Ijeren.

¹¹Mgbọ Solomọn onamabe Uwu Mbuban Okumugwem mè uwu ogwu ubọọn̄ isan̄a, mè irọ otutuuk inu îbenbe me ejit irọrọ me lek Uwu Mbuban Okumugwem mè lek uwu ubọọn̄ kan̄ iso,

¹²Okumugwem onenikana isibi me isi kan̄ me emen ilaak eririeen̄, mè initumu inyi ọmọ ibe: “Nra inọ uriaak kwun̄, nra igobo si ere keyi inyi lek n̄a kubọk Uwu Mbuban ere ebekigwa ngwugwa.

¹³“Ire ngon akpa isinyọn̄ ichit ibe ibot ikayaka ìrep, mè ire nria ebi kè akaka ituuk ibe inijijaka lek ijọn̄ yi, mè ire nria ijo orukan̄ itap me etete ebi n̄a,

¹⁴ire ebi n̄a, ebi ìkichieek erieen̄ n̄a, isiki lek kiban̄, mè iriaak uriaak iweek emi, mè igwu ikom itele ugwem afa kiban̄, emi mâkup me emen inyọn̄ inọ ema ida, mè itele ijo inu kiban̄ inyi ema, mè igwa ijọn̄ kiban̄.

¹⁵Mgbọ keyi, chieen̄ n̄a ìbogwọgwọk, utọn̄ n̄a si ìbochichili ikinọ uriaak geelek ekiriaak me ere yi.

¹⁶Mgbọ keyi, nra igobo Uwu Mbuban yi inyi lek n̄a, mè isun̄ me mbuban, inyi ire ere ebekimin Erieen̄ n̄a isi ire mgbọ geelek. Chieen̄ n̄a mè ejit n̄a ìbokukup me lek uwu yi mgbọ geelek.

¹⁷“Eyi kwun̄, ire oluk ugwem òtatat me isi n̄a kubọk Debit nte kwun̄ olukbe, mè ikirọ otutuuk ida n̄a, mè ikirọ orọmijọn̄ n̄a, mè ikisun̄ otutuuk ikan n̄a,

¹⁸mârọ inyi irek ubọọn̄ kwun̄ ikeke inye kubọk nnyan̄abe ibot inyi Debit nte kwun̄ ibe, ‘Owu òkponan ene ogwu òbosiki ikweek me inyọn̄ ogboon̄ ubọọn̄ ikikpulu Ijeren.’

¹⁹“Ire, ire enyi ijit emi itele, mè ijit irọrọ orọmijọn̄ n̄a, mè ijit si irọrọ ikọ ntọbe ibe enyi erọ, mè inan̄a igọọk ebi kè ofifi awaji, mè isi ikitọbọ ebum inyi ema,

²⁰emi mâjibi ebi Ijeren isan̄a me inyọn̄ ijọn̄ n̄a ya eyi nnyibe ema. Mâjit si Uwu Mbuban yi eyi nrọbe ibe ikup mbuban kubọk ere ebekimin Erieen̄ n̄a. Uwu Mbuban yi mônenikana inu otutuuk ebi ife geelek ebekisa ito urọk, mè ikisa ito mbele.

²¹Uwu Mbuban yi, òbebene isi ichep me inyọn̄ mgbọ keyi, môgbugbọ igwook. Ene geelek òboje iraka, mè ibene chieen̄ imun̄, môriki, mè itumu ibe, ‘Ìre keke orọ Okumugwem orọbe ojelek inu òkup ikeyi me lek ido yi melek Uwu Mbuban yi?’

²²Ebi ene mêkekitumu ibe, ‘Îre mije ema ejitbe Okumugwem Awaji ebi nte nte kiban̄ ogwu òsasan̄a ema isibi me Ijipiti itele, mè ikana isi ikigọọk ebi kè ofifi awaji, mè ikitọbọ ebum inyi ema, mè ikisi ikwaan̄ inyi ema, îre eya orọ Okumugwem Awaji kiban̄ osabe otutuuk ufialek chi ijet ema.’ ”