Read obolo II Mfuf 8 Bible Online

II Mfuf 8 - obolo bible

II Mfuf 8

¹Me òta akọp acha iba mgbọ Solomọn okinama uwu iba cha, Uwu Mbuban Okumugwem mè uwu ogwu ubọọn̄,

²Solomọn onenikpọk inama ama cha Iram okanabe inyi ọmọ, mè itap ebi Ijeren me emen ibe eluk.

³Solomọn onenijibi akọn̄ isi itim me ama Amat Soba, mè ibọkọ,

⁴mè ikpọk inama Tadimoru me emen èwê, mè ikpọk inama si ama isun̄-inu echi înamabe me agan̄ Amat.

⁵Îkpọk inama ama Bet Oron eyi òkup agan̄ inyọn̄ mè ama Bet Oron eyi òkup agan̄ osiki kubọk ama mgban akọn̄, mè inama mgban ikana, mè itaak otunchit melek olọkọrọ iso me lek.

⁶Înama si Bayalat mè otutuuk ama isun̄-inu, mè otutuuk ama ekisun̄ uji akọn̄ kan̄, mè ama echi ebi ìkikọp inyinya akọn̄ kan̄ ekiluk me emen, mè inama si otutuuk inu geelek îweekbe inanama me Jeruselem, mè Lebanọn, mè otutuuk ere geelek îkikpulu.

⁷Îkaan̄ si ebi kpere bọn owot Ijeren ebi ìsisik, mè ikiluk si me inyọn̄ ijọn̄ ya. Ema ìre ebi Amọ, mè ebi Et, mè ebi Pereji, mè ebi Ifi, mè ebi Jebus.

⁸Bọn ebi ife chi ebi ìsisik me inyọn̄ ijọn̄ ya, ebi ebi Ijeren kpekpan̄ isan̄a kubọk inu oniin̄ akọn̄, ema ke Solomọn okpulu isa ikirọ unye ikwaan̄ cha mege inire cherekeyi.

⁹Ire, Solomọn ìkasa ogwu Ijeren geege ìrọ usun̄. Kpan̄asi ikeya, ema ere ebi ìkitim akọn̄, mè ebi ibot ebi isi akọn̄ kan̄, mè ebi ibot uji akọn̄ kan̄, mè ebi ibot ebi ìkikọp uji akọn̄.

¹⁰Ema si ere ebi ibot ikwaan̄ me lek otutuuk ikwaan̄ cha geelek Solomọn orọbe. Ema, efit ene iba mè akọp go, ke îto ibe ekekpọ chieen̄ me lek ebi ìkirọ ikwaan̄ cha.

¹¹Solomọn onenisa ogwu nwa, òrere gwun̄ enenwaan̄ ogwu Fero inan̄a me ama kè Debit initap me uwu ubọọn̄ înamabe inyi, mije, ìtumu ibe ke ìkanwọn ibe nwa kan̄ iluk me emen uwu ubọọn̄ kè Debit ogwu ubọọn̄ Ijeren, mije, ere geelek okop inyan̄a-ibot Okumugwem onin̄be, ere ya îkana ere òkup mbuban.

¹²Solomọn onenigwa ngwugwa ewọwọp iriọk me inyọn̄ ntook înamabe me isi irak oyet Uwu Mbuban inyi Okumugwem.

¹³Ìgwa ngwugwa cha igọọk me ike Mosis odọmọbe ibe ekegwa ngwugwa me usen me usen, mè Usen Mbuban, mè ijọk Aya Onyan̄, mè ijọk ita ekirie me acha geelek, òrere ijọk Fituru Kpunu Olat, mè ijọk Nde, mè ijọk Uwu Nlak.

¹⁴Igọọk me lek ike Debit ogwu ute odọmọbe, Solomọn îto ebi ngwugwa me ọgbọn̄ ikwaan̄ kiban̄, mè idọmọ ebi otoko kè Libai ibe ere ebi ibot me lek ikọkọt okwa itọn̄, mè eketap si ubọk enyi ebi ngwugwa ike ikwaan̄ usen geelek oweekbe. Îto si ebi ìkibem otunchit igọọk me ọgbọn̄ ikwaan̄ kiban̄ me otunchit me otunchit, mije, îre ikeyi ke Debit ogwu ikwaan̄ Awaji odọmọ isun̄.

¹⁵Me emen inu geelek ofolek ebi ngwugwa mè ebi otoko kè Libai melek uwu isun̄-inu òkup me Uwu Mbuban, ema erọ otutuuk inu igọọk me ike ogwu ubọọn̄ onyibe ida, kpenwene.

¹⁶Solomọn onenirọ otutuuk ikwaan̄ Uwu Mbuban Okumugwem isan̄a kpai, ibene me usen etọbọbe ọdọ isi ire mgbọ otutuuk ikwaan̄ otabe. Sa me ikeyi ke otutuuk ikwaan̄ inanama Uwu Mbuban Okumugwem ota isan̄a kpai.

¹⁷Solomọn oneninan̄a ije isi Esiọn Geberi mè Elat me agba okwaan̄ me ido Edọm.

¹⁸Iram oneniria owuwa uji ile ijet Solomọn sa me ubọk ebi ikwaan̄ kan̄ ebi ìrọriọọn̄ okwaan̄ ijaan̄. Ebi ife chi melek ebi ikwaan̄ kè Solomọn enenigbaan̄ ikọp isi inyam ewe me Ofiri, mè isa alata araran̄, òsoso akọp mè obop kilo go me ulobo, ika ijet ogwu ubọọn̄ Solomọn.