Read obolo II Mfuf 9 Bible Online

II Mfuf 9 - obolo bible

II Mfuf 9

¹Etip kè Solomọn onenitaan̄ ire utọn̄ ogwu ubọọn̄ enenwaan̄ Sieba. Ineninan̄a inu Jeruselem ibonisa uyọt uyọt idodo iroon̄ Solomọn ikpọ. Ogwu ubọọn̄ enenwaan̄ ya onenire Jeruselem melek ogbogbo inu ubọọn̄ òwawa enenen. Îsa ebi kè aligọ etoon̄be owuwa inu ekisa irọ inorie itop, mè alata araran̄ òwawa enenen, mè ewuuk unye otu ewe, ijot inyọn̄ igbaalek inu. Mgbọ îchichinibe Solomọn, itutumu otutuuk ikọ mè ido otutuuk idodo òkup ọmọ me ejit isan̄a kpai.

²Solomọn ofọfọọk otutuuk idodo kan̄ isan̄a. Kpunu inu geege òyọyọt Solomọn me lek ikpakpa iwele inyi.

³Ogwu ubọọn̄ enenwaan̄ Sieba ya onenimun̄ iriọọn̄-inu kè Solomọn, mè imun̄ si uwu ubọọn̄ înamabe,

⁴mè imun̄ esese chieen̄ inorie òyiyik me inyọn̄ ikasi inorie kan̄, mè ubọk edọmọbe irek ikwekweek inyi ebi ibot ikwaan̄ kan̄, mè ebi ikwaan̄ ìkibeen̄ inorie melek mbala-lek kiban̄, mè ebi ìkitọkọ miin̄ inyi ebi ene melek mbala-lek kiban̄, mè imun̄ si ngwugwa ewọwọp iriọk echi îkiwọp me Uwu Mbuban Okumugwem. [6] Otutuuk inu cha îmun̄be ogwogwook ọmọ mbiribọ me lek, ìkayaka ìkọt ìsan̄a amọn.

⁵Inenitumu inyi ogwu ubọọn̄ Solomọn ibe, “Inu geelek nkupbe me ido n̄a inọ ofolek inu owu okọtbe irọ, melek iriọọn̄-inu kwun̄, otutuuk cha ìre atikọ.

⁶Ǹkachieek inu cha nnọbe mege ire mgbọ nnube, mè inisa chieen̄ n̄a gaalek imun̄. Me atikọ, inu nnọbe ìkasoso ìkike iba me lek inu nnube inisa chieen̄ n̄a imun̄. Iriọọn̄-inu kwun̄ mè ubọọn̄ obọọn̄be îsaba enenen iraka inu nnọbe ofolek kwun̄.

⁷Kpọ uga ubelejit òkup inyi otutuuk ebi kwun̄! Kpọ uga ubelejit òkup inyi ebi ikwaan̄ kwun̄ chi ebi ìkisi ikwaan̄ me isi kwun̄ mgbọ geelek, mè ikinọ iriọọn̄-inu kwun̄!

⁸Itọn̄ ikup inyi Okumugwem Awaji kwun̄, ogwu òkaan̄ ikpele ulọk me lek kwun̄, mè itoon̄ owu me inyọn̄ ogboon̄ ubọọn̄ kan̄, inyi owu òkokpulu ebi kan̄ ònyi ọmọ, Okumugwem Awaji kwun̄. Mije imumechieen̄ Awaji kwun̄ okaan̄be me lek ebi Ijeren, mè ulọk îkaan̄be isusun̄ ema ire mgbọ geelek, ke îrọ owu ogwu ubọọn̄ inyi ema, inyi owu mônikikpulu ema me unen oyerebet mè ata irọrọ.”

⁹Ogwu ubọọn̄ enenwaan̄ Sieba oneniche obop kilo alata araran̄, mè inu ekisa irọ inorie itop òwawa enenen, mè ebi kè ewuuk unye otu ewe, inyi ogwu ubọọn̄. Inu ekisa irọ inorie itop cha echi ogwu ubọọn̄ enenwaan̄ ya ochebe inyi Solomọn îwa enenen, ire lek, mbet kan̄ ìkayaka ìkup mgbọ geege.

¹⁰(Ebi mbit kè Iram mè ebi kè Solomọn esasa alata araran̄ inan̄a me Ofiri inu, mè isa si uti junipa òwawa enenen, melek owuwa ewuuk unye otu ewe, inan̄a me Ofiri ika inu.

¹¹Ogwu ubọọn̄ onenisa uti cha irọ otitop ekisa ije inin̄ Uwu Mbuban Okumugwem, mè echi ekisa ije inin̄ uwu ogwu ubọọn̄, mè isa si irọ uneen̄ ile mè uneen̄ ija inyi ebi ìkọt okwa. Kperarak imun̄ otu ifuk uti junipa òwawa ikeya me Juda.)

¹²Ogwu ubọọn̄ Solomọn onyinyi ogwu ubọọn̄ enenwaan̄ Sieba otutuuk inu geelek îweekbe, ike îdobe. Îche uche inyi ogwu ubọọn̄ enenwaan̄ ya iwa igak uche ogwu ubọọn̄ enenwaan̄ ya ochebe inyi ọmọ. Ogwu ubọọn̄ enenwaan̄ ya onenigwu ikom ifo ido kan̄, ọmọ mè ebi ikwaan̄ kan̄.

¹³Acha geelek, Solomọn ìkibọkọ akọp obop kilo alata araran̄ ita,

¹⁴kpefuk otutuuk ikpoko òkinan̄a me ubọk ebi uga mbit mè ebi ewe geelek. Otutuuk ebi ubọọn̄ Arebia melek ebi ibot mkpulu me otutuuk agan̄ geelek me ido Ijeren ekisasa alata araran̄ mè alata okuket ijet Solomọn.

¹⁵Ogwu ubọọn̄ Solomọn onenisa alata araran̄ ebọn̄be iwele irom efit ikpele agbọ iba. Alata araran̄ esabe irom agbọ cha ge ge îlobo iraka kilo jaaba.

¹⁶Îsa si alata araran̄ ebọn̄be iwele irom efit asabọn agbọ ita. Alata araran̄ esabe irom agbọ kecha ge ge îlobo iso kilo ita mè okpọkọ. Ogwu ubọọn̄ onenikpulu ema isi iyiyik me emen Uwu Ubọọn̄ eyi Oron Lebanọn.

¹⁷Ogwu ubọọn̄ onenisa oduuk eniin̄ irọ ikpele ogboon̄ ubọọn̄ ge, mè isa atalek alata araran̄ ekalabe ijaan̄ ichọkọ ichit lek.

¹⁸Ekinene otitop gweregwen isi ikweek irek me inyọn̄ ogboon̄ ubọọn̄ ya. Mîtọkọ si inu ibene ukot eyi alata araran̄ ikam me lek ogboon̄ ubọọn̄ ya. Mîrom egbe àtat iba iyik me agba ubọk ogboon̄ ubọọn̄ ya agan̄ iba, ge okeke me agan̄ ge, ge okekeke me agan̄ keyilọ.

¹⁹Akọp mè egbe àtat iba okeke me lek otitop gweregwen cha, egbe àtat iba me lek otitop ge, ge me ibot agan̄ ge, ge me ibot agan̄ keyilọ. Kperarak irom mbet lek ogboon̄ ubọọn̄ òkup ikeyi inyi ogwu ubọọn̄ geege me otutuuk ido geelek me linyọn̄.

²⁰Otutuuk ekpen̄ miin̄ geelek ogwu ubọọn̄ Solomọn okaan̄be, esa alata araran̄ irom. Otutuuk nroon̄ uwu òkup me Uwu Ubọọn̄ eyi Oron Lebanọn, esa atalek alata araran̄ ekalabe ijaan̄ irom. Kpunu nroon̄ alata okuket geege me uwu ubọọn̄ ya, mije, kpemọnọ alata okuket kubọk inu unye otu ewe me ukot kè Solomọn.

²¹Ogwu ubọọn̄ Solomọn îkaan̄ owuwa uji ile mbit òkigọọk uji ile mbit echi kè Iram ikikọp me emen awaji ikisi inyam ewe me Tasis. Acha ita geelek, uji ewe chi îra ikika, mè ikisa alata araran̄, mè alata okuket, mè oduuk eniin̄, igbaalek ebi kè nriọk mè mkpinyọn̄ ika.

²²Ogwu ubọọn̄ Solomọn onenimin enenen igak otutuuk ebi ubọọn̄ geelek me linyọn̄ me iriọọn̄-inu mè ibọbọọn̄ ubọọn̄.

²³Otutuuk ebi ubọọn̄ linyọn̄ ekekiweek imumun̄ Solomọn isi mè isi, inyi ema enọ iriọọn̄-inu kan̄ eyi Awaji onyibe ọmọ.

²⁴Me acha me acha, ebi ene mîra ikinu. Ogwu inu, osa kpa chieen̄ kpa chieen̄ uche geelek òkaan̄ me ubọk ònu, uche nroon̄ alata okuket, mè echi alata araran̄, mè ofọnti, mè nroon̄ akọn̄, mè inu ekisa irọ inorie itop, mè ebi kè inyinya, mè ebi kè inyinya mgbidim ukot.

²⁵Solomọn îkaan̄ obop ere ini ere îkisun̄ inyinya mè uji akọn̄ kan̄, mè ikaan̄ si akọp mè obop inyinya akọn̄ iba.[7] Ìkisun̄ ema me owuwa ama uji akọn̄, mè isun̄ si usini melek kan̄ me Jeruselem.

²⁶Solomọn okekikpulu otutuuk ebi ubọọn̄, ibene me lek okwaan̄ Yuferetis inyana isi ire ijọn̄ ido ebi Filisia, mè isi igwook me okike ijọn̄ ido Ijipiti.

²⁷Ogwu ubọọn̄ Solomọn îrọ inyi alata okuket iwa me Jeruselem kubọk ewuuk ikike, mè irọ si inyi uti olik iwa si ijot ere kubọk uti sikamọ ikike òkitibi ikana otutuuk lek orioon̄ ebon ogoon̄.

²⁸Inyinya kè Solomọn, ekilep inan̄a me Ijipiti mè Silisia mè owuwa ofifi ido.

²⁹Otutuuk ofifi inu òrọrọ me ukot mkpulu kè Solomọn, bene me ibebene si re òta, egege otutuuk iso me emen ikpa kè Netan ogwu nriran, mè emen ikpa nriran kè Ayija ogwu Silo, mè ige si me emen ikpa ilaak ọkpọchieen̄ kè Ido ogwu òmọọn̄ inu eyi egebe ofolek kè Jerobuwam gwun̄ kè Nebat.

³⁰Solomọn ìkup me Jeruselem ikpulu otutuuk Ijeren akọp acha ini.

³¹Inenikwu ifo igọọk ebi nte nte kan̄, efufuun̄ ọmọ me ama kè Debit ogwu ute. Reyobuwam ogwu gwun̄ onenikana ubọọn̄ me irek kan̄.