Read obolo Ejira 1 Bible Online

Ejira 1 - obolo bible

Ejira 1

¹Me adasi acha me lek mkpulu kè Sarọs ogwu ubọọn̄ Pesia, Okumugwem onenirọ ikọ kan̄ eyi îwuukbe lek itumu inan̄a me otu kè Jerimaya ogwu nriran iso, mè initap me ejit kè Sarọs ogwu ubọọn̄ Pesia ibe inyi ida me otutuuk ido kan̄, mè ige si itap me ikpa ichon ikana ibe:

²“Sarọs ogwu ubọọn̄ Pesia ìtumu ibe ikeyi: “ ‘Okumugwem Awaji òkup me inyọn̄ îkana otutuuk ido geelek òkup me linyọn̄ keyi itap emi me ubọk, mè igobo emi ibe emi ǹnama Uwu Mbuban ǹnyi ọmọ me Jeruselem eyi òkup me ido Juda.

³Eya orọ, me etete kinyi, ebi geelek ìrere ebi eyi kan̄ egwu ekom efon Jeruselem me ido Juda, mè esi enama Uwu Mbuban Okumugwem, Awaji ebi Ijeren, òrere Awaji ogwu òkup me Jeruselem. Awaji kinyi ikup melek kinyi.

⁴Ere geelek ebi Ju ìkwakwaan̄ isik elukbe, otutuuk ebi ere ya mêche ikpoko alata okuket mè echi alata araran̄, mè nroon̄ ikwaan̄, mè anam, melek inyinyi ata ejit inyi ema, mè ema esa erọ ikwaan̄ me lek Uwu Mbuban Awaji me Jeruselem, mè esa si efaka mfaka me emen uwu ya.’ ”

⁵Ebi ibot owot iman kè Juda mè ebi ibot owot iman kè Benjamin, mè ebi ngwugwa, mè ebi otoko kè Libai, mè otutuuk ofifi ebi geelek Awaji osulube ubọk me ejit, eneninan̄a ije ibesi inama Uwu Mbuban Okumugwem me Jeruselem.

⁶Otutuuk ebi ìluk melek kiban̄ eneninyi ema alata okuket mè alata araran̄, mè nroon̄ ikwaan̄, mè anam, mè inu unye otu ewe, igbaalek owuwa inyinyi ata ejit.

⁷Ògak ge, Sarọs ogwu ubọọn̄ Pesia osasan̄a otutuuk nroon̄ Uwu Mbuban Okumugwem cha, echi ogwu ubọọn̄ Nebukadineja okpulube me emen Uwu Mbuban me Jeruselem isa ifo isi igwook me uwu awaji kan̄, isibi isa inyi ema.

⁸Sarọs ogwu ubọọn̄ Pesia ìnyinyi Miteredat ogwu òsun̄ ikpoko ida ibe ikpulu otutuuk nroon̄ cha isibi. Miteredat okpukpulu ema otutuuk isibi, mè ifuk, mè inikana inyi Sesibaja ogwu ibot mkpulu Juda.

⁹Otu ifuk otutuuk inu cha ìre: akọp nkọm alata araran̄ ita, mè obop nkọm alata okuket, mè akọp oge ikpan̄ anam iba mè onaan̄ge,

¹⁰mè akọp okwa alata araran̄ ita, mè okwa alata okuket echi m̀gban iba, efit ini mè akọp, mè obop ofifi nroon̄ ikwaan̄.

¹¹Otutuuk nroon̄ alata araran̄ mè echi alata okuket efukbe ìre obop go mè efit ini. Mgbọ ebi usun̄ akọn̄ cha enan̄abe me Babilọn ika inu Jeruselem, Sesibaja osasa otutuuk inu cha igbaalek ika.