Read obolo Ejira 10 Bible Online

Ejira 10 - obolo bible

Ejira 10

¹Mgbọ Ejira okiriaak uriaak ya, mè ikifuk ijo, mè ikito ito, mè ikijibi lek itọbọ me ijọn̄ me isi Uwu Mbuban Awaji, ogbogbo ebi Ijeren ìwawa enenen, ebirieen̄ mè ebibaan̄ mè nsabọn, efafan̄a ichit ere ya, mè igban ikana ọmọ, mè ikito ito enenen. Ere okekidimi.

²Ogwu owot iman kè Elam ge ekigwen Sekanaya, gwun̄ kè Jeyen, onenitumu inyi Ejira ibe, “Me atikọ, eji kperọ atikọ melek Awaji kiji. Eji mîdo ebibaan̄ ofifi ido me lek ijọn̄ yi. Ire, ubọk geelek, ikpọchieen̄ òwa si inyi Ijeren.

³Mgbọ keyi, eji enenyan̄a ibot melek Awaji kiji, mè eria otutuuk ebibaan̄ ofifi ido cha melek bọn geelek ema emaan̄be inyi eji, inyi efon. Kè eji erọ inu yi egọọk me nteme kwun̄, ogwukaan̄ n̄a, mè nteme ebi ìkaan̄ ukpook me lek Ikan Awaji kiji, mè erọ si egọọk me lek Ikan Awaji.

⁴Eya orọ, nan̄a keke, mije, inu yi ìkup owu me ubọk irọrọ. Eji òwa melek kwun̄. Tet lek nye, mè rọ.”

⁵Ejira oneninan̄a ikeke, mè inirọ ibe ebi ibot ebi ngwugwa mè ebi otoko kè Libai, mè otutuuk ebi Ijeren enyan̄a ibot ibe ke ema mêrọ ike Sekanaya otumube. Ema otutuuk ene enyanyan̄a ibot.

⁶Ejira onenije inan̄a me isi Uwu Mbuban Awaji ya, ifo emen agwut kè Jeyoyanan gwun̄ kè Eliasibu isi ikup. Me ere ya îkupbe, ìkarie inorie, ìkanwọ si mudim, mije ufieejit filafila ugwem ya ebi ìnan̄a me usun̄ akọn̄ ika erọbe.

⁷Eneninyi ida ikana me otutuuk Juda mè Jeruselem, ibe otutuuk ebi ìnan̄a me usun̄ akọn̄ ika enu enetitiin̄ me Jeruselem.

⁸Ebi ibot ikwaan̄ mè ebi ugane ama etumu ifieek ibe, ene geelek ogwu ìkanu sabum usen ita ònoraka, ke ebefufum otutuuk inu îkaan̄be, mè ilap ọmọ isibi me etete ebi ìnan̄a me usun̄ akọn̄ ika.

⁹Sabum usen ita cha oniso, otutuuk ebi Juda mè ebi Benjamin etititiin̄ me Jeruselem. Me òso akọp usen iba, me òso onyan̄ onaan̄ge, otutuuk ene esisiki ikweek irek me oyet ile òkup me isi Uwu Mbuban Awaji. Inu ya òrọrọ, melek ibot òkirep mgbọ ya otatap ema urimi me emen.

¹⁰Ejira ogwu ngwugwa oneninan̄a ikeke, mè itumu inyi ema ibe, “Enyi mîfifila, enyi mîdo ebibaan̄ ofifi ido, mè isa me ikeya itap inu isọkọ me lek awọ òtetet ebi Ijeren.

¹¹Mgbọ keyi, enyi otutuuk ene, ìfuk ijo kinyi me isi Okumugwem Awaji ebi nte nte kinyi, mè ìbene ìkirọ inu îkiweek. Ìsan̄a lek kinyi me lek ebi ofifi ido ìluluk ikana enyi, mè ìsan̄a si lek kinyi me lek ebibaan̄ ofifi ido cha enyi edobe.”

¹²Otutuuk urum ene ìtititiin̄ me ere ya esasa me ida ge itaan̄ ukpo ichieek igwook ibe: “Ikọ kwun̄ îtat! Ike owu otumube, ikeya ke eji eberọ.

¹³Ire, ebi ene mîwa me ere yi enenen, mgbọ keyi si ìre mgbọ ibot. Ebi ene kpebekọt ikeke ikeyi me oyet. Inu yi eji ekiweek irọrọ, ìkare inu usen ge mè ìre usen iba, mije, eji mîrọ ilọ enenen me emen inu yi.

¹⁴Mônwọn ibe ebi ibot kiji ekeke me otuchieen̄ otutuuk kiji erọ inu yi. Otutuuk ebi ama geelek ìdodo nwa ofifi ido ekesibi enu enemun̄ ema me mgbọ esun̄be inyi ema, mè ebi ugane ama kiban̄ mè ebi ibot oyerebet ama kiban̄ egọọk si enu, mege ire mgbọ uyok uyok unaan̄-ejit Awaji kiji me lek inu yi môtabe me lek kiji.”

¹⁵Îtata Jonatan gwun̄ kè Asayen mè Jayijeya gwun̄ kè Tikiba gaalek esisik ibot me lek nteme yi. Mesulam mè Sabetai ogwu otoko kè Libai erọrọ ema inye.

¹⁶Otutuuk ebi ìnan̄a me usun̄ akọn̄ ika erọrọ si ike etọtbe. Ejira ogwu ngwugwa onenigobo ebi ibot ge ge me owot iman me owot iman, me erieen̄ me erieen̄. Ema enenikweek me adasi usen me akọp onyan̄ itaak chieen̄ ikpọ ikọ ya.

¹⁷Sabum adasi usen me adasi onyan̄, ebi ibot chi ekpọkpọ chieen̄ me lek otutuuk ebirieen̄ ebi ìdo ebibaan̄ ofifi ido isan̄a.

¹⁸Me owot iman ebi ngwugwa, erieen̄ ebi ìdodo ebibaan̄ ofifi ido ire echi: Me owot iman kè Jesuwa gwun̄ kè Josadak, mè ebi ngwan̄ ebirieen̄: Maseya, mè Elieja, mè Jaribu mè Gedaliya.

¹⁹Ema otutuuk echechieek use ibe ke ema mêjit ebi nwa kiban̄. Ene geelek me etete kiban̄ onyinyi orie arọọn̄ ge, inyi mêsabe igwa ngwugwa awọ me ibot kan̄.

²⁰Me owot iman kè Imeri: Anani mè Jebadiya.

²¹Me owot iman kè Arim: Maseya, mè Ilaija, mè Semaya, mè Jeyen, mè Ujaya.

²²Me owot iman kè Pasuru: Elioyenai, mè Maseya, mè Isimen, mè Netanen, mè Josabadi mè Eliasa.

²³Me etete ebi otoko kè Libai: Josabadi, mè Simei, mè Kelaya (òrere Kelita), mè Petaya, mè Juda mè Elieja.

²⁴Me etete ebi ìkọt okwa: Eliasibu. Me etete ebi ìkibem otunchit: Salum, mè Telem mè Uri.

²⁵Me etete ofifi ebi Ijeren: Me owot iman kè Paros: Ramia, mè Ijiya, mè Malikija, mè Mijamin, mè Elieja, mè Malikija, mè Benaya.

²⁶Me owot iman kè Elam: Mataniya, mè Jekaraya, mè Jeyen, mè Abidi, mè Jeremot mè Ilaija.

²⁷Me owot iman kè Jatu: Elioyenai, mè Eliasibu, mè Mataniya, mè Jeremot, mè Jabadi mè Ajija.

²⁸Me owot iman kè Bebai: Jeyoyanan, mè Ananiya, mè Jabai, mè Atilai.

²⁹Me owot iman kè Bani: Mesulam, mè Maluk, mè Adaya, mè Jasubu, mè Seyali mè Jeremot.

³⁰Me owot iman kè Payat-Mowabu: Adina mè Kelan, mè Benaya, mè Maseya, mè Mataniya, mè Bejalen, mè Binuwi, mè Manasi.

³¹Me owot iman kè Arim: Elieja, mè Isiya, mè Malikija, mè Semaya, mè Simeyon, mè

³²Benjamin, mè Maluk mè Semariya.

³³Me owot iman kè Asum: Matenai, mè Matata, mè Jabadi, mè Elifelet, mè Jeremai, mè Manasi, mè Simei.

³⁴Me owot iman kè Bani: Madai, mè Amiram, mè Yuwen,

³⁵mè Benaya, mè Bedeya, mè Keluyi,

³⁶mè Bania, mè Meremot, mè Eliasibu, mè

³⁷Mataniya, mè Matenai, mè Jayasu.

³⁸Me owot iman kè Binuwi:[3] Simei,

³⁹mè Selemeya, mè Netan, mè Adaya,

⁴⁰mè Makanadebai, mè Sasai, mè Sarayi,

⁴¹mè Ajaren, mè Selemeya, mè Semariya,

⁴²mè Salum, mè Amariya, mè Josefu.

⁴³Me owot iman kè Nebo: Jeyien, mè Matitiya, mè Jabadi, mè Jebina, mè Jadai, mè Juwen, mè Benaya.

⁴⁴Otutuuk ebirieen̄ chi mîdo ebibaan̄ ofifi ido, usini kiban̄ mîboon̄ bọn me owot ebi nwa cha.[4]