Read obolo Ejira 3 Bible Online

Ejira 3 - obolo bible

Ejira 3

¹Ebi Ijeren cha ìnanan̄a ika eneniluk me ama kiban̄ ibọkọ lek. Me òso onyan̄ jaaba, otutuuk ene eneninan̄a isibi inu me ejit ge inigbaan̄ ititiin̄ me Jeruselem.

²Jesuwa gwun̄ kè Josadak mè ebi ngwugwa ogbo kan̄, mè Jerubaben gwun̄ kè Sialitien mè ebi melek kan̄ ekigbaan̄ isi ikwaan̄ ebebene inama ntook ngwugwa Awaji ebi Ijeren, inyi egwa ngwugwa ewọwọp iriọk me inyọn̄, kubọk egebe me emen Ikan kè Mosis ogwu ikwaan̄ Awaji.

³Ike geelek ukpook ebi ido ìkukup ikana ema okitet ema, ema enanama ntook ngwugwa ya me inyọn̄ oka ọdọ kan̄, mè igwa owuwa ngwugwa ewọwọp iriọk me inyọn̄ ntook ya inyi Okumugwem, ngwugwa ewelegwe mè ngwugwa ikakwun̄.

⁴Ema mîrie si ijọk Uwu Nlak, mè igwa otu ifuk ngwugwa ewọwọp iriọk ekigwa me usen me usen, ike egebe me ikpa Ikan.

⁵Mgbọ eya orakabe, ema egwagwa si ngwugwa ewọwọp iriọk echi ekigwa mgbọ geelek, mè igwa ngwugwa echi Aya Onyan̄, mè echi ibot mgbọ ijọk òkup mbuban inyi Okumugwem, mè inyi si Okumugwem inyinyi ata ejit inyi.

⁶Me adasi usen me òso onyan̄ jaaba, ema ebebene igwagwa ngwugwa ewọwọp iriọk inyi Okumugwem, ubọk geelek kpetọbọ-nu ọdọ Uwu Mbuban me lek kan̄.

⁷Ebi Ijeren cha enenikpe ikpoko inyi ebi ìkinama mgban, mè ebi usọ ikwaan̄ uti, mè inyi ebi Sidọn mè Taya inorie mè miin̄ mè aran̄ olifu, inyi ife cha eria uti olik me okwaan̄ okwaan̄ ejet ema, nan̄a me Lebanọn na re Jọpa, ike Sarọs ogwu ubọọn̄ Pesia onyibe ida ibe erọ.

⁸Me òso onyan̄ iba me òso acha iba me lek ebi Ijeren enan̄abe me Babilọn ika inu Jeruselem, mè inire Uwu Mbuban, Jerubaben gwun̄ kè Sialitien, mè Jesuwa gwun̄ kè Josadak, mè ofifi ebi melek kiban̄, ebi ngwugwa, mè ebi otoko kè Libai, mè otutuuk ebi ìnan̄a me usun̄ akọn̄ ika inu Jeruselem, ebebene ikwaan̄ me lek Uwu Mbuban Awaji. Ema esa ebi otoko kè Libai ebi ìsoso akọp acha iba mè iraka ito me ibot ibe ekekpọ chieen̄ me lek ikwaan̄ Uwu Mbuban Okumugwem.

⁹Jesuwa melek ebi bọn mè ebi ngwan̄, mè Kadimien melek ebi bọn (òrere ebi owot iman kè Odabia), mè bọn kè Enadadi melek bọn kiban̄ mè ebi ngwan̄ kiban̄, enenigbaan̄ ikikpọ chieen̄ me lek ebi ìkirọ ikwaan̄ Uwu Mbuban Awaji. Ema otutuuk ene ìre ebi otoko kè Libai.

¹⁰Mgbọ ebi ìnama uwu etọbọbe ọdọ Uwu Mbuban Okumugwem isan̄a, ebi ngwugwa enenibala lek ikwaan̄ kiban̄, mè initeen̄ otita kiban̄ ikaan̄, ebi otoko kè Libai (bọn kè Asafu), eteteen̄ mkpamkpa kiban̄ ikaan̄, mè inimọnọ irek kiban̄, mè ibem lek itọtọn̄ Okumugwem, ike Debit ogwu ubọọn̄ Ijeren odọmọbe.

¹¹Ema enenikikọt okwa itọn̄ inyi Okumugwem, ikibe ọmọ onirọ. Okwa ya ìje ikeyi: “Okumugwem înwọn; imumechieen̄ kan̄ me lek ebi Ijeren ìkukup ire mgbọ geelek.” Otutuuk ebi ene ekekidimi ikpele ukpo itọn̄ Okumugwem, mije etọbọbe ọdọ Uwu Mbuban Okumugwem.

¹²Owuwa ebi ugane me lek ebi ngwugwa mè ebi otoko kè Libai, mè ebi ibot owot iman kiban̄ cha, ebi ìmumun̄ adasi Uwu Mbuban ya, ebebene ida ikitaan̄ ukpo ito ito mgbọ emun̄be ọdọ eyi Uwu Mbuban keyi etọbọbe. Ire, owuwa ebi ofifi ene ekekitaan̄ ukpo inwọọn̄ unwọọn̄.

¹³Kpunu ogwu òkọkọt iriọọn̄ mè ìre ekitaan̄ ukpo unwọọn̄, sà ìre ukpo ito, mije, ebi ife cha mîtaan̄ ukpo inye enenen, ebi ene ekukup me ujọn̄ọ ere ikinọ ida ukpo kiban̄.