Read obolo Ejira 5 Bible Online

Ejira 5 - obolo bible

Ejira 5

¹Ebi nriran, Agai mè Jekaraya ogwu owot iman kè Ido, enenikiben nriran inyi ebi Ju ìkup me Juda mè Jeruselem me erieen̄ Awaji ebi Ijeren ogwu òkikpulu ema.

²Me ike mgbọ ya si ke Jerubaben gwun̄ kè Sialitien mè Jesuwa gwun̄ kè Josadak enibene ikpọk inama Uwu Mbuban Awaji me Jeruselem. Ebi nriran Awaji ekekeke igba ema, mè ikitap ubọk inyi ema.

³Me ike mgbọ ya si, Tatenai òrere ogwu ibot mkpulu usaba okwaan̄ Yuferetis, melek Seta-Bojenai, mè ebi melek kiban̄ enunu me lek kiban̄, mè ikido ema ibe, “Ìre ekene onyi enyi unye ibe enyi ekpọk enama Uwu Mbuban yi, mè ekebala ejaan̄ ikeyi?”

⁴Ema[1] mîdo si ibe, “Ìbak-nu erieen̄ ebi ìkinama uwu yi.”

⁵Ire, Awaji ebi Ju okekigwuun̄ chieen̄ ikikpọ ebi ibot ebi Ju. Eya orọ, kpekọt igban ema ibe ekayaka ìsi ikwaan̄ ya, mege ire mgbọ egebe ikpa inyi Dariọs ogwu ubọọn̄, mè ibọkọ ufọọk-otu kan̄.

⁶Tatenai ogwu ibot mkpulu usaba okwaan̄ Yuferetis, mè Seta-Bojenai, mè ebi melek kiban̄, ìrere ebi mkpulu usaba okwaan̄ Yuferetis, egege ikpa iria ijet ogwu ubọọn̄ Dariọs.

⁷Inu egebe me ikpa ijet ọmọ ìre ikeyi: “Eji ege ikpa yi ijet owu ogwu ubọọn̄ Dariọs: “Mkpulu kwun̄ ikup me esuuk.

⁸“Ogwu ubọọn̄, eji ekirọ inyi owu òriọọn̄ ibe ke eji mîsi ido Juda, mè ije ire Uwu Mbuban ikpele Awaji ya. Eji mîmun̄ ibe ke ebi ife cha ekisa ikpele ewuuk ebalabe ijaan̄, mè isa si ikpele ogbugboon̄ uti igbaalek inama lek uwu ya. Ikwaan̄ ya òkije ijaan̄, mè ikije inyi isi ugwat ugwat.

⁹“Eji mîdo ebi ugane ama ibe mè ìre ekene onyi ema unye ibe ema ekpọk enama Uwu Mbuban yi, mè ekebala ejaan̄ ikeyi.

¹⁰Eji mîdo si ibe ebak erieen̄ ebi ìkirọ ikwaan̄ ya, inyi eji mêkọt ige erieen̄ ebi ibot cha me emen ikpa yi, mè owu òriọọn̄ ema.

¹¹“Ema efọfọọk eji ibe ikeyi: “ ‘Eji ìre ebi ìkisi ikwaan̄ inyi Awaji Ogwukaan̄ Inyọn̄ mè Ijọn̄. Eji ekikpọk inama Uwu Mbuban eyi enamabe owuwa acha òraraka, eyi ikpele ogwu ubọọn̄ Ijeren ge onamabe, mè ibala isan̄a.

¹²Ire, mije ebi nte nte kiji erọbe Awaji òkup me inyọn̄ inaan̄ ejit, Awaji ya okakana ema itap me ubọk kè Nebukadineja ogwu Kalidia, ogwu ubọọn̄ Babilọn. Ogwu ubọọn̄ Nebukadineja osasa akọn̄ igwak Uwu Mbuban yi igwook, mè ikpulu ebi ene isa isi igwook me Babilọn.

¹³Ire, me adasi acha me lek mkpulu kè Sarọs ogwu ubọọn̄ Babilọn, ogwu ubọọn̄ Sarọs onyinyi ida ibe esi ekpọk enama Uwu Mbuban Awaji yi.

¹⁴Ogwu ubọọn̄ Sarọs îsan̄a si otutuuk nroon̄ ikwaan̄ Uwu Mbuban cha, echi alata araran̄ mè echi alata okuket, echi Nebukadineja okpulube me Uwu Mbuban me Jeruselem isa ifo isi isun̄ me uwu awaji kan̄ me Babilọn, mè inisa ikana inyi ogwu enerieen̄ ge ekigwen Sesibaja, ogwu îgobobe ito kubọk ogwu ibot mkpulu.

¹⁵Ogwu ubọọn̄ Sarọs ìtumu inyi Sesibaja ibe, “Kpulu nroon̄ ikwaan̄ chi sa si sun̄ me emen Uwu Mbuban òkup me Jeruselem, mè kpọk nama Uwu Mbuban Awaji ya me inyọn̄ ǹrioon̄ kan̄.”

¹⁶Ikeyi ke ogwu enerieen̄ yi, Sesibaja, oka inu, mè initọbọ ọdọ Uwu Mbuban Awaji me Jeruselem. Bene me usen ya, mege na re cherekeyi, ikwaan̄ ìkpọkpọ ikije inyi isi, ire, ìkata-nu.’

¹⁷“Mgbọ yi, soso ogwu ubọọn̄, ire môneme owu, nye lek nyi ida ibe esi ere ekisun̄ ikpa mfufuk ogwu ubọọn̄ eyi òkup me Babilọn, mè ewọlọ ekpọ-nu mè ìre ogwu ubọọn̄ Sarọs înyi ida, me atikọ, ibe ekpọk enama Uwu Mbuban Awaji òkup me Jeruselem, mè nye lek rọ mè eji eriọọn̄ nkeek kwun̄ me lek inu yi.”