Read obolo Ejira 8 Bible Online

Ejira 8 - obolo bible

Ejira 8

¹Ebibi ere ebi ibot owot iman ebi Ju, mè ebi egebe erieen̄ me ikpa mfufuk owot iman, ebi ìgọgọọk Ejira inan̄a me usun̄ akọn̄ me Babilọn ika me ukot mkpulu ogwu ubọọn̄ Atejakisis:

²Gesiọm, ogwu owot iman kè Fineyas; Danien, ogwu owot iman kè Itama; Atus, ogwu owot iman kè Debit,

³òrere si ogwu owot iman kè Sekanaya; Jekaraya, ogwu owot iman kè Paros, mè efit mè akọp ebirieen̄ go, ebi owot iman yaage melek kan̄;

⁴Elieyowenai gwun̄ kè Jeraya, ogwu owot iman kè Payat-Mowabu, mè efit ebirieen̄ iba, ebi owot iman yaage melek kan̄;

⁵Sekanaya gwun̄ kè Jayajien, ogwu owot iman kè Jatu, melek efit ebirieen̄ ita, ebi owot iman yaage melek kan̄;

⁶Ebedi gwun̄ kè Jonatan, ogwu owot iman kè Adin, melek akọp ebirieen̄ go, ebi owot iman yaage melek kan̄;

⁷Jesaya gwun̄ kè Atalia, ogwu owot iman kè Elam, melek akọp ebirieen̄ jaaba, ebi owot iman yaage melek kan̄;

⁸Jebadiya gwun̄ kè Maiken, ogwu owot iman kè Sefatiya, melek akọp ebirieen̄ jeeta, ebi owot iman yaage melek kan̄;

⁹Obidaya gwun̄ kè Jeyen, ogwu owot iman kè Jowabu, melek efit ebirieen̄ iba mè akọp mè jeeta, ebi owot iman yaage melek kan̄;

¹⁰Selomit gwun̄ kè Josifia, ogwu owot iman kè Bani, melek efit mè akọp mè ebirieen̄ gweregwen, ebi owot iman yaage melek kan̄;

¹¹Jekaraya gwun̄ kè Bebai, ogwu owot iman kè Bebai, mè akọp ebirieen̄ iba mè jeeta, ebi owot iman yaage melek kan̄;

¹²Joyanan gwun̄ kè Akatan, ogwu owot iman kè Ajigadi, mè efit ebirieen̄ mè akọp, ebi owot iman yaage melek kan̄;

¹³Elifelet, mè Jewen, mè Semaya, ebi owot iman kè Adonikam, ebi mgburudun̄, mè akọp ebirieen̄ gweregwen, ebi owot iman yaage melek kiban̄;

¹⁴Utai mè Jakuru, ebi owot iman kè Bigibai, ema mè akọp ebirieen̄ jaaba, ebi owot iman yaage melek kiban̄.

¹⁵M̀gbagbaan̄ otutuuk ene ititiin̄ me agba lek okolo òkilibi isi ama Ayaba, eji egwugwuun̄ uwu ọfọ me ere ya, mè ikup usen ita. Nnenikpọ me etete ebi ene mè etete ebi ngwugwa, ire, ǹkamun̄ ebi otoko kè Libai me ere ya.

¹⁶Nneniria ikwaan̄ igwen Elieja, mè Arien, mè Semaya, mè Elinatan, mè Jaribu, mè Elinatan, mè Netan, mè Jekaraya, mè Mesulam ebi ìrere ebi ibot otoko ya, mè igwen si Jioyaribu mè Elinatan, ebi ìkakaan̄ iriọọn̄-inu,

¹⁷mè iria ema isi lek kè Ido ogwu ibot ebi otoko kè Libai me Kasifia. M̀be ema esi elook Ido mè ebi owot iman kiban̄, mè bọn ikwaan̄ Uwu Mbuban ìkup me Kasifia, ibe eria ebi ikwaan̄ ejet eji, inyi enesi ikwaan̄ me Uwu Mbuban Awaji kiji me Jeruselem.

¹⁸Mije ubọk Awaji kiji okupbe ijaan̄ melek kiji, ema eraria Serebiya, enerieen̄ òrọriọọn̄ ikwaan̄ kan̄ ichat ubọk, ogwu owot iman kè Mali gwun̄ kè Libai gwun̄ kè Ijeren. Ema mîria bọn ebirieen̄ kè Serebiya mè ebi ngwan̄ kan̄ igbaalek ijet eji, ema akọp mè ebirieen̄ jeeta.

¹⁹Ema mîria si Asabiya, melek Jesaya ogwu owot iman kè Merari, mè ebi ngwan̄ mè bọn ebi ngwan̄ igbaalek, ema akọp ebirieen̄ iba.

²⁰Ema esasa si efit ene iba mè akọp iba ìrere bọn ikwaan̄ Uwu Mbuban igbaalek inu. Otu ogbo bọn ikwaan̄ Uwu Mbuban yi ìre otu ogbo eyi Debit mè ebi ibot ikwaan̄ kan̄ edọmọbe isibi ibe eketap ubọk enyi ebi otoko kè Libai. Egege erieen̄ kiban̄, me ene me ene, itap me ikpa.

²¹Me ere ya, me agba lek okolo Ayaba eji ekupbe, nneninyi ida ibe mè eji ejin otu esa esiki lek kiji me isi Awaji kiji, mè ebeek ọmọ ibe isa eji iban me oniin̄ ije kiji me esuuk, eji melek nsabọn kiji, mè otutuuk nroon̄ uwu kiji.

²²Esip ìkachieek ibe emi m̀beek ogwu ubọọn̄ ibe inyi eji ebi akọn̄ ukot ukot mè ebi ìkikọp me inyọn̄ inyinya ibe esa eji eban, mè ekput eji lek me ubọk ebi ochicha kiji me oniin̄ ije. Mije, eji mîwuuk lek itumu inyi ogwu ubọọn̄ ibe ke ubọk Awaji kiji òwa okichit otutuuk ebi ìkitọbọ ebum inyi ọmọ, ire, ke uyok uyok unaan̄-ejit kan̄ òwa okikeme otutuuk ebi geelek ìjijit ọmọ itele.

²³Eji enenijin otu, mè ibeek Awaji kiji mbeek ofolek inu yi, irọrọ mbeek kiji inyi eji.

²⁴Nnenigobo akọp mè ebi ngwugwa iba, ebi isi, òrere Serebiya, mè Asabiya, mè akọp ebi ngwan̄ kiban̄,

²⁵mè initọ otutuuk alata okuket, mè alata araran̄, mè otutuuk nroon̄ ikwaan̄ echi ogwu ubọọn̄ mè ebi nteme kan̄ mè ebi ibot ikwaan̄ kan̄ mè ebi Ijeren ìkup me ere ya echebe inyi me lek ikwaan̄ mè mfaka Uwu Mbuban Awaji kiji, isa itap ema me ubọk.

²⁶Ǹroroon̄ otutuuk inu cha isa inyi ema: alata okuket, akọp obop kilo iba mè obop iba; nroon̄ ikwaan̄ echi alata okuket, obop kilo ita mè okpọkọ; alata araran̄, obop kilo ita mè okpọkọ;

²⁷akọp ngigọ alata araran̄ iba, kilo jeeta mè okpọkọ; mè ngigọ ekwe iba esabe ukan̄ ikala ijaan̄, echi otu ewe kiban̄ orebe ìkike melek otu ewe alata araran̄.

²⁸Nnenitumu inyi ebi ngwugwa cha ibe, “Enyi ekup me mbuban inyi Okumugwem, nroon̄ ikwaan̄ chi si ìkup me mbuban. Alata okuket mè alata araran̄ chi ìre inyinyi ata ejit echi ebi ene enyibe Okumugwem, Awaji ebi nte nte kinyi.

²⁹Ìgbala chieen̄ ìbem inu chi, mege ire mgbọ enyi mêroon̄be ema igwook me emen Uwu Mbuban me Jeruselem, me chieen̄ otutuuk ebi ibot ngwugwa, mè ebi otoko kè Libai, mè ebi ibot otoko geelek me Ijeren.”

³⁰Ebi ngwugwa mè ebi otoko kè Libai cha ebọbọkọ otutuuk alata okuket, mè alata araran̄ cha, mè nroon̄ ikwaan̄ cha eroon̄be inyi ema ibe esa esi Uwu Mbuban Awaji kiji me Jeruselem.

³¹Me òso akọp mè usen iba me adasi onyan̄, eji ebebene ije inan̄a me agba lek okolo Ayaba ikije isi Jeruselem. Ubọk Awaji kiji okukup melek kiji me oniin̄ ije kiji, ibebem eji, inyi ubọk ebi ochicha mè ebi inọ afa ìkikup me lek oniin̄ ikare eji lek.

³²Eji enenire Jeruselem, mè isiki efuuk usen ita.

³³Me òso usen ini kan̄, eji enenikup me emen Uwu Mbuban Awaji kiji iroon̄ otutuuk alata okuket mè alata araran̄ cha, mè iroon̄ si otutuuk nroon̄ ikwaan̄ cha, mè inikana ema itap me ubọk kè Meremot gwun̄ kè Uraya ogwu ngwugwa. Elieja gwun̄ kè Fineyas òwa si melek kan̄, melek ebi otoko kè Libai, ìrere Josabadi gwun̄ kè Jesuwa mè Nowadia gwun̄ kè Binuwi.

³⁴Otutuuk inu ososo ifuk. Egege otu ifuk kiban̄ mè ulobo kiban̄, me ge me ge, itap me ikpa.

³⁵Otutuuk ebi ìnan̄a me usun̄ akọn̄ ika cha enenigwa ngwugwa ewọwọp iriọk inyi Awaji ebi Ijeren. Egwu akọp mè orie eriembuuk iba me ibot otutuuk ebi Ijeren, mè akọp arọọn̄ onaan̄ge mè gweregwen, mè akọp bọn orie arọọn̄ jaaba mè jaaba, mè igwu si akọp mè orie ebot iba isa igwa ngwugwa ijo inu. Otutuuk chi ìre ngwugwa ewọwọp iriọk inyi Okumugwem.

³⁶Ema mîkana si ikpa ikan ogwu ubọọn̄ onyibe itap me ubọk ebi otuchieen̄ ogwu ubọọn̄, mè ebi ibot mkpulu agan̄ usaba okwaan̄ Yuferetis. Ife cha si etatap ubọk inyi ebi Ijeren, mè itap si ubọk me lek ikwaan̄ Uwu Mbuban Awaji ike egebe me ikan ya.