Read obolo Ejira 9 Bible Online

Ejira 9 - obolo bible

Ejira 9

¹Mgbọ inu chi geelek orakabe, ebi ibot ebi Ju enunu me lek n̄a initumu inyi emi ibe, “Kpọ, otutuuk ebi Ijeren, igbaalek usini ebi ngwugwa mè ebi otoko kè Libai, mîbene ikiluk filafila ugwem. Kpesan̄a lek kiban̄ me lek ebi ofifi ido ìluluk ikana eji me inyọn̄ ijọn̄ yi. Ema ekigọọk irọ mbuban orọmijọn̄ ebi Kenan, mè ebi Et, mè ebi Pereji, mè ebi Jebus, mè ebi Amọn, mè ebi Mowabu, mè ebi Ijipiti, mè ebi Amọ.

²Ebirieen̄ kiji mêkido bọn ebibaan̄ kiban̄, ebirieen̄ kiban̄ si mêkido bọn ebibaan̄ kiji, mè isa me ikeyi iwuwọlọ eje ebi ìkup me mbuban melek eje ebi ìluluk ikana eji. Eyi òfefieek ichit ìre ke ebi mkpulu mè ebi ibot kiji ekirọ filafila ugwem yi igak otutuuk ene.”

³Emi inọnọ ikọ yi, ntataba ofọnti inyọn̄ mè ofọnti irak òkup emi me lek igwak, mè itaba si ijeek ibot n̄a mè ifet otu n̄a igwugwaka, mè isiki ikweek me ijọn̄ uwọ uwọ.

⁴Otutuuk ebi ìkitet ukpook me lek ikọ Awaji ebi Ijeren enunu inisiki ikweek melek n̄a mije filafila ugwem yi ebi kiji ìnan̄a me usun̄ akọn̄ ika ekiluk. Ikeya ke nkweek me ijọn̄ ya uwọ uwọ mege ire mgbọ ngwugwa ikakwun̄.

⁵Mgbọ ngwugwa ikakwun̄, nneninan̄a ikeke me irek isiki-lek ya, mè initọbọ ekpe me ijọn̄, mè iyat ubọk n̄a iba iwele ifo inyọn̄ inyi Okumugwem Awaji n̄a,

⁶mè iriaak uriaak ibe, “Jei Awaji n̄a, esip îtet emi enenen, ire lek, ǹkayaka ìkọt ìbene isi ìkpọ owu, Awaji n̄a. Mije, ijo kiji îwa isaba iraka eji ibot, awọ òtetet eji îtiik ibene ire isi kwun̄ me emen inyọn̄.

⁷Karake ukot ebi nte nte kiji ke ikpele awọ otet eji mege inire cherekeyi. Mije ijo kiji, eji mè ebi ubọọn̄ kiji, mè ebi ngwugwa kiji, owu oyaka eji itap me ubọk ebi ubọọn̄ ofifi ido, inyi ekpan̄ eji me otu oge akọn̄, mè ekpulu eji me usun̄ akọn̄, mè efum eji enọọn̄, mè etap eji esip me isi, kubọk îkupbe chereyi.

⁸“Mgbọ keyi, me sọnja mgbọ yi, Okumugwem Awaji kiji îkaan̄ nsan me lek kiji, mè itele ibe ebi kiji ekwaan̄ esik, mè irọ inyi ukot kiji inye me ijọn̄ me emen ere mbuban kan̄. Awaji kiji îtuku eji mun̄ ito isan̄a me chieen̄, inyi chieen̄ kiji itoon̄, mè isan̄a eji isibi me usun̄, inyi eji ekaan̄ utelelek.

⁹Me atikọ, eji ìre ebi usun̄. Ire, Awaji kiji ìkajit eji ìtele me irak ubọk usun̄. Îrọ inyi ebi ubọọn̄ Pesia ekaan̄ ata ejit me lek kiji, mè esun̄ ebek ugwem kiji, inyi eji enekpọk enama uwu Awaji kiji, mè enen̄e inu geelek òfafiat me lek esun̄, mè ewak si mgban ikput-lek me Juda mè Jeruselem.

¹⁰“Ire, mgbọ keyi, jei Awaji kiji, ìre keke ke eji ebeyaka itumu? Mije, eji mîjuuk ikọ otọbe inyi eji itele.

¹¹Owu onyi ida, inan̄a me otu ebi ikwaan̄ kwun̄ ebi nriran, ibe ke inyọn̄ ijọn̄ ya eji ebenin̄ ìre ijọn̄ òkaan̄ orieen̄ me lek, inan̄a me lek filafila ugwem ebi ofifi ido ìluk me ere ya, mè isa me ikeya ichaka mbuban me lek ijọn̄ ya ibene me agan̄ ge isi ichak me agan̄ keyilọ.

¹²Owu otumu ibe eji ekasa nsabọn ebibaan̄ kiji ìche olom ìnyi nsabọn irieen̄ kiban̄, mè ekado si nsabọn ebibaan̄ kiban̄ ìnyi nsabọn ebirieen̄ kiji, mè eji ekaweek esuuk melek kiban̄, mè ekatatap si ubọk ìnyi ema mgbọ geege, inyi eji ekeke enye, mè ekerie ata inu ònan̄a me ijọn̄ ya, mè eyaka ijọn̄ ya enyi bọn kiji me ìrot ire ukot geelek.

¹³“Mgbọ yi, inu òsisibi inyi eji ìre mkpukpe ijo inu kiji, mè mkpukpe uga awọ òtetet eji. Ire, owu Awaji kiji, osusut osulube eji îsip igak ijo inu kiji. Owu otele ibe eji ekwaan̄ esik otu ifuk ene keyi.

¹⁴Ire ikeya, ìre eji mêfat ikpọk ifiat ikan kwun̄, mè ikpọk ikido ebibaan̄ ebi ife chi ìkiluk filafila ugwem, mè ikisa si ebibaan̄ kiji iche olom inyi ema ni? Ire eji irọ, ìre uga unaan̄-ejit kwun̄ ìkpofat ijijaka eji isan̄a, eyi ene geege ìkpoyaka isik?

¹⁵Jei Okumugwem, Awaji ebi Ijeren, owu ìre ogwu ata irọrọ! Mije, me cherekeyi, eji ìre ebi ìkwakwaan̄ isik me akọn̄. Kpọ eji ire ebi me isi kwun̄, awọ îtet eji. Mije, kpunu ene geege òbokọt ikeke me isi kwun̄ me emen ojelek inu òkup ikeyi òmọmọnọ irek.”