Read obolo Neyem 1 Bible Online

Neyem 1 - obolo bible

Neyem 1

¹Eyi ìre mfufuk kè Neyemaya gwun̄ kè Akalia: Me onyan̄ Kisilep,[1] me òso akọp acha iba me ukot mkpulu kè Atejakisis, emi ǹkup me Susa ama ibot ido Pesia.

²Anani ngwan̄ n̄a onanan̄a me Juda inu, ọmọ melek ebi ofifi ene. Nnenikido ema inu ofolek ebi Ju ìkwakwaan̄ isik cha ebi ìnwọnwọnọ usun̄ akọn̄, mè ikido si ema inu ofolek Jeruselem.

³Ema enenibe emi, “Ebi ìkwakwaan̄ isik me usun̄ akọn̄ ya, mè ika inu me ido Juda ekiluk me irak ikpele ujaralek mè esip. Mgban ama Jeruselem îgbugbọ otutuuk igwook, ukan̄ îtaka otutuuk otunchit ama ikpukpuku isan̄a.”

⁴Mgbọ nnọbe ikọ yi, nsisiki ikweek, mè isa chieen̄ ichit me lek ito, mè ifieek ejit, mè ijin otu, mè ikiriaak uriaak ibeek Awaji òkup me inyọn̄ mbeek,

⁵ibe: “Jei, Okumugwem Awaji òkup me inyọn̄, Awaji ogwu òmimin mè ikaan̄ ukpook, ogwu òkisun̄ inyan̄a-ibot kan̄, mè ikikaan̄ ata ejit me lek ebi ìmun̄ ọmọ me chieen̄, mè ikirọ ikọ îtọbe,

⁶nye lek rieen̄ utọn̄ nọ emi ida, mè chili si chieen̄ mọọn̄ uriaak eyi emi ogwu ikwaan̄ kwun̄ nkiriaak me isi kwun̄ eririeen̄ mè ikarek me ibot ebi usun̄ kwun̄ ebi Ijeren! Ǹkup me isi kwun̄ mgbọ keyi ikifuk ijo me ibot ebi Ijeren ibe ke eji mîrọ owu ijo inu. Emi me lek n̄a melek ebi uwu kè nte n̄a, eji otutuuk mîrọ owu ijo inu.

⁷Eji mînye ibot inyi owu atalek ikpak ikpak, eji kpekirọ ikọ owu otọbe, kpekirọ orọmijọn̄ kwun̄, kpekisun̄ ikan kwun̄ echi onyibe Mosis ogwu ikwaan̄ kwun̄.

⁸“Soso keek ida owu onyibe ogwu ikwaan̄ kwun̄ Mosis ibe, ‘Ire enyi kperọ atikọ melek n̄a, mâyiyala enyi ichon ikana me etete ebi ofifi ido geelek.

⁹Ire, ire enyi igwu ikom inu me lek n̄a, mè ikisun̄ ikọ ntọbe, me igwuun̄ chieen̄ ikirọ ikọ cha, mâtiten̄e enyi inan̄a me ntutun̄ ere geelek ntọọn̄be enyi igwook me linyọn̄, mè isa enyi iyaka igwu ikom ika inigwook me ere emi ngobobe inyi Erieen̄ n̄a.’

¹⁰“Kpọ, ema ìre ebi usun̄ kwun̄, mè ire si ebi kwun̄, ebi owu osabe ikpele unye kwun̄ mè unye ubọk kwun̄ inyan̄a isibi.

¹¹Jei Okumugwem, nye lek rieen̄ utọn̄ nọ emi ogwu ikwaan̄ kwun̄ ida, mè fọọk otu uriaak ebi usun̄ kwun̄ ebi ìkima imimin erieen̄ kwun̄. Soso, rọ inyi inu ije ijaan̄ emi ogwu ikwaan̄ kwun̄ me lek cherekeyi, rọ mè ogwu ubọọn̄ ikaan̄ ejit nsan me lek n̄a.” Me mgbọ ya, emi ìre ogwu òkitọkọ miin̄ inyi ogwu ubọọn̄.