Read obolo Neyem 10 Bible Online

Neyem 10 - obolo bible

Neyem 10

¹Ebibi ere ebi ìsasa iman̄ òriọọn̄ kiban̄ igon me lek ikpa ya: Neyemaya ogwu ibot mkpulu, gwun̄ kè Akalia, mè Jedikaya,

²mè Seraya, mè Ajariya, mè Jerimaya,

³mè Pasuru, mè Amariya, mè Malikija,

⁴mè Atus, mè Sebaniya, mè Maluk,

⁵mè Arim, mè Meremot, mè Obidaya,

⁶mè Danien, mè Ginetọn, mè Baruk,

⁷mè Mesulam, mè Abija, mè Mijamin,

⁸mè Mayajiya, mè Biligayi, mè Semaya. Ebiba ere ebi ngwugwa.

⁹Ebi otoko kè Libai: Jesuwa gwun̄ kè Ajania, mè Binuwi òrere ene ge me lek bọn kè Enadadi, mè Kadimien,

¹⁰mè ebi melek kiban̄ ekigbaan̄ ikwaan̄ irọ: Sebaniya, mè Odiya, mè Kelita, mè Pelaya, mè Yanan,

¹¹mè Mika, mè Reyobu, mè Asabiya,

¹²mè Jakuru, mè Serebiya, mè Sebaniya,

¹³mè Odiya, mè Bani, mè Beninu.

¹⁴Ebi ibot owot iman: Paros, mè Payat-Mowabu, mè Elam, mè Jatu, mè Bani,

¹⁵mè Buni, mè Ajigadi, mè Bebai,

¹⁶mè Adonija, mè Bigibai, mè Adin,

¹⁷mè Ateri, mè Ejikaya, mè Ajuru,

¹⁸mè Odiya, mè Asum, mè Bejai,

¹⁹mè Arifu, mè Anatọt, mè Nebai,

²⁰mè Magipiyas, mè Mesulam, mè Ejiri,

²¹mè Mesejaben, mè Jadọk, mè Jaduwa,

²²mè Pelatiya, mè Yanan, mè Anaya,

²³mè Osiya, mè Ananiya, mè Asubu,

²⁴mè Aloyes, mè Piliya, mè Sobek,

²⁵mè Reyum, mè Asabina, mè Maseya,

²⁶mè Ayiya, mè Yanan, mè Anan,

²⁷mè Maluk, mè Arim, mè Bayana.

²⁸Otutuuk ebi Ijeren kechilọ, ìrere ebi ngwugwa, mè ebi otoko kè Libai, mè ebi ìkibem otunchit, mè ebi ìkọt okwa, mè bọn ikwaan̄ Uwu Mbuban, mè otutuuk ebi ìsasan̄a lek kiban̄ isan̄a me lek ebi ofifi ido ìluluk ikana me inyọn̄ ijọn̄ ya mije Ikan Awaji, ema melek ebi nwa, mè ebi bọn ebirieen̄, mè ebi bọn ebibaan̄ ebi ìmimiin̄ inin̄ ene, mè iriọọn̄ inu, mè ikaan̄ ngobo-ntet,

²⁹otutuuk ife chi enenisa me ejit ge igbaan̄ ichieek melek ebi ngwan̄ kiban̄ ìrere ebi isi ile, mè igbaan̄ inyan̄a ibot, mè itap awọ ikeme lek kiban̄, ibe ke ema mêkiluk ugwem ikpọ me lek Ikan Awaji eyi Awaji onyibe inan̄a me ubọk kè Mosis ogwu ikwaan̄ kan̄, mè ikirọ otutuuk ikọ geelek Okumugwem Ogwukaan̄ kiji otọbe, mè otutuuk Ikan kan̄, mè orọmijọn̄ kan̄.

³⁰“Eji mîchieek use ibe ke eji kpebesa bọn kiji ebibaan̄ iche olom inyi ebi ofifi ido ìluk ikana eji, eji kpebedo si bọn ebibaan̄ kiban̄ me lek nwa inyi bọn ebirieen̄ kiji.

³¹“Ire ebi ofifi ido chi ìluk ikana eji isa mbit ewe, mè ìre akpa inu ibeninyam me Usen Mbuban, mè ìyaka ire usen geelek òkup me mbuban, eji kpebebọkọ me ubọk kiban̄ ilep. Òso acha jaaba geelek, eji kpebewop inu geege me uko, otutuuk urieek geelek ekaan̄be eji, me acha ya, eji ebefufuk ichep.

³²“Eji mîchieek si inye ibe ke ene geelek me etete kiji môkinyi irek ge me irek ita ikpoko alata okuket ge, mgbọ ge me acha, inyi mêkisa irọ ikwaan̄ me uwu Awaji kiji.

³³Ikpoko ya ke ebekisa ikpọ chieen̄ me lek Fituru Isi Awaji eyi ekitoon̄ me inyọn̄ ikasi, mè ngwugwa akpa mè ngwugwa ewọwọp iriọk echi ekigwa mgbọ geelek, mè ngwugwa echi ekigwa me Usen Mbuban, mè echi ijọk Aya Onyan̄, mè ijọk acha geelek, mè ngwugwa ijo inu eyi ekisa irọ esuuk me ibot ebi Ijeren, mè otutuuk ikwaan̄ geelek ebekirọ me lek uwu Awaji kiji.

³⁴“Eji ebi ngwugwa, mè ebi otoko kè Libai, mè otutuuk ebi Ijeren, eji mîroon̄ nriroon̄ isa iriọọn̄ mgbọ ebi owot iman ge me ge ebekisa iye inu, inyi mêkisa isọk ukan̄ me inyọn̄ ntook ngwugwa Okumugwem Awaji kiji me ibot mgbọ kiban̄ me acha me acha, ike egebe me emen ikpa Ikan.

³⁵“Eji mîchieek inye si ibe ke eji mêkisa adasi mfut geelek ònan̄a me uko kiji, mè mfut geelek ònan̄a me lek uti kiji geelek inu inigwook me Uwu Mbuban Okumugwem acha geelek.

³⁶“Kubọk egebe si me emen Ikan, eji mîchieek si inye ibe ke eji mêkisa adasi bọn ebirieen̄ echi bọn kiji mêkaan̄be, mè adasi orie bọn eriembuuk kiji geelek, mè adasi orie bọn arọọn̄ melek ebot kiji geelek, inu me uwu Awaji kiji, isa ininyi ebi ngwugwa ìkisi ikwaan̄ me uwu ya.

³⁷“Eji mîchieek si inye ibe ke eji mêkisa akpa ekọkbe, mè inyinyi eyi akpa kiji, mè mfut geelek ònan̄a me lek uti echi òkito mfut, mè aya miin̄ kiji, melek aran̄ olifu, inu initap me emen uwu isun̄-inu echi òkup me lek uwu Awaji kiji. Eji mîchieek si ibe ke eji mêkisa irek ge me akọp irek me ibot otutuuk mfut uko kiji geelek ininyi ebi otoko kè Libai, mije, îre ema ekibọkọ irek ge me akọp irek me ubọk ebi ene me ama geelek eji ekirọ ikwaan̄.

³⁸Ogwu ngwugwa ònan̄a me owot iman kè Erọn môkikup melek ebi otoko kè Libai mgbọ geelek ebi otoko kè Libai ekibọkọ irek ge me akọp irek yi me ubọk ebi ene. Ebi otoko kè Libai mêsa irek ge me akọp irek eyi otutuuk ikpoko ema ebọkọbe isi ikpe itap me emen uwu isun̄-inu me uwu Awaji kiji.

³⁹Ebi Ijeren, melek ebi otoko kè Libai, mêkisa otutuuk inyinyi akpa mè aya miin̄ mè aran̄ olifu kiban̄ inu inikpe itap me ere ekisun̄ nroon̄ ikwaan̄ Uwu Mbuban, ere ebi ngwugwa ìkisi ikwaan̄, mè ebi ìkibem otunchit, mè ebi ìkọt okwa, ekiluk. “Eji kpebekpọ uwu Awaji kiji ilọ chieen̄.”